ەندى جابىق جاعاجايلار مەن اكۆاپاركتەردىڭ, ونىڭ ىشىندە باسسەيندەردىڭ; قالالىق جاعاجايلاردىڭ, ونىڭ ىشىندە رۇقسات ەتىلمەگەن جانە اشىق اۋاداعى اكۆاپاركتەردىڭ; سەرۋەندەۋگە ارنالعان سۋ كولىكتەرىنىڭ (تەپلوحودتار, كاتەرلەر, قايىقتار, كاتاماراندار, سۋ موتوتسيكلدەرى جانە ت.ب.), كينوتەاترلاردىڭ جۇمىسىنا تىيىم سالىنادى.
تۇنگى كلۋبتارعا «Ashyq» جوباسى اياسىندا جۇمىس ىستەۋگە رۇقسات ەتىلمەگەن. ال ەندى تۇنگى كلۋبتاردىڭ جۇمىس ىستەۋىنە تولىقتاي تىيىم سالىنادى. «Ashyq»-سىز جۇمىس ىستەيتىن جازعى تاماقتانۋ ورىندارىنىڭ جۇمىسى دەمالىس كۇندەرى توقتاتىلادى.
سونداي-اق جەكسەنبى كۇندەرى قوعامدىق كولىكتىڭ جۇمىسى توقتاتىلادى. اۆتوبۋستارعا دەزينفەكتسيا جۇرگىزىلەدى.
بۇدان بولەك قوعامدىق تاماقتانۋ نىساندارى ءۇشىن جۇمىس ۋاقىتى («Ashyq» جوباسىنسىز جۇمىس ىستەيتىن) ورنالاسقان جەرىنە قاراماستان مەيرامحانا, كافە جانە كوفەحانالار جۇمىس كۇندەرى ساعات 07:00-دەن 20:00-گە دەيىن جۇمىس ىستەيدى. ال سەنبى جانە جەكسەنبى كۇندەرى جۇمىس ىستەۋىنە تىيىم سالىنادى. سونداي-اق اشىق اۋادا (جازعى ورىندار) ىستەيتىن تاماقتانۋ ورىندارى جۇمىس كۇندەرى ساعات 07:00-دەن 22:00-گە دەيىن جۇرتشىلىقتى قابىلداسا, سەنبى جانە جەكسەنبى كۇندەرى جۇمىس ىستەۋىنە تىيىم سالىنادى. ال تاماقتى جەتكىزۋ, وزىمەن بىرگە الىپ كەتۋ شتاتتىق رەجيمدە جۇرەدى.
«Ashyq» جوباسىنا قاتىساتىن قوعامدىق تاماقتانۋ نىساندارى ءۇشىن دۇيسەنبى-جۇما كۇندەرى مەكەمە ىشىندە 07:00-دەن 22:00-گە دەيىن جۇمىس ىستەۋىنە رۇقسات ەتىلسە, سەنبى مەن جەكسەنبى كۇندەرى عيمارات ىشىندە جۇمىس ىستەۋىنە تىيىم سالىنادى. ال اشىق اۋادا اپتانىڭ بارلىق كۇنىندە 07:00-دەن 00:00-گە دەيىنگى رەجيم بەلگىلەۋ جوسپارلانىپ وتىر.
ەگەر مەيرامحانالاردا/كافەلەردە نەمەسە وزگە دە مەكەمەلەردە مەرەكەلىك ءىس-شارالار, جيىن-تويلار وتكىزىلسە, نىساننىڭ جۇمىسى بىردەن توقتاتىلادى.
قالادا كارانتيندىك قاتاڭ نورمالاردى ەنگىزبەس ءۇشىن ۇجىمدىق يممۋنيتەت دامۋى قاجەت. ال ۇجىمدىق يممۋنيتەتتىڭ ۇلەسى 60%-دان اسۋى ءتيىس. قازىرگى ۋاقىتتا قالادا ۆاكتسينانىڭ ءبىرىنشى كومپونەنتىن 270 مىڭنان استام ادام الدى.
