قازاقستان قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ وفيتسەرى كاپيتان داۋرەن قاسەنوۆ ءبىرىنشى دارەجەلى ديپلوممەن جانە «تمد-نىڭ ۇزدىك جاس عالىمى – 2021» مەدالىمەن ناگرادتالدى. ونىڭ كونكۋرستىق جۇمىسى قازاقستاننىڭ كۇرت وزگەرمەلى كونتينەنتتىك كليماتىندا ۇشقىشسىز ۇشۋ اپپاراتتارىنىڭ مۇزدانۋ پروبلەماسىن شەشۋمەن بايلانىستى بولدى.
كاپيتان داۋرەن قاسەنوۆ – جەتەكشى وتاندىق جانە شەتەلدىك عىلىمي جۋرنالداردا جاريالانعان 30-دان استام عىلىمي ماقالانىڭ اۆتورى, ءۇش كىتاپ باسىلىمىنىڭ تەڭ اۆتورى, اۆتورلىق قۇقىق وبەكتىسىنە قۇقىقتاردى مەملەكەتتىك تىركەۋ تۋرالى ءتورت كۋالىكتىڭ جانە ءبىر پاتەنتتىڭ يەسى.
بيىل ول قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتى عىلىمي-زەرتتەۋ توبىنىڭ قۇرامىندا وتاندىق «شاعالا» ۇشقىشسىز ۇشۋ اپپاراتىن جاساۋ بويىنشا قولدانبالى عىلىمي-زەرتتەۋلەرگە قاتىسقان.
«ەگەمەن-اقپارات»
