ەسكە سالا كەتسەك, 2011 جىلى تارازداعى تەررورلىق شابۋىل كەزىندە قازا تاپقانداردىڭ اراسىندا ۇقكد قىزمەتكەرلەرى مۇحتار حاليەۆ پەن سەرگەي كاسيانەنكو بار بولاتىن.
ولار ءدىني ەكسترەميستەرمەن بايلانىسى بار دەگەن كۇدىككە ىلىنگەن قىلمىسكەرگە سىرتقى باقىلاۋ جۇرگىزدى. تەرروريست ىزىنە تۇسكەن جەدەل-ىزدەستىرۋ باسقارماسى قىزمەتكەرلەرىنە شابۋىل جاسادى.
باتىرلاردىڭ ەسىمى ەندى ۇقكد عيماراتىنىڭ جانىنداعى الاڭدا ورنالاسقان ەسكەرتكىش-مونۋمەنتتە ماڭگى ساقتالماق.
ەسكەرتكىشتىڭ اشىلۋ سالتاناتىنا جامبىل وبلىسىنىڭ اكىمى بەردىبەك ساپارباەۆ, وبلىس پروكۋرورى نۇرعالىم ءابدىروۆ, ۇقكد باستىعى مارات يرمەنوۆ, پوليتسيا دەپارتامەنتىنىڭ باستىعى جانات سۇلەيمەنوۆ جانە قازا تاپقان قىزمەتكەرلەردىڭ جاقىن تۋىستارى قاتىستى.
ايماق باسشىسى ۇلتتىق قاۋىپسىزدىك كوميتەتىنىڭ قۇرىلعان كۇنى اشىلىپ وتىرعان باتىرلارعا ارنالعان ەسكەرتكىش-مونۋمەنتتىڭ ايرىقشا ماڭىزدىلىعىن اتاپ ءوتتى.
«تۋعان جەردەگى بەيبىتشىلىكتى, تۇراقتىلىقتى ساقتاۋ ءۇشىن ءوز ءومىرىن قيعان ۇقكد قىزمەتكەرلەرى – ەلى مەن حالقىنا شىنايى بەرىلگەن, شەكسىز ادالدىقتىڭ ۇلگىسى بولىپ قالا بەرمەك. وسكەلەڭ جاس ۇرپاق وسىنداي ازاماتتاردان ۇلگى الۋى ءتيىس وسى سكۆەردى اباتتاندىرعانى ءۇشىن ۇقكد باسشىلىعى مەن قىزمەتكەرلەرىنە العىسىمدى بىلدىرەمىن», دەدى بەردىبەك ساپارباەۆ.
شارا بارىسىندا قازا تاپقان قىزمەتكەر مۇحتار حاليەۆتىڭ اكەسى ەرمەكباي حاليەۆ تە ءسوز سويلەدى.
«اسپانىمىز ارقاشان اشىق, ەلىمىز بەيبىتشىلىكتە ءومىر ءسۇرسىن!», دەپ تىلەك ءبىلدىردى ەرمەكباي حاليەۆ.
