اۋىل • 02 شىلدە، 2021

سولتۇستىكتە شارۋالار جايىلىم جەر تاپپاي ءجۇر

سولتۇستىك قازاقستان وبلىسىنداعى اۋىلداردىڭ بىرىندە جايىلىمداردىڭ تاپشىلىعىنان تۇرعىندار مالدى جاپپاي جويۋعا ءماجبۇر، دەپ حابارلايدى Egemen.kz.

بوتاكوز باقبەرگەن

جايىلىمداردىڭ جوقتىعىنان بەرەزوۆكا اۋىلىنداعى ءىرى قارا مال سانى بىرنەشە ەسە ازايعان. اۋىل تۇرعىندارىنىڭ ايتۋىنشا، بۇل ماسەلە جەرگىلىكتى كاسىپورىندار جەردى ءوز قاراماعىنا العانىنان كەيىن تۋىنداعان.

اۋىل شارۋاشىلىعى باسقارماسى دا وڭىردەگى اۋىلداردىڭ جارتىسىندا جايىلىم تاپشىلىعى بار ەكەنىن ايتادى. بەرەزوۆكا اۋىلىندا شامامەن بەس ءجۇز گەكتار جەر جەتىسپەيدى.

بىرنەشە جىل بۇرىن بەرەزوۆكادا جاس مالدى ەسەپتەمەگەندە 200-گە جۋىق ءىرى قارا مال بولعان. قازىر 30-عا جۋىق سيىر قالىپتى.

«مەنىڭ 10 باس جىلقىم بار، ولاردى اۋىلدان 300 كم جەرگە الىپ كەتتىم. سەبەبى، جاقىن جەردە جايىلىم جوق. بارلىعى جىرتىلعان. جىلقىلارعا قىستا قانداي جەم-ءشوپ بەرەتىنىمدى بىلمەيمىن»، دەدى جەرگىلىكتى تۇرعىن شارنياس رۇستەنوۆ.

بۇگىندە بەرەزوۆكا اۋىلىندا بەس ءجۇز تۇرعىن بار. ماكسيم يششۋك پەتروپاۆلدان اۋىلعا كوشىپ، مال شارۋاشىلىعىن دامىتۋدى جوسپارلاعانداردىڭ ءبىرى. بىراق جايىلىمداردىڭ تاپشىلىعى فەرمەردىڭ جوسپارلارىنا كەدەرگى كەلتىرۋدە.

ء«بىر جاعىنان اسكەري پوليگون بولسا، ەكىنشى جاعىنان القاپتار ەگىننەن بوس ەمەس. سيىر-بۇزاۋ باعاتىن ورىن مۇلدەم جوق. قويلاردى مامليۋت اۋدانىنا اپارۋعا تۋرا كەلدى. ءسۇت ساۋىلىمى 2 ەسە تومەندەدى، سيىرلار سالماعىن جوعالتتى. اۋىل شارۋاشىلىعىن دامىتۋ ءۇشىن نەسيە العىم كەلگەن. ەندى ونى نە ءۇشىن الاتىنىمدى دا بىلمەي تۇرمىن»، دەدى ماكسيم يششۋك.

شەنەۋنىكتەر ايماقتاعى جايىلىم تاپشىلىعى فەرمەرلەردىڭ جاپپاي ەگىن ەگۋگە شەشىم قابىلداۋىنان تۋىنداعانىن ايتادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز