«الەم حالىقتارى جاھاندانۋ پروتسەسىنىڭ قارقىندى جۇرۋىنە بايلانىستى وزدەرىنىڭ ۇلتتىق رۋحاني-مادەني قۇندىلىقتارىن جانداندىرۋ باعىتىندا ءتۇرلى شارالاردى جۇزەگە اسىرۋدا. «مەن قازاقشا سويلەيمىن» رەسپۋبليكالىق اكتسياسىنىڭ وزەكتىلىگى دە وسى مىندەتتەرمەن ۇيلەسەدى. بۇگىنگىدەي شارالاردىڭ نەگىزىندە مەملەكەتتىك ءتىلدىڭ الەۋمەتتىك مارتەبەسىن جوعارىلاتۋ, مەملەكەتتىك ءتىلدى رۋحاني-مادەني قۇندىلىق رەتىندە دارىپتەۋ اسا ماڭىزدى», دەدى تىل ساياساتى كوميتەتىنىڭ توراعاسى ادىلبەك قابا.
قازاقستان رەسپۋبليكاسى تاۋەلسىزدىگىنىڭ 30 جىلدىعى اياسىندا وتكىزىلگەن بۇل اكتسياعا 14 ەتنوستان 213 ادام قاتىسىپ قازاقتىڭ بەلگىلى اقىندارىنىڭ تۋعان ەل, تۋعان جەر تاقىرىبىنداعى جىر جاۋھارلارىنان ۇزىندىلەردى مانەرلەپ جاتقا وقىدى.
قاتىسۋشىلاردىڭ ىشىندە ورىس ۇلتىنىڭ وكىلدەرى باسىم – 68 قاتىسۋشى. ودان وزگە وزبەك, تۇرىك, ءازىربايجان اعايىنداردىڭ بەلسەندىلىكتەرى جوعارى بولدى.
شاراعا قاتىسۋشىلاردىڭ باسىم كوپشىلىگى شىمكەنت قالاسى, جامبىل, اقمولا, قاراعاندى, پاۆلودار وبلىستارىنان.
جىل ساناپ ءتىلدىڭ مايىن تامىزىپ, قازاق تىلىندە ناقىشىنا كەلتىرىپ جىر وقيتىن ءوز ۇلت وكىلدەرىنىڭ قاتارى كوبەيىپ كەلەدى. اسىرەسە ولاردىڭ قازاق ءتىلىن ۇيرەنۋگە دەگەن قۇلشىنىسى قۋانتادى.
جان-جاقتى ساراپتاۋ ناتيجەسىندە كەلەسى جۇلدەرى ورىندارعا لايىقتىلار انىقتالدى: باس جۇلدەنى جامبىل وبلىسىنىڭ وكىلى ايانا كيم فاريزا وڭعارسىنوۆانىڭ «تۋعان جەر» شىعارماسىن مانەرلەپ جاتقا وقىعانى ءۇشىن يەلەندى. ال ءبىرىنشى ورىن سابينا سىحۋروۆاعا, ەكىنشى ورىن انورا يۋنۋسوۆاعا بۇيىرىپ, ءۇشىنشى ورىندى ديلرابو حيكماتتۋللاەۆا مەن دميتري ريابوكون جەڭىپ الدى.
ىنتالاندىرۋ ديپلومىمەن جامبىل وبلىسىنىڭ ساڭلاقتارى كارينا داكاي, الينا اليەۆا, ماليكا بەشلى-وگلى, تاتيانا زايتسەۆا, شىمكەنت قالاسىنىڭ تۇرعىنى سابينا ابدۋجاپباروۆا, تۇركىستان وبلىسىنىڭ تۋمالارى ديارا باتىرالي مەن زارينا گۋلمامەدوۆا, سولتۇستىك قازاقستان وبلىسىنان نيكولاي كاينوۆ پەن رومان جولۋدەۆ, الماتى وبلىسىنان ۆيكتوريا گالۋزينسكايا ماراپاتتالدى.
شاكىرتتەرىن باپتاعان قازاق ءتىلى مۇعالىمدەرىنىڭ ەڭبەكتەرى دە ەسكەرۋسىز قالعان جوق, ولار ءتىل ساياساتى كوميتەتى توراعاسىنىڭ العىسحاتىمەن ماراپاتتالدى.
ەستەرىڭىزگە سالا كەتەيىك, اكتسيانىڭ 5-8 سىنىپ وقۋشىلارى اراسىندا وتكەن ءى كەزەڭىنە 22 ەتنوس وكىلىنەن تۇراتىن 326 ادام قاتىسسا, سونىڭ 214-ءى ورىس ۇلتىنىڭ وكىلدەرى بولاتىن.
كەلەسى كەزەڭدەر جوعارى وقۋ ورىندارىنىڭ ستۋدەنتتەرى مەن ەرەسەك تۇرعىندار (5 شىلدە – 5 تامىز ارالىعىندا) جانە قۇقىق قورعاۋ, ىشكى ىستەر ورگاندارىنىڭ قىزمەتكەرلەرى اراسىندا (6 تامىز – 6 قىركۇيەك) وتەدى.
