ونەر • 30 ماۋسىم، 2021

قوڭىر سازعا بولەگەن قوبىز ءۇنى

نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنا قاراستى «قورقىت» ەتنوانسامبلى VI كونتسەرتتىك ماۋسىمىن كيەلى قوبىزشى ىقىلاس دۇكەن ۇلىنىڭ شىعارماشىلىعىنا ارنالعان «جەز كيىك» اتتى كەرەمەت كەشپەن قورىتىندىلادى.

ازامات ەسەنجول

ءوز زامانىندا قاسيەتتى قوبىزبەن قازاق دالاسىن قوڭىر سازعا بولەگەن ىقىلاس بابامىز قوبىزشىلار اۋلەتىندە ومىرگە كەلگەن، ونىڭ اكەسى دۇكەن دە، اتاسى التىنبەك تە اتاقتى قوبىزشى بولعان. سونىڭ دا اسەرى بولار، ول جاسىنان ونەرگە جاقىن بولىپ ءوسىپ، ەسىمى ەرتە تانىلادى. جالپى، اتاقتى كۇيشىنىڭ شىعارمالارىندا ءوزى ءومىر سۇرگەن ءداۋىر مەن ەل اراسىنا كەڭ تاراعان اڭىز-اڭگىمەلەر ايشىقتى جاراسىم تاپقان.

سونىمەن كيەلى قوبىز ءۇنى سالتانات قۇرعان كەشتە حالىقارالىق بايقاۋلاردىڭ لاۋرەاتى، ىقىلاس بابامىزدىڭ تىكەلەي ۇرپاعى اقنار شارىپباەۆا، ولجاس قۇرمانبەك، حالىقارالىق شابىت فەستيۆالىنىڭ گران-پري يەگەرى شولپان شاراپاتوۆا، جانار ءجۇسىپوۆا، توعجان عايسا، ەرەگۇل باتقان سەكىلدى تالانتتى قوبىزشىلار كۇيشىنىڭ «جولاۋشىنىڭ قوڭىر كۇيى»، «توعىز تاراۋ»، «ايراۋىقتىڭ اششى كۇيى»، «جەزكيىك»، «ەردەن» جانە ت.ب. تۋىندىلارىن ورىنداپ، تىڭدارماندارىن كۇي سازىمەن تولقىتتى.

اسىرەسە، دارىندى قوبىزشى، قازاقستاننىڭ ەڭبەك سىڭىرگەن ءارتىسى راۋشان ورازباەۆا جەتەكشىلىك ەتەتىن «قوبىز-رۋح» ءانسامبلىنىڭ ورىنداۋىنداعى «اققۋ» كۇيى كورەرمەننىڭ قيالىن كوككە سامعاتىپ، عاجايىپ كۇيگە بولەدى دەسەك، ارتىق ايتقانىمىز ەمەس. سونداي-اق كەرەمەت كەش شىمىلدىعى «قورقىت» ەتنوانسامبلىنىڭ كوركەمدىك جەتەكشىسى، مادەنيەت قايراتكەرى شولپان قورعانبەكتىڭ «امانات» كۇيىمەن جابىلدى. بۇل كۇي اتالعان ونەر ۇجىمىنىڭ ء«تول قۇجاتى» سەكىلدى. ويتكەنى ۇلتتىق مۋزىكا اسپاپتارىمەن ورىنداۋىنداعى وسى كۇيدى تىڭداعاندا قۇلاعىڭىزعا ۇلى دالا سارىنى كەلىپ، رۋحتانىپ كەتەسىز.