پورتال پايدالانۋشىلارى – مۇگەدەكتىگى بار ادامدار جانە الەۋمەتتىك قىزمەتتەردى كورسەتۋشىلەر ءۇشىن ورتالىق وپەراتورلارى اقپاراتتىق-كونسۋلتاتسيالىق قىزمەتتەردى مەملەكەتتىك جانە ورىس تىلدەرىندە ۇسىنادى. اتاپ ايتقاندا, بۇل پورتالدا كەڭەس الۋعا, تەحنيكالىق ماسەلەلەر بويىنشا سۇراقتارعا جاۋاپ الۋعا, پورتال فۋنكتسيالارىن جەتىلدىرۋ بويىنشا كەرى بايلانىس ورناتۋعا بولادى. بۇگىنگى تاڭدا بايلانىس ورتالىعىندا 3 اناليتيك جانە 5 وپەراتور جۇمىس ىستەيدى, تاعى ۇشەۋى ارنايى وقۋدان ءوتىپ جاتىر.
سونداي-اق Facebook الەۋمەتتىك جەلىسىندە, Telegram مەسسەندجەرلەرىندە جانە Whatsاpp پايدالانۋشىلارىنا كەڭەس بەرۋ ءۇشىن چات-بوتتى ىسكە قوسۋ جوسپارلانىپ وتىر. بۇعان قوسا اۆتوماتتاندىرىلعان داۋىستىق روبوتتى ەنگىزۋ جۇمىستارى جۇرگىزىلۋدە. بۇل كونسۋلتاتسيالار قولجەتىمدىلىگىنىڭ جوعارى دەڭگەيىن قامتاماسىز ەتۋگە, جاۋاپ بەرىلمەي قالعان قوڭىراۋلار سانىن ازايتۋعا جانە ماسەلە شەشىلگەنگە دەيىن كۇتۋ ۋاقىتىن ازايتۋعا مۇمكىندىك بەرەدى.
جالپى, الەۋمەتتىك قىزمەتتەر پورتالى مۇگەدەكتىگى بار ادامدارعا تىكەلەي جەتكىزۋشىلەردەن وڭالتۋ قۇرالدارى مەن قىزمەتتەرىن ءوز بەتىنشە ساتىپ الۋ مۇمكىندىگىن بەرۋ ءۇشىن 2020 جىلى ىسكە قوسىلدى. وسى جىلدىڭ باسىنان باستاپ 113 مىڭنان اسا مۇگەدەكتىگى بار ادام پورتال ارقىلى وڭالتۋدىڭ تەحنيكالىق قۇرالدارىن, ىمداۋ ءتىلىنىڭ 6 مىڭنان اسا قىزمەتىن, جەكە كومەكشىنىڭ 31 مىڭنان اسا قىزمەتىن, 36 مىڭعا جۋىق ساناتورلىق-كۋرورتتىق ەمدەۋ قىزمەتىن الدى جانە 122 مىڭنان اسا ادام كەپىلدىك بەرىلگەن الەۋمەتتىك توپتامالارعا تاپسىرىس جاسادى.
«ەگەمەن-اقپارات»
