تۋرنيردە قاراعاندى وبلىسىنىڭ نامىسىن شەت اۋدانى اقجال كەنتىنىڭ سپورتشىلارى قورعادى. مەيىر راحىمجان جوعارى دايىندىق دەڭگەيىن, مەرگەندىگىن جانە سابىرلىلىعىن كورسەتىپ, تارتىستى باسەكەدە ءبىرىنشى ورىندى يەلەندى.
جەڭىمپازدىڭ ايتۋىنشا, كوماندا جارىسقا ناقتى ماقساتپەن – بار مۇمكىندىكتى تولىق پايدالانىپ, وبلىس نامىسىن ابىرويمەن قورعاۋ ءۇشىن بارعان.
«جارىسقا ەلىمىزدىڭ ءار وڭىرىنەن مىقتى سپورتشىلار جينالدى. قاراعاندى وبلىسىنان تورتەۋ بولىپ قاتىسىپ, جەڭىسكە جەتۋدى ماقسات ەتتىك. قۋانتاتىنى – اسىق اتۋ بۇكىل رەسپۋبليكا بويىنشا قارقىندى دامىپ كەلەدى. بالا كۇنىمىزدە اۋلادا اسىق ويناپ جۇرەتىن ەدىك, ال بۇگىندە بۇل – كاسىبي سپورت تۇرىنە اينالدى. 2022 جىلى وبلىستىق جارىستا جەڭىمپاز اتانىپ, كەيىن قوستانايدا وتكەن رەسپۋبليكالىق تۋرنيرگە قاتىسىپ, جۇلدەلى ورىنعا يە بولدىم. وسى ناتيجەلەردىڭ ارقاسىندا سپورت شەبەرلىگىنە كانديدات ءنورماتيۆىن ورىندادىم», دەدى مەيىر راحىمجان.
سپورتشىنىڭ سوزىنشە, اسىق اتۋ دەنە توزىمدىلىگىن, مەرگەندىكتى, ەپتىلىكتى جانە جىلدام شەشىم قابىلداۋ قابىلەتىن دامىتادى. ويىن جوعارى شوعىرلانۋدى, بەلسەندى قيمىلدى جانە باسەكەلەستىك رۋحتى تالاپ ەتەدى. سوندىقتان بۇل سپورت ءتۇرى قازىرگى جاستار ءۇشىن ەرەكشە تارتىمدى.
