اسكەري وقۋ ورىندارىن ءبىتىرۋ راسىمدەرىنە بايلانىستى, شىلدەدە جاس وفيتسەرلەر مەن سەرجانتتار اسكەردە قىزمەت اتقارۋعا بارادى. قولباسشىلارعا ولاردىڭ قىزمەتتىك مىندەتتەرگە بەيىمدەلۋىن جانە الەۋمەتتىك ماسەلەلەرىن شەشۋدى قاراستىرۋعا نۇسقاۋ بەرىلدى.
قارۋلى كۇشتەردە COVID-19-عا ۇجىمدىق يممۋنيتەت قالىپتاسقانىن ەسكەرە وتىرىپ, جاۋىنگەرلىك دايارلىق شارالارى تولىق دەڭگەيدە وتكىزىلۋى ءتيىس. باس اسكەري-مەديتسينالىق باسقارمانىڭ باستىعى جەكە قۇرامنىڭ 82 پايىزى ەكپەنىڭ ەكى كومپونەنتىن العانىن باياندادى. سونىمەن قاتار الەۋمەتتىك قاشىقتىق پەن بەتپەردە رەجىمىن ساقتاۋ وزەكتى كۇيىندە قالىپ وتىر.
قورعانىس ءمينيسترى نۇرلان ەرمەكباەۆ ەلدەگى سانيتارلىق-ەپيدەميالىق جاعدايعا بايلانىستى وڭىرلەر اكىمدىكتەرىنىڭ الدىن الۋ شارالارىنا قارۋلى كۇشتەردى قاتىستىرۋ ماسەلەسىن قاراۋدى تاپسىردى. اتاپ ايتقاندا, بۇل وبەكتىلەردى دەزينفەكتسيالاۋعا, اسكەري-دالالىق گوسپيتالدەردى اشۋعا, ازاماتتارعا كومەك كورسەتۋ ءۇشىن مەديتسينا توپتارىن قۇرۋعا قاتىستى.
كەڭەستە اسكەردى قايتا جاراقتاندىرۋ بارىسى قارالدى. بۇگىندە اۋە شابۋىلىنا قارسى قورعانىس قۇرالدارى – باستى نازاردا. 2019-2020 جىلدارى قازاقستان اسكەرىنىڭ قارۋلانۋىنا رەسەيدىڭ «بۋك» زەنيتتىك-زىمىران كەشەندەرى, بەلارۋستىڭ «روسا» راديولوكاتسيالىق ستانتسيالارى (رلس), سونداي-اق ەلىمىزدىڭ اۋە شەپتەرىن قورعاۋدا تۇرعان وتاندىق «نۇر» رلس-تارى جەتكىزىلدى.
جۋىردا زاماناۋي «تور-م2ك» زەنيتتىك-زىمىران كەشەندەرىن جەتكىزۋ جوسپارلانۋدا. «تور-م2ك» كەز كەلگەن ۇلگىدەگى ۇشاقتار مەن تىكۇشاقتاردى, سونىڭ ىشىندە «كورىنبەيتىن» تەحنولوگيامەن جاسالعان تىكۇشاقتاردى جانە ۇشقىشسىز ۇشۋ اپپاراتتارىن, جوعارى دالدىكتەگى قارۋدى, راديولوكاتسياعا قارسى جانە قاناتتى زىمىرانداردى, باسقارىلاتىن اۆياتسيالىق بومبالاردى انىقتاپ, جويۋعا قابىلەتتى.
قازىرگى ۋاقىتتا ۋاكىلەتتى ورگان – يندۋستريا جانە ينفراقۇرىلىمدىق دامۋ مينيسترلىگى جەتكىزۋشىمەن شارتتار جاساسۋ ۇستىندە. قورعانىس مينيسترلىگى اتالعان كەشەندى ازىرلەگەن زاۋىتتا وتاندىق اشقق اسكەرلەرىنىڭ ماماندارىن وقىتۋدى جوسپارلاپ وتىر.
«ەگەمەن-اقپارات»
