ماجىلىستەگى Nur Otan پارتياسى فراكتسياسىنىڭ مۇشەلەرى ايدوس سارىم, سىرىم ادامباەۆ, ارتۋر پلاتونوۆ, بەكقالي تورعاەۆ جانە قانات نۇروۆ الماتى قالاسىنىڭ ناۋرىزباي اۋدانىنداعى Ala Estate شاعىن ونەركاسىپتىك پاركىنە بارىپ, پارتيانىڭ سايلاۋالدى باعدارلاماسىنىڭ ورىندالۋ بارىسىن قاداعالادى.
قالادا جۇمىس ىستەپ تۇرعان ونەركاسىپتىك بازالار نەگىزىندە ونەركاسىپتىك پاركتەر قۇرۋ جانە جاڭا وندىرىستىك ءۇي-جايلار سالۋ جول كارتاسىنا ەنگىزىلگەن. 300-گە جۋىق جوبانى جۇزەگە اسىرۋ الماتىلىقتار ءۇشىن 25 مىڭنان استام جۇمىس ورنىن اشۋعا مۇمكىندىك بەرەدى. بۇل ماقساتقا 18,2 ملرد تەڭگە ءبولىندى.
دەپۋتاتتار الماتىداعى شاعىن جانە ورتا بيزنەستى قولداۋعا باعىتتالعان ءىس-شارالاردى وڭ باعالادى. بيىل ناۋرىزباي, تۇركسىب جانە الاتاۋ اۋداندارىندا جوسپارلانعان 5 ونەركاسىپتىك پاركتىڭ 4-ءى جۇمىسقا كىرىسكەن.
ناۋرىزباي اۋدانىندا جيھاز, كونديتەرلىك جانە گالانتەرەيا بۇيىمدارىن, كەڭسە تاۋارلارىن, ماسكالار مەن ازىق-ت ۇلىك قاپتامالارىن شىعاراتىن 9 ءوندىرىس ورنى اشىلىپ, 120 تۇراقتى جۇمىس ورنى قۇرىلعان. كاسىپكەرلەر الاڭداردى جالعا الۋ بويىنشا ۇسىنىلعان شارتتارعا ريزا ەكەنىن جەتكىزىپ, بۇل قاجەتتى ءونىمدى شىعارۋدى ۋاقتىلى رەتتەۋگە مۇمكىندىك بەرەتىنىن ايتتى.
ءوز كەزەگىندە دەپۋتات بەكقالي تورعاەۆ جالاقىنىڭ تۇراقتى تۇردە تولەنۋى, جۇمىس ىستەۋ ءۇشىن جاسالعان جاعداي جانە اتالعان ونەركاسىپكە 2 %-دىق نەسيە بەرىلۋى شاعىن جانە ورتا بيزنەسكە باعىتتالعان مەملەكەتتىك قولداۋدىڭ كۇشەيگەنىن كورسەتەتىنىن ايتتى.
– بۇگىندە الماتى – ەلىمىزدىڭ ىسكەرلىك استاناسى, قازاقستاننىڭ ەكونوميكالىق دامۋىنىڭ ءىرى لوكوموتيۆى, ورتالىق ازيا ءوڭىرىنىڭ نەگىزگى كولىك-لوگيستيكالىق توراپتارىنىڭ ءبىرى. الەمنىڭ ۇزدىك مەگاپوليستەرىنىڭ قاتارىنا كىرۋگە دەگەن ۇمتىلىس جىلىنا كەمىندە 5% ەكونوميكالىق ءوسۋدى قامتاماسىز ەتۋدى تالاپ ەتەدى. بۇعان ەڭبەك ونىمدىلىگىن ارتتىرۋ ارقىلى عانا قول جەتكىزۋگە بولادى, – دەپ اتاپ ءوتتى ايدوس سارىم.
ماجىلىسمەندەر شاعىن جانە ورتا بيزنەستى دامىتۋ – Nur Otan پارتياسىنىڭ جانە قازاقستاننىڭ جاڭا ەكونوميكالىق باعىتىنىڭ نەگىزگى باسىمدىقتارىنىڭ ءبىرى ەكەنىن اتاپ ءوتتى. ەلىمىزدىڭ ءاربىر ءۇشىنشى كاسىپورىنى الماتىدا جۇمىس ىستەيدى, جۇمىسپەن قامتىلعان 10 ازاماتتىڭ 6-ى شاعىن جانە ورتا كاسىپكەرلىك سالاسىندا ەڭبەك ەتۋدە.
اقمولا وبلىسىنا ساپارى بارىسىندا دەپۋتات ەرلىك ومىرعالي قاراوزەك كەنتىنىڭ تۇرعىندارىمەن كەزدەستى. اۋىل تۇرعىندارى بۇل ەلدى مەكەننىڭ ىرگەسىندە ەل استاناسى بولعاندىقتان, بولاشاعى زور ەكەنىن ايتادى. ءبىلىم الىپ, وقۋلارىن بىتىرگەن جاستار دا تۋعان جەرگە ورالىپ, كاسىپ اشىپ, ەڭبەك ەتۋدە. اۋىلدا كوپتەگەن ينفراقۇرىلىم ساقتالعان. ورتا مەكتەپ, مادەنيەت ءۇيى جۇمىس ىستەپ تۇر. دەگەنمەن, اۋىلدا شەشىلمەگەن وزەكتى ماسەلەلەر دە بار.
– ءبىز تۇرعىنداردان بىلگەنىمىزدەي, مۇندا اۋىلعا قاتىنايتىن جول جوق, اۋىز سۋ تاپشىلىعى بار. مەديتسينالىق جانە پوليتسيا پۋنكتتەرىنىڭ جۇمىسىن جاقسارتۋ جايى دا كۇن تارتىبىندە تۇر. عالامتور جەلىسىن ورناتۋ دا كەرەك. وسى ماسەلەلەرگە قانىعىپ, اۋدان اكىمىمەن بىرلەسىپ شەشۋگە تىرىستىق. جول, سۋ جانە عالامتور ماسەلەلەرى اكىمدىكتىڭ قارجىلاندىرۋ ارناسى ارقىلى شەشىلەتىن بولدى. وبلىستىق دەنساۋلىق ساقتاۋ باسقارماسى مەديتسينالىق پۋنكتتى جاقىن ەلدى مەكەنگە ورنالاستىرۋدى ءوز باقىلاۋىنا الدى. ال پوليتسيا پۋنكتى وسى اۋىلدىڭ وزىنە كوشىرىلەدى. سەبەبى بۇل اۋىل وكرۋگتەگى ەلدى مەكەندەردىڭ ءدال ورتاسىندا ورنالاسقان. مەكتەپ عيماراتىنىڭ شاتىرىن جوندەۋ دە شەشىمىن تاباتىن بولدى, – دەدى ەرلىك ومىرعالي.
دەپۋتات بەرىك دۇيسەمبينوۆ قىزىلوردا وبلىسىنىڭ ارال, قازالى, جاڭاقورعان اۋداندارىنىڭ شالعاي ورنالاسقان بوگەن, جاڭاقۇرىلىس, شاكەن, اسقار, كوكتوبە اۋىلدارى مەن جاڭاقورعان كەنتىنە, كەيدەن اۋىل وكرۋگىنە بارىپ, اۋىل تۇرعىندارىمەن, كاسىپكەرلەرمەن, مالشىلارمەن جۇزدەسىپ, جەرگىلىكتى جەردەگى تۇيتكىلدى ماسەلەلەرگە نازار اۋداردى.
كەزدەسۋدە اۋىل تۇرعىندارى بيىلعى قۋاڭشىلىق, جايىلىمدىق, شابىندىق جەرلەردى سۋلاندىرۋ, ءتورت ت ۇلىك مالعا قاجەتتى جەمشوپ, جول ماسەلەسى قيىندىق تۋدىرىپ وتىرعانىن ايتتى.
ساپار بارىسىندا بەرىك دۇيسەمبينوۆ تايپاقكول, قاندىارال كولدەر جۇيەسى مەن باسقارما, كوكارال سۋ تورابىنىڭ قازىرگى جاعدايىمەن تانىستى.
ماجىلىسمەن يلياس بۋلاروۆ جامبىل وبلىسىنىڭ مەركى اۋدانىنداعى «بەرەكە داست» شارۋا قوجالىعىنىڭ الما باعىنا جانە «نۇرجان» شارۋا قوجالىعىنا باردى. كولەمى 20 گەكتارعا جەتەتىن الما باعى حالىق اراسىندا اسا سۇرانىسقا يە الما سورتتارىن وسىرۋدە.
سونىمەن قاتار دەپۋتات بالىق وسىرۋمەن اينالىساتىن قوجالىققا جانە كوكونىس ساقتاۋ قويماسىنا بارىپ, شارۋالاردىڭ جاي-كۇيىمەن تانىسىپ, ايتىلعان ۇسىنىس-پىكىرلەردى نازارعا الاتىنىن جەتكىزدى.
ءماجىلىس دەپۋتاتتارى قاينار اباسوۆ جانە سىرىم ەرتاەۆ تۇركىستان وبلىسىنىڭ كەنتاۋ قالاسىنا باردى. وندا ترانسفورماتور زاۋىتىنىڭ ۇجىمىمەن كەزدەسىپ, جۇمىسشىلاردىڭ ۇسىنىس-پىكىرلەرىن تىڭدادى.
كەزدەسۋ بارىسىندا «كەنتاۋ ترانسفورماتور زاۋىتى» اق-تىڭ باسقارما توراعاسى حايرۋللا قوجاباەۆ دەپۋتاتتارعا «جاڭا ستانوكتار مەن ماشينالار الۋعا مەملەكەتتەن جەڭىلدەتىلگەن نەسيە قاراستىرىلسا, مونوقالالاردى دامىتۋ باعدارلاماسى ارقىلى 1 پايىزدىق نەسيە بەرىلسە» دەگەن ۇسىنىسىن جەتكىزدى.
سونىمەن قاتار ءوندىرىس ورنىنىڭ جۇمىسشىلارى زاۋىتتاردا اۋىر جۇمىس ىستەيتىن ايەلدەردىڭ زەينەت جاسىن تومەندەتۋ تۋرالى تىلەكتەرىن ايتتى.
ءوز كەزەگىندە دەپۋتات ق.اباسوۆ اتالعان ۇسىنىستاردى نازارعا الاتىنىن جەتكىزىپ, زەينەت جاسىن تومەندەتۋ ماسەلەسى تەرەڭ ساراپتاۋدى قاجەت ەتەتىنىن, سايلاۋشىلاردىڭ تالاپتارى بويىنشا ىزدەنىپ, جۇمىس جۇرگىزەتىنىن مالىمدەدى.
– پارتيانىڭ سايلاۋالدى باعدارلاماسىن ورىنداۋ ارقىلى الداعى 5 جىلدا ەلىمىزدەگى بەلسەندى ەكسپورتتاۋشى كومپانيالار سانىن 400-دەن 1000-عا دەيىن ارتتىرۋ كوزدەلىپ وتىر. سونىمەن بىرگە شيكىزاتتىق ەمەس ەكسپورتتى 2,5 ەسە ارتتىرۋ جوسپارى بار. اۋىلداردى ارالاۋ بارىسىندا كاسىپكەرلەر تاراپىنان وسى باعىتتا ۇسىنىستار مەن وتىنىشتەر ءجيى ايتىلدى. اسىرەسە پاندەميا سالدارىنان جۇمىسى توقتاپ قالعان كاسىپورىندارعا مەملەكەتتىك قولداۋ اسا قاجەت. ءبىز كاسىپورىنداردى نەسيەلەندىرۋ بارىسىن جانداندىرۋ ءۇشىن ءتيىستى ۇسىنىستار جولدايمىز, – دەدى سىرىم ەرتاەۆ.
ءماجىلىس دەپۋتاتتارى وبلىستا قوعامدىق قابىلداۋلار وتكىزىپ, Nur Otan پارتياسىنىڭ سايلاۋالدى باعدارلاماسىن ىسكە اسىرۋ جونىندەگى جول كارتاسىنىڭ ورىندالۋ بارىسىن سارالادى.
