ايماقتار • 15 شىلدە، 2021

باتىس قازاقستاندا باقسى كەمپىردىڭ قابىرى تابىلدى

1901 رەت كورسەتىلدى

باتىس قازاقستان وبلىسىنىڭ شىڭعىرلاۋ اۋدانىنا قاراستى ۇرىساي ەلدىمەكەنىندە ارحەولوگيالىق قازبا جۇمىسىن جۇرگىزگەن عالىمدار ءبىزدىڭ زامانىمىزعا دەيىنگى V عاسىرعا تيەسىلى سارمات كوسەمدەرىنىڭ زيراتىن تاپتى، دەپ حابارلايدى Egemen.kz.

عىلىم تىلىندە «ۇرىساي 2 كونە قورعاندار توبى» دەپ اتالاتىن ءۇش وبانى باتىس قازاقستان وبلىستىق تاريحي-ولكەتانۋ مۋزەيىنىڭ تاريح جانە ارحەولوگيا ءبولىمى قىزمەتكەرلەرى بيىلعى ماۋسىم-شىلدە ايلارىندا قازىپ، زەرتتەدى. قازبا جۇمىسىن تاريح جانە ارحەولوگيا ءبولىمىنىڭ اعا عىلىمي قىزمەتكەرى يانا لۇقپانوۆا جۇرگىزدى.

ايتا كەتەيىك، شىڭعىرلاۋ اۋدانى اۋماعىنداعى سەگىزساي، ەلەكشار وبالارى دۇنيەجۇزىلىك ارحەولوگيا عىلىمىندا تانىمال، ەرەكشە مەكەن. مۇندا ءبىزدىڭ زامانىمىزعا دەيىنگى V عاسىرلاردان باستاپ ورتاعاسىرلاردى قامتيتىن قورعاندار كەشەنى ساقتالعان.

- بيىل قازىلعان وبا - الدىن الا بولجام بويىنشا باقسى كەمپىرگە تيەسىلى. ول ءوز تايپالاستارىنىڭ دەنەسىنە ءتۇرلى ويۋ-ورنەك، تاتۋيروۆكا جاساۋدىڭ شەبەرى بولعان. باقسى قارتايىپ ولگەن، سۇيەكتەرىنىڭ كورىنىسىنە قاراعاندا پولياتريت دەرتىنە شالدىققان بولۋى مۇمكىن. بۇل جەردە تابىلعان قۇرباندىق تاسى، جۇزدەگەن جەبە ۇشى، باسقا دا بۇيىمدار مارقۇمنىڭ ءوز قوعامىندا ۇلكەن لاۋازىم اتقارعانىن كورسەتەدى. ال ونىڭ جانىندا قارۋ-جاراعىمەن جەرلەنگەن جاس جىگىت – باقسىنىڭ ءتىرى كەزىندە وققاعارى، قورعاۋشىسى بولعان جاۋىنگەر بولسا كەرەك. جەر استى دۇنيەسىندە دە قوجاسىن قورعاپ ءجۇرۋى ءۇشىن ءولتىرىپ، وسىلاي بىرگە جەرلەگەن سياقتى، - دەيدى شىڭعىرلاۋ اۋداندىق تاريحي-ولكەتانۋ مۋزەيىنىڭ مەڭگەرۋشىسى، ولكەتانۋشى تىلەگەن قاليەۆ.

ءبىر وكىنىشتى جاعداي، بۇل وبالاردىڭ ءبارى دە ءوز زامانىندا تونالعان، ب ۇلىنگەن كورىنەدى. بىراق قالاي بولعاندا دا تابىلعان بۇيىمداردىڭ تاريح ءۇشىن ماڭىزى ۇلكەن. ءتيىستى لابوروتوريالىق زەرتتەۋلەردەن كەيىن بۇل قۇندى جادىگەرلەر شىڭعىرلاۋ اۋداندىق تاريحي-ولكەتانۋ مۋزەيىنە تاپسىرىلىپ، حالىق نازارىنا ۇسىنىلماق.

ايتا كەتەيىك، سوڭعى جىلدارى شىڭعىرلاۋلىقتار ءوز ولكەسىنىڭ تاريحىن تۇگەندەۋگە، اسىرەسە بۇدان بۇرىن وسى وڭىردەن جان-جاققا اكەتىلگەن جادىگەرلەردى اۋداندىق مۋزەيگە قايتارۋعا ەرەكشە كۇش سالۋدا. بۇل ىسكە شىڭعىرلاۋ اۋداندىق ءماسليحاتىنىڭ دەپۋتاتى، «جاڭاجەر» شارۋا قوجالىعىنىڭ باسشىسى الىبەك تالدىباەۆ ۇلكەن ۇلەس قوسىپ ءجۇر ەكەن. جوعارىدا اتالعان قازبا جۇمىسىنا دا الىبەك جۇماحان ۇلى دا اتسالىسقان.

 

باتىس قازاقستان

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار