– اقشالاي ۇتىستى وتكىزۋدەگى ماقسات – تۇرعىنداردى ۆاكتسينا الۋعا ىنتالاندىرۋ. سول ۇتىس ويىنىنىڭ جۇلدە قورىنا 40 ملن تەڭگە سالىندى. ونىڭ 10 ملن تەڭگەسى باس جۇلدەگە بەرىلەدى. ۇتىس ويىنى 30 ماۋسىمدا باستالدى. ەندى ءار ون كۇن سايىن 200 مىڭ تەڭگەلىك 10 سەرتيفيكات ويناتىلادى. بۇل 30 قىركۇيەككە دەيىن جالعاسادى. تامىز ايىندا 30 ماۋسىم-31 شىلدە ارالىعىندا ۆاكتسينا العاندار ءۇشىن 3 ملن تەڭگە كولەمىندەگى ەكى سەرتيفيكات ۇتىسقا شىعارىلادى. ال قىركۇيەكتە 1-31 تامىزدا ەكپە العاندار ءۇشىن تاعى 3 ملن تەڭگەنىڭ ەكى سەرتيفيكاتىن ويناتۋدى كوزدەدىك. قازان ايىندا باس جۇلدە – 10 ملن تەڭگەنى ۇتۋ ءۇشىن 1 اقپان-30 قىركۇيەك ارالىعىندا ۆاكتسينانىڭ ءبىرىنشى نەمەسە ەكىنشى كومپونەنتىن سالدىرعان تۇرعىندار قاتىسادى, – دەيدى «ازاماتتىق اليانس» زتب توراعاسى الىبەك سەمعاليەۆ.
ونىڭ ايتۋىنا قاراعاندا, جەڭىمپازدار اتىراۋ وبلىستىق «ازاماتتىق اليانس» زتب-نىڭ الەۋمەتتىك جەلىسىندەگى تىكەلەي ەفيرىندە انىقتالادى. جەڭىمپازداردى انىقتاۋعا اتالعان اكتسيانىڭ اشىقتىعىن قامتاماسىز ەتۋ ءۇشىن ۇكىمەتتىك ەمەس ۇيىمداردىڭ وكىلدەرى, بلوگەرلەر مەن قوعام بەلسەندىلەرى تارتىلماق.
ال ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ باسشىلىعى دا ۆاكتسينا العان وقىتۋشىلار مەن ستۋدەنتتەردى ىنتالاندىرۋعا نيەت تانىتىپ وتىر. ناقتىلاي ايتقاندا, كوروناۆيرۋس ينفەكتسياسىنا قارسى ەكپە العان قىزمەتكەرلەر مەن پروفەسسورلىق-وقىتۋشىلىق قۇرام اراسىندا 30 000 تەڭگەنىڭ بىرجولعى اقشالاي سىيلىعىن, سونداي-اق ستۋدەنتتەر ۇيىندەگى باسسەينگە بارۋعا 50 پايىزدىق جەڭىلدىكتى ۇسىنۋ كوزدەلىپتى. ال ۆاكتسينا العان ستۋدەنتتەر اراسىندا 30 تۋريستىك جولداما مەن ءۇش نوۋتبۋك ويناتىلادى. ستۋدەنتتەرگە وقۋ اقىسىن تولەۋ كەزىندە 30, 50, 100 پايىزدىق جەڭىلدىك الۋعا, اعىلشىن ءتىلىن وقىتۋ كۋرسىنا تەگىن قاتىسۋ ءۇشىن لوتەرەيا ويناتۋ جوسپارلانىپتى.
اتىراۋ وبلىسى
