ۆەدومستۆو مالىمەتىنشە, بۇل جاڭاشىلدىق كادر ساپاسىن ارتتىرۋعا باعىتتالعان. بىلىكتىلىك تەستىلەۋى تۇلەكتەردىڭ ءپان بويىنشا ءبىلىمى مەن وقىتۋ ادىستەمەسىنىڭ دەڭگەيىن انىقتاۋعا مۇمكىندىك بەرەدى.
«مۇنداي جاڭاشىلدىق بىلىكتى پەداگوگتەر بالالارىمىزعا ساپالى ءبىلىم بەرۋلەرى ءۇشىن ەنگىزىلىپ وتىر. بيىل وقۋىن تامامداعان جوعارى وقۋ ورىندارىنىڭ تۇلەكتەرى مەن وسى ۋاقىتقا دەيىن مەكتەپتە جۇمىس ىستەمەگەن پەداگوگتەر ۇلتتىق بىلىكتىلىك تەستىلەۋىن تاپسىرۋى ءتيىس. تەستىلەۋدى تاپسىرىپ, قاجەتتى بالل جيناعان تۇلەكتەردى عانا جۇمىسقا قابىلداۋ جوسپارلانىپ وتىر. ۇلتتىق بىلىكتىلىك تەستىلەۋىندە بىلىكتىلىگىن دالەلدەگەننەن كەيىن تۇلەكتەر ءوز كاسىبي داعدىلارىن مەكتەپ قابىرعاسىندا كورسەتە الادى. بۇل جاڭاشىلدىق وقۋىن اياقتاپ, پەداگوگ بولىپ جۇمىس ىستەۋگە نيەت بىلدىرگەن تۇلعالارعا عانا قاتىستى. ياعني, جۇمىس ىستەپ جۇرگەن مۇعالىمدەرگە بۇل تالاپتار قويىلمايدى», دەدى قر بعم مەكتەپكە دەيىنگى جانە ورتا ءبىلىم كوميتەتىنىڭ ءتورايىمى مايرا مەلدەبەكوۆا.
قازاقستاندىق جوعارى وقۋ ورىندارىنا جاڭاشىلدىقتىڭ ورىندىلىعى مەن قاجەتتىلىگى تۋرالى تۇلەكتەر اراسىندا اقپاراتتىق-ءتۇسىندىرۋ جۇمىستارىن جۇرگىزۋ تاپسىرىلدى. ۇلتتىق بىلىكتىلىك تەستىلەۋى 1 شىلدە كۇنى باستالادى دەپ جوسپارلانىپ وتىر. تەستىلەۋدى تاپسىرۋ ءۇشىن ۇلتتىق تەستىلەۋ ورتالىعىنىڭ سايتىندا الدىن الا تىركەلۋ قاجەت. ەستەرىڭىزگە سالا كەتەيىك, 2020 جىلدان باستاپ جوعارى وقۋ ورىندارىنا پەداگوگيكالىق ماماندىقتار بويىنشا تۇسۋگە نيەت بىلدىرگەن تۇلەكتەرگە قويىلاتىن تالاپتار كۇشەيتىلدى.
ەگەر بۇرىن ۇبت-دا بولاشاق پەداگوگتەر ءۇشىن شەكتى بالل 50 بولسا, ەندى شەكتى بالل 75-كە دەيىن كوتەرىلدى. شاكىرتاقى كولەمى دە 26 مىڭنان 42 مىڭ تەڭگەگە دەيىن ۇلعايتىلدى. وسى جىلدىڭ قىركۇيەك ايىنان باستاپ ەلىمىزدەگى بارلىق ستۋدەنتتىڭ شاكىرتاقىسى 20%-عا وسەتىنىن ايتا كەتكەن ءجون.
