فوتو: «اۋىل» پارتياسىنىڭ ءباسپاسوز قىزمەتى
فورۋمنىڭ باستى ماقساتى – جاڭارتىلعان اتا زاڭ ەرەجەلەرىن كاسىبي تۇرعىدا سارالاۋ, ونى ىسكە اسىرۋعا قاتىستى ۇسىنىستار ازىرلەۋ جانە ساراپشىلار قاۋىمداستىعىنىڭ ورتاق ۇستانىمىن قالىپتاستىرۋ. قاتىسۋشىلار كونستيتۋتسيالىق رەفورمانىڭ ەل دامۋى ءۇشىن ماڭىزىن اتاپ ءوتتى.
ءىس-شاراعا مەملەكەتتىك ورگاندار وكىلدەرى, ساياسي پارتيا مۇشەلەرى, عالىمدار, قوعامدىق ۇيىمدار مەن جاستار بىرلەستىكتەرىنىڭ جەتەكشىلەرى قاتىستى. ولار جاڭا كونستيتۋتسيا تۇراقتى دامۋ مەن قوعامدىق كەلىسىمدى نىعايتۋدىڭ نەگىزى بولاتىنىن ايتتى.
ساراپشىلار: جاڭا كونستيتۋتسيا جوباسى مەملەكەتتىك جۇيەنىڭ ورنىقتىلىعىن ارتتىرادى
«اۋىل» پارتياسى توراعاسىنىڭ ورىنباسارى عالىمجان قۇسمانعالي الداعى رەفەرەندۋمنىڭ ساياسي مانىنە توقتالدى. ونىڭ ايتۋىنشا, بۇل ۇدەرىس ازاماتتاردىڭ بيلىك ينستيتۋتتارىنا دەگەن سەنىمىن كۇشەيتىپ, ەل بولاشاعىنا قاتىستى شەشىم قابىلداۋعا تىكەلەي قاتىسۋىنا مۇمكىندىك بەرەدى.
«رەفەرەندۋم وتكىزۋ – حالىق پىكىرىن بەكىتۋدەگى شەشۋشى كەزەڭ. ءبىز ونىڭ ءوتۋىن تولىق قولدايمىز جانە ءاربىر ازامات ءوز ۇستانىمىن بىلدىرۋگە مۇمكىندىك الۋى ءتيىس دەپ سەنەمىز», دەدى ول.
جيىندا «قوعامدىق كەلىسىم» رمم جەتەكشى ساراپشىسى ەرجان يبراەۆ, باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ پروفەسسورى جاسقايرات ەرنازاروۆ, «جاستار قاناتى» بىرلەستىگىنىڭ جەتەكشىسى نۇربەك نۇرسەيتوۆ, ساياسي كەڭەس مۇشەسى مارينا بوگومولوۆا, كاسىپكەر بولات شاكيموۆ, م.وتەمىسوۆ اتىنداعى باتىس قازاقستان ۋنيۆەرسيتەتىنىڭ اعا وقىتۋشىسى تۇرار شايحيەۆ جانە كاسىپكەر ماكسيم پاك ءوز پىكىرلەرىن ءبىلدىردى.
باياندامالاردان كەيىن ساراپتامالىق پىكىر الماسۋ سەسسياسى ءوتىپ, قاتىسۋشىلار ۇسىنىستارىن ورتاعا سالدى. تالقىلاۋ بارىسىندا جاڭا كونستيتۋتسيانىڭ قۇقىق ۇستەمدىگىن نىعايتۋعا, ازاماتتاردىڭ شەشىم قابىلداۋ ۇدەرىسىنە قاتىسۋ مۇمكىندىگىن كەڭەيتۋگە جانە الەۋمەتتىك ادىلەتتىلىك قاعيداتتارىن ورنىقتىرۋعا باعىتتالعانى ايتىلدى.
فورۋم قورىتىندىسىندا قاتىسۋشىلار ءبىراۋىزدان جاڭا كونستيتۋتسيانى ەلدىڭ قاۋىپسىز, ادىلەتتى ءارى تۇراقتى دامۋىنىڭ بەرىك نەگىزى رەتىندە باعالاپ, الداعى رەفەرەندۋمدى قولدايتىندارىن مالىمدەدى. ساراپشىلاردىڭ پىكىرىنشە, جالپىحالىقتىق داۋىس بەرۋ – ستراتەگيالىق باعىتتى ايقىندايتىن ماڭىزدى كەزەڭ.
