بۇۇ ادام قۇقىقتارى جونىندەگى جوعارعى كوميسسارى ميشەل باچەلەتپەن كەزدەسۋ اياسىندا پرەزيدەنتتىڭ ارناۋلى وكىلى ە. قازىحان قازاقستاننىڭ بۇۇ ادام قۇقىقتارى جونىندەگى باسقارماسىمەن ىنتىماقتاستىعىنىڭ باسىم باعىتتارىن تالقىلادى.
تاراپتار قۇقىق قورعاۋ سالاسىنداعى ۇلتتىق زاڭنامانى جانە قۇقىق قولدانۋ پراكتيكاسىن جەتىلدىرۋ بويىنشا ءوزارا ءىس-قيمىلدىڭ ۇلكەن تاجىريبەسىن, سونداي-اق قازاقستاننىڭ ادام قۇقىقتارى سالاسىنداعى ەلەۋلى پروگرەسىن اتاپ ءوتتى.
بۇۇ ادام قۇقىقتارى جونىندەگى جوعارعى كوميسسارى ميشەل باچەلەت ەلىمىزدەگى جەتىستىكتەر مەن ساياسي وزگەرىستەردى جوعارى باعالاپ, قر پرەزيدەنتىنىڭ 9 ماۋسىمداعى «ادام قۇقىقتارى سالاسىنداعى ودان ارعى شارالار تۋرالى» جارلىعىنىڭ جانە ادام قۇقىقتارى سالاسىنداعى ءبىرىنشى كەزەكتەگى شارالاردىڭ ۇلتتىق جوسپاريانىڭ نەگىزگى ماقساتتارىنىڭ ماڭىزدىلىعىن ەرەكشە اتاپ ءوتتى. جوعارعى كوميسسار مەملەكەت باسشىسى ق. توقاەۆتىڭ جاقىن ارادا قازاقستانعا كەلۋگە شاقىرۋ جونىندەگى جەكە جولداۋىن ريزاشىلىقپەن قابىلدادى. دۇنيەجۇزىلىك ساۋدا ۇيىمىنىڭ (دسۇ) باس ديرەكتورى نگوزي وكوندجو-يۆەالامەن كەزدەسۋ 2021 جىلدىڭ سوڭىندا جەنەۆادا قازاقستاننىڭ توراعالىعىمەن العاش رەت وتەتىن دسۇ-نىڭ 12-ءشى مينيسترلىك كونفەرەنتسياسىنىڭ ماڭىزدىلىعىن جانە دايىندىق بارىسىن جان-جاقتى تالقىلاۋعا مۇمكىندىك بەردى.
ە. قازىحان قازاقستاننىڭ دامۋى مۇددەسىندە دسۇ-مەن تىعىز ءوزارا ءىس-قيمىلىن اتاپ ءوتىپ, دسۇ باسشىسىن ەلىمىزدىڭ تەڭ قۇقىلى ساۋدانى جانە ۆاكتسينالارعا ءادىل قول جەتىمدىلىكتى قامتاماسىز ەتۋگە, سونداي-اق جاھاندىق ەكونوميكانى قالپىنا كەلتىرۋگە باعىتتالعان باستامالارىن تولىق قولدايتىنىن راستادى. دسۇ باسشىسى قازاقستان دسۇ-نىڭ ەڭ بەدەلدى مەملەكەتتەرىنىڭ ءبىرى ەكەنىن ايتىپ, ۇيىم قىزمەتىنە تۇراقتى جانە جۇيەلى قولداۋ كورسەتكەنى ءۇشىن ەلىمىزگە العىسىن ءبىلدىردى. نگوزي وكوندجو-يۆەالا قازاقستان پرەزيدەنتىنە جەنەۆادا وتەتىن كونفەرەنتسيانىڭ اشىلۋىنا جەكە قاتىسۋعا رەسمي شاقىرۋ جولدادى.
بۇۇ-نىڭ جەنەۆاداعى بولىمشەسىنىڭ باسشىسى تاتيانا ۆالوۆايامەن كەزدەسۋ بارىسىندا قارۋسىزدانۋ, كليماتتىڭ وزگەرۋى, «KazAID» جەلىسىمەن گۋمانيتارلىق كومەك كورسەتۋ جانە تۇراقتى دامۋ ماقساتتارى سالاسىنداعى قازاقستاندىق باستامالاردى ىلگەرىلەتۋ ماسەلەلەرى تالقىلاندى.
ە. قازىحان پرەزيدەنت ق. توقاەۆتىڭ بيولوگيالىق قاۋىپسىزدىك جونىندەگى حالىقارالىق اگەنتتىكتى قۇرۋ بويىنشا باستاماسىنىڭ وزەكتىلىگىن اتاپ ءوتتى, سونداي-اق سەمەيدەگى سىناق پوليگونى جابىلۋىنىڭ 30-جىلدىعىنا جانە ورتالىق ازيادا يادروسىز ايماق قۇرۋ تۋرالى شارتقا قول قويىلۋىنىڭ 15-جىلدىعىنا ورايلاستىرىلعان ءىس-شارالاردى بۇۇ تاراپىنان قولداۋدىڭ ماڭىزدىلىعىن اتاپ ءوتتى.
قازاقستان الماتى قالاسىنداعى ورتالىق ازيا ەلدەرى مەن اۋعانستان ءۇشىن ارنالعان بۇۇ ورتالىعىنىڭ بازاسىندا وڭىرلىك جوبالاردى ىسكە اسىرۋدا, اسىرەسە تومەن كومىرتەكتى دامۋ, ترانسشەكارالىق سۋ رەسۋرستارى, ازىق-ت ۇلىك قاۋىپسىزدىگى, ايەلدەردىڭ اراسىندا كاسىپكەرلىگىن دامىتۋ, گەندەرلىك تەڭدىك جانە ت. ب. ماسەلەلەر بويىنشا بۇۇ-نىڭ جەنەۆاداعى كەڭسەسىنىڭ قولداۋ كورسەتۋىنە ۇمىتتەنەدى.
ددۇ باسشىلىعىمەن پرەزيدەنت ق. توقاەۆتىڭ ددۇ باس ديرەكتورى ت. گەبرەيەسۋسپەن قول جەتكىزگەن ۋاعدالاستىقتارىنىڭ ىسكە اسىرۋ بارىسى تالقىلاندى.
قازاقستاننىڭ ددۇ-مەن مەديتسينالىق-سانيتاريالىق العاشقى كومەك سالاسىنداعى ۇلگىلى ىنتىماقتاستىعى قر پرەزيدەنتىنىڭ بۇۇ اياسىندا اۋرۋلاردى باقىلاۋ جانە بيوقاۋىپسىزدىك جونىندەگى وڭىرلىك ورتالىقتار جەلىسىن قۇرۋ تۋرالى باستاماسىن ىسكە اسىرۋ بويىنشا بىرلەسكەن ءىس-قيمىلداردىڭ جاڭا شەگتەرىن اشادى. ددۇ باس ديرەكتورىنىڭ ورىنباسارى س. ياكاب COVID-19 پاندەمياسىمەن كۇرەس بويىنشا ءىس-قيمىلعا, قازاقستانداعى ۆاكتسيناتسيا قارقىنىنا جوعارى باعا بەرىپ, ۇيىمنىڭ باسقا مەملەكەتتەرگە جاردەم كورسەتۋ ءۇشىن پايدالانىلۋى مۇمكىن بولاتىن وتاندىق «QazVac» ۆاكتسيناسىن جەدەل سەرتيفيكاتتاۋعا جان-جاقتى كومەك كورسەتۋگە دايىندىعىن ءبىلدىردى.
ساپار بارىسىندا ارناۋلى وكىل ە. قازىحان حالىقارالىق ەڭبەك ۇيىمىنىڭ (حەۇ) جانە بۇۇ-نىڭ ەۋروپالىق ەكونوميكالىق كوميسسياسىنىڭ باسشىلىعىمەن دە كەزدەستى.
