«تەاتر – ارتىستەر مەن كورەرمەن قاۋىم اراسىنداعى قۋات الماسۋ ءۇردىسى عوي. ءونەردىڭ باستى مۇراتى – تۇسىنىكتى, ۇعىنىقتى بولۋ, كورەرمەن ءىلتيپاتىنا بولەنۋ. گاسترول جوعارى دەڭگەيدە وتكەنىن اتاپ وتكىم كەلەدى. كوكشەتاۋلىق كورەرمەن سپەكتاكلدەردى جىلى قابىلداپ, ارتىستەرگە قوشەمەتىن ءبىلدىرىپ جاتتى», - دەپ اتاپ ءوتتى تەاتر ديرەكتورى الەكساندر سوۆوستيانوۆ.
تەاترىمىزدى ايگىلەپ تۇرعان « ۇلى دالا مۇراسى» باعدارلاماسى بالەتمەيستەرلەر ايگۇل ءتاتي, مۋكارام اۆاحري, انۆارا سادىقوۆالاردىڭ – قازاقستاننىڭ زاماناۋي جانە ۇلتتىق حورەوگرافيا ونەرىنىڭ ۇزدىك ۇلگىلەرىنەن قۇرالعان اۆتورلىق ينتەرپرەتاتسياسى. كوكەيگە قونار مۋزىكا مەن قايتالانباس كوركەم بەينەلەر دۇنيەجۇزىنىڭ كورەرمەنىن تامساندىرىپ, جۇرەگىن الديلەگەن. ءبيدىڭ ءار قيمىلى – اسەمدىك, نازىكتىك, سان-قىرلىلىق, ۇلىلىقتىڭ ۇلگىسىندەي.
«استانا بالەت» تەاترىنىڭ باس بالەتمەيستەرى مۋكارام ءاۆاحريدىڭ ايتۋىنشا, « ۇلى دالا مۇراسى» باعدارلاماسى تەاتردىڭ قازاقستان مەن شەت ەلدەردەگى بارلىق گاسترولدەرىندە مىندەتتى تۇردە كورسەتىلەدى. كورەرمەن قاۋىم دا ونى زور ىقىلاسپەن قابىلدايدى. بۇل – قازاق فولكلورى مەن زاماناۋي جانە نەوكلاسسيكالىق بالەتتىڭ سينتەزى ىسپەتتى دۇنيە.
ەكىنشى بولىمدە برازيليالىق حورەوگراف ريكاردو امارانتە قويعان «A Fuego Lento» («باياۋ جالىن»)بالەتى كورسەتىلدى. كوستيۋمدەرىندە مينيماليزم باسىم, ەموتسيالارى بارىنشا اشىق, ال, ەڭ باستىسى – ارتىستەردىڭ ورىنداۋشىلىق شەبەرلىگى. سەزىم مەن كوڭىل-كۇيدىڭ سان قاتپارىن جەتكىزە بىلگەن ارتىستەر, كورەرمەن قاۋىم ءۇشىن تىڭ بەينەلەر مەن جاڭا بەلەستەردى اشقان ءتارىزدى.
تەاتر بۇعان دەيىن دە كوكشەتاۋدا ونەر كورسەتكەن بولاتىن. 2017 جىلى «كوكشەتاۋ» مادەنيەت سارايىندا «استانا بالەت GALA» كونتسەرتتىك باعدارلاماسى پاش ەتىلدى.
«استانا بالەت» تەاترىنىڭ ۇجىمى دارىندى ارتىستەر, قازاقستاننىڭ ەڭبەك سىڭىرگەن قايراتكەرلەرى مەن حالىقارالىق بايقاۋلاردىڭ جۇلدەگەرلەرىنەن جاساقتالعان. ولار ەلىمىزدىڭ مادەني مۇراسىن ساقتاپ, ودان ءارى دامىتۋعا كۇش سالىپ كەلەدى. بيشىلەردىڭ ءار قيمىلى مەن يشاراسى – بالەتتىڭ عاجايىپ ءتىلى. سونىڭ قۇدىرەتىمەن الەمنىڭ تۇكپىر-تۇكپىرىندەگى كورەرمەن كوڭىلىنىڭ كىلتىن تاۋىپ, جۇرەگىن تەربەتەدى.
