قالا اكىمى مۇرات ايتەنوۆ ونلاين فورماتتا وتكەن جاڭا ءوندىرىس ورىندارىنىڭ اشىلۋ راسىمىنە قاتىستى. قالا باسشىسى شاھاردىڭ ەكونوميكالىق الەۋەتىن ارتتىرۋعا قوسىپ وتىرعان ۇلەستەرى ءۇشىن كاسىپكەرلەرگە ريزاشىلىعىن بىلدىرە وتىرىپ, جاڭا كاسىپورىنداردىڭ ەڭبەك ۇجىمدارىنا تابىستار تىلەدى.
ىسكە اسقان جوبالار ەل تاۋەلسىزدىگىن نىعايتۋعا ۇلەس قوسىپ, شىمكەنت قالاسىنىڭ ەلورداعا جاساعان مەرەكەلىك تارتۋى سانالادى.
جاڭا ءوندىرىس جەلىلەرىن ىسكە قوسۋعا 6,2 ملرد. تەڭگە ينۆەستيتسيا تارتىلدى. كاسىپورىنداردا 344 جاڭا جۇمىس ورىندارى اشىلىپ وتىر.
ىسكە قوسىلعان كاسىپورىنداردىڭ ىشىندە 6 جوبا يندۋستريالدى ءوندىرىس ورىندارى بولىپ تابىلادى. ولاردىڭ ىشىندە مەتالل جانە تەمىر بۇيىمدارى, كورپۋستىق جيھاز, اۆتوموبيل شىنىلارى, حالىق تۇتىناتىن تاۋارلار, جەڭىل ونەركاسىپ جوبالارى ىسكە استى.
اۋىل شارۋاشىلىعى سالاسىندا 5 جوبا جۇمىسىن باستادى. اگرارلىق سالادا جىلىجاي شارۋاشىلىعى ىسكە قوسىلسا, مال شارۋاشىلىعىندا ىرىمشىك جانە ءسۇت ونىمدەرى, مينەرالدى سۋ تسەحتارى, تاۋارلى ءسۇت فەرماسى, مال شارۋاشىلىعى جوبالارى جۇزەگە استى.
ايتا كەتۋ كەرەك, قازىرگى كەزدە شىمكەنت قالاسىنىڭ ونەركاسىپ سالاسىندا 700-دەن استام كاسىپورىن بەلسەندى تۇردە قىزمەت اتقارادى.
ونەركاسىپ سالاسىنىڭ ۇلەسى جالپى وڭىرلىك ءونىم كولەمىنىڭ تورتتەن ءبىرىن قۇرايدى. بىلتىرعى جىلدىڭ قورىتىندىسىمەن قالانىڭ ونەركاسىپ سالاسىندا 654,2 ملرد. تەڭگەنىڭ ءونىمى وندىرىلگەن.
تاۋەلسىزدىك جىلدارى ىشىندە شىمكەنت قالاسىنىڭ ەكونوميكاسىنا 2,5 ترلن. تەڭگەنىڭ ينۆەستيتسياسى تارتىلسا, شەت ەلدىك ينۆەستورلاردىڭ قاتىسۋىمەن 2,3 ملرد. اقش دوللارىن قۇرايتىن 17 جوبا جۇزەگە استى.
