«استانا وپەرا» تەاترىنىڭ ديرەكتورى قازاقستاننىڭ ەڭبەك سىڭىرگەن قايراتكەرى عالىم احمەدياروۆ وپەرا اكادەمياسىن اشۋدىڭ ماڭىزىن اتاپ ءوتتى. ونىڭ ايتۋىنشا, الەمدە كوپتەگەن ايگىلى تەاتردىڭ وزىندىك وپەرا اكادەمياسى بار. وندا جاس ۆوكاليستەرگە كاسىبي تۇرعىدان جەتىلۋگە مۇمكىندىك بەرىلەدى ءارى ۇلكەن ساحنادا جۇمىس جاساۋعا دايىندايدى.
«بۇگىندە قازاقستاندا كاسىبي ۆوكال مەكتەپتەرى بار, ول جەردە وپەرالىق ءان ايتۋ ونەرىن ۇيرەتەدى. ءبىزدىڭ اكادەميامىزدىڭ بىرەگەيلىگى – كونكۋرستىق تىڭداۋ ناتيجەلەرى بويىنشا اكادەمياعا تۇسكەن جاس ارتىستەر ۆوكالدان ساباق الۋدان بولەك, ەكى جىل بويى ءتۇرلى پاندەردى وقيدى. بۇدان بولەك, جاس ۆوكاليستەردىڭ بولاشاعى جارقىن: الەمنىڭ تانىمال انشىلەرى مەن ءوز قىزمەتىنىڭ اياسىندا مول تاجىريبەسى بار تالىمگەر ۇستازداردى شەبەرلىك ساباعىن وتكىزۋگە شاقىرامىز. دەمەك ءبىر مەزەتتە ءوز بەيىنىنىڭ ءتۇرلى سالالارىندا كاسىبي ءوسۋ مۇمكىندىگىنە يە بولادى», دەيدى ول.
تەاتر ديرەكتورى ءبىلىم بەرۋ باعدارلاماسىنا شەت ءتىلىن ۇيرەنۋ, ساحنالىق قيمىل-قوزعالىس پەن اكتەرلىك شەبەرلىك ەنگىزىلەتنىن ايتتى. سەبەبى كلاسسيكالىق رەپەرتۋاردىڭ ايتارلىقتاي بولىگى يتاليان تىلدە جازىلعان.
سونداي-اق, جاس ارتىستەر تەاتر قويىلىمدارىنا قاتىسىپ, ءرول سومداي الادى. «استانا وپەرا» كامەرالىق زالى ساحناسىندا ءتۇرلى كونتسەرت ۇيىمداستىرۋ دا قاراستىرىلعان. Astana Opera حالىقارالىق وپەرا اكادەمياسى –جوعارى بىلىكتى مامانداردان ءبىلىم الا وتىرىپ, جاس وپەرا انشىلەرىنە شەبەرلىك دەڭگەيىن ارتتىرۋعا مۇمكىندىك بەرەتىن باعدارلاما.
تەاتر ءباسپاسوز قىزمەتىنىڭ حابارلاۋىنشا, ۆوكال اكادەمياسىنىڭ سالتاناتتى اشىلۋى 4 شىلدە كۇنى «استانا وپەرا» تەاترىنىڭ ۇلكەن زالىندا وتەدى.
سپيكەردىڭ ايتۋىنشا, اشىلۋ سالتاناتىنا مارياندجەلا سيتسيليا, ماەسترو دجۋزەپپە اكۋاۆيۆا, ريككاردو دەللا شۋككا, ماتتيا روسسي (يتاليا), ليبۋشە سانتوريسوۆا (چەحيا-يتاليا), بادرال چۋلۋنبااتار (موڭعوليا), سايان يسين (قىرعىزستان) سياقتى جۇلدىزداردى شاقىرىلعان. سونداي-اق قازىر گەرمانيانىڭ وپەرا تەاترلارىندا ونەر كورسەتىپ جۇرگەن باۋىرجان اندەرجانوۆ تە قاتىسادى. قازاقستاندىق جۇلدىزدار – يتاليا جۇلدىزى وردەنىنىڭ يەگەرى مەدەت چوتاباەۆ, قازاقستاننىڭ ەڭبەك سىڭىرگەن قايراتكەرى, كوپتەگەن شەتەلدىك بايقاۋلاردىڭ لاۋرەاتى جۇپار عابدۋللينا, باريتون تالعات مۇساباەۆ, «بولشايا وپەرا» تەلەۆيزيالىق جوباسىنىڭ جەڭىمپازى سالتانات احمەتوۆا, ايگۇل نيازوۆ, ازامات جىلتىركوزوۆ جانە قازاقستاندىق وپەرا ساحناسىنىڭ تانىمال تۇلعالارى ونەرىن تىڭدارمانعا پاش ەتەدى. سونىمەن بىرگە كونتسەرتكە «استانا وپەرا» سيمفونيالىق وركەسترى, حورى جانە بالەتى قاتىسادى.
