فورۋم اياسىندا حالىقارالىق بەيبىتشىلىك پەن قاۋىپسىزدىك ماسەلەلەرى بويىنشا كۇن ءتارتىبىن ىلگەرىلەتۋ, سونداي-اق ايەلدەردىڭ قوعامدىق ومىرگە ءتيىمدى قاتىسۋى مەن شەشىم قابىلداۋى تاقىرىبىندا «ايەلدەر, بەيبىتشىلىك جانە قاۋىپسىزدىك» سەسسياسى ءوتتى.
ءىس-شاراعا بىرىككەن ۇلتتار ۇيىمى باس حاتشىسىنىڭ ارنايى وكىلى, ورتالىق ازيا ءۇشىن الدىن الۋ ديپلوماتياسى جونىندەگى بۇۇ وڭىرلىك ورتالىعىنىڭ باسشىسى ناتاليا گەرمان, اقش مەملەكەتتىك حاتشىسىنىڭ ايەلدەردىڭ جاھاندىق ماسەلەلەرى جونىندەگى كەڭسەسى باسشىسىنىڭ مىندەتىن اتقارۋشىسى كاترينا فوتوۆات, قازاقستاننىڭ جەنەۆاداعى بۇۇ بولىمشەسى جانە باسقا دا حالىقارالىق ۇيىمدار جانىنداعى تۇراقتى وكىلى جوعارى مارتەبەلى جانار ايتجانوۆا, «اقش–قازاقستان ايەلدەر اليانسى» قورىنىڭ نەگىزىن قالاۋشى» ايانات كسەنباي قاتىستى.
سەسسيا بارىسىندا سپيكەرلەر «ايەلدەر, بەيبىتشىلىك جانە قاۋىپسىزدىك» جاھاندىق كۇن ءتارتىبىن, ونىڭ ىشىندە ايەلدەردىڭ ءرولى جانە ولاردىڭ بەيبىتشىلىك, تۇراقتىلىق پەن دامۋعا بايلانىستى شەشىمدەر قابىلداۋ پروتسەستەرىنە اسەرىن تالقىلادى.
قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى قايرات كەلىمبەتوۆ گەندەرلىك تەڭدىك ساياساتىندا ۇيلەسىمدىلىكتىڭ ماڭىزدىلىعىن اتاپ ءوتتى.
«سونىمەن قاتار, «ايەلدەر, بەيبىتشىلىك جانە قاۋىپسىزدىك» كۇن ءتارتىبى ايماقتىق بەيبىتشىلىك پەن قاۋىپسىزدىكتى قامتاماسىز ەتۋ دە ماڭىزدى. COVID-19 پاندەمياسىنان كەيىن ايەلدەردىڭ ادىلەتتى ەكونوميكالىق ءوسۋ مەن ورنىقتى دامۋدى قامتاماسىز ەتۋدەگى ءرولىن ءتۇسىنۋ جانە ايەلدەرگە الەمدىك دەڭگەيدە مۇمكىندىكتەر بەرۋ ساياساتىن ازىرلەۋدى جالعاستىرۋ قاجەت», دەدى قايرات كەلىمبەتوۆ.
بىرىككەن ۇلتتار ۇيىمى باس حاتشىسىنىڭ ارنايى وكىلى ناتاليا گەرمان 2020 جىلعى جەلتوقساندا قۇرىلعان كورنەكتى ساياساتكەر ايەلدەرىنىڭ قاتىسۋىمەن ورتالىق ازيا ەلدەرىنىڭ كوشباسشى ايەلدەر ديالوگىنىڭ ماڭىزدىلىعىن نازاردان تىس ەتپەدى.
«ورتالىق ازيا ەلدەرىنىڭ كوشباسشى ايەلدەر ديالوگى - ورتالىق ازياداعى ايەلدەر كوشباسشىلارى اراسىنداعى ىنتىماقتاستىقتىڭ ەرەكشە ۇلگىسى. پلاتفورما تەك «ايەلدەر, بەيبىتشىلىك جانە قاۋىپسىزدىك» كۇن ءتارتىبىن العا جىلجىتۋدا عانا ەمەس, سونىمەن قاتار جالپى ايماقتاعى تۇراقتىلىق پەن قاۋىپسىزدىكتى ساقتاۋدا ماڭىزدى قۇرال بولا الادى», دەدى ناتاليا گەرمان.
