فوتو: ru.uefa.com
بۇل شەشىم بريۋسسەلدە وتكەن ۋەفا-نىڭ 50-ءشى كونگرەسىندە حابارلاندى. كونگرەسكە قازاقستان فۋتبول فەدەراتسياسىنىڭ باس حاتشىسى داۆيد لوريا قاتىستى.
ۋەفا كونگرەسى – ۇيىمنىڭ ەڭ جوعارى باسقارۋشى ورگانى. جىل سايىن وتەتىن كونگرەسكە 55 ۇلتتىق قاۋىمداستىقتىڭ وكىلدەرى جينالادى. ءىس-شارا اياسىندا ەۋروپاداعى فۋتبولدىڭ ستراتەگيالىق دامۋىن ايقىندايتىن نەگىزگى شەشىمدەر قابىلدانادى, قارجىلىق جانە ۇيىمداستىرۋشىلىق ماسەلەلەر بەكىتىلەدى, حالىقارالىق جارىستاردى وتكىزۋگە قاتىستى ماسەلەلەر قارالادى, سونداي-اق ۋەفا-نىڭ باسشى ورگاندارى سايلانادى.
ايتا كەتەيىك, 51-ءشى كونگرەسس سايلاۋ فورماتىندا وتەدى. استانادا ۋەفا پرەزيدەنتى مەن اتقارۋشى كوميتەت مۇشەلەرى سايلانادى. وسىلايشا, قازاقستاندا الداعى جىلدارى ەۋروپا فۋتبولىن دامىتۋ باعىتىن ايقىندايتىن شەشىمدەر قابىلدانادى.
كونگرەستى وتكىزۋ قۇقىعى ۇيىمعا مۇشە ەلدەرگە سەنىم ءبىلدىرۋ مەن ولاردىڭ فۋتبولدى دامىتۋعا قوسقان ۇلەسىن مويىنداۋ بەلگىسى رەتىندە بەرىلەدى. قازاقستاندا 51-ءشى كونگرەستىڭ ءوتۋى ەلىمىزدە بۇرىن-سوڭدى وتكەن ەڭ ءىرى حالىقارالىق فۋتبول جيىندارىنىڭ ءبىرى بولماق جانە ەلىمىزدىڭ ەۋروپالىق فۋتبول قاۋىمداستىعىنداعى پوزيتسياسىن نىعايتۋعا, سونداي-اق سپورت سالاسىنداعى حالىقارالىق ىنتىماقتاستىقتى كەڭەيتۋگە مۇمكىندىك بەرەدى.
ۋەفا كونگرەسىنىڭ قازاقستاندا ءوتۋى – وتاندىق فۋتبول ءۇشىن ماڭىزدى كەزەڭ. بۇل ەۋروپا فۋتبول قاۋىمداستىعى تاراپىنان جوعارى دەڭگەيدەگى سەنىمنىڭ ايقىن كورىنىسى.
كونگرەستى ۇيىمداستىرۋ جانە وتكىزۋ ۋەفا قاراجاتى ەسەبىنەن جۇزەگە اسىرىلادى. ياعني, بۇل جۇمىستارعا مەملەكەتتىك بيۋدجەتتەن قارجى جۇمسالمايدى جانە ەۋروپالىق فۋتبول ۇيىمىنىڭ حالىقارالىق ىنتىماقتاستىقتى دامىتۋعا قوسقان تىكەلەي ۇلەسى بولىپ ەسەپتەلەدى.
