تاۋەلسىزدىكتىڭ 30 جىلدىعى • 28 ماۋسىم، 2021

تاۋەلسىزدىك تاريحىن تاماشالايدى

35 رەت كورسەتىلدى

ەلباسى كىتاپحاناسىنىڭ مۋزەيىندە تاۋەلسىزدىگىمىزدىڭ 30 جىلدىعىنا ارنالعان «قازاقستاندىق جول» جوباسى ىسكە قوسىلىپ، ونىڭ العاشقىسى استانا كۇنى قارساڭىندا «ارمان قالا» كورمەسىمەن اشىلدى.

ازامات ەسەنجول

اتالعان جوبانىڭ نەگىزگى يدەياسى – ەل تاۋەلسىزدىگىنىڭ 30 جىلدىق كەزەڭىندەگى ايماقتاردىڭ دامۋىنا پانورامالىق شولۋ كوزدەلگەن. جىل سوڭىنا دەيىن ەلورداداعى قازاقستان رەسپۋبليكاسى تۇڭعىش پرەزيدەنتىنىڭ ءبىرىنشى رەزيدەنتسياسىنداعى تاريحي عيماراتتىڭ كورمە الاڭىندا ەلىمىزدىڭ بارلىق ايماقتارىنا ارنالعان ءىس-شارالار وتەدى.
– ەلباسى كىتاپحاناسى ەلىمىزدىڭ ەرەكشە مەرەكەلەرىنىڭ ءبىرى – استانا كۇنى قارساڭىندا قالا جۇرتشىلىعىمەن قۋانا قاۋىشىپ وتىر. بيىل – مەملەكەتىمىز ءۇشىن ەرەكشە جىل، تاۋەلسىزدىگىمىزدىڭ 30 جىلدىق مەرەيتويى. ەگەمەن ەلىمىزدىڭ تاريحى جاس استانامەن تىعىز بايلانىستى. 1997 جىلعى 10 جەلتوقساندا ءدال وسى جەردە ن.ءا.نازارباەۆ رەسپۋبليكا استاناسىنىڭ اقمولاعا كوشىرىلەتىنىن جاريالاپ، ەلىمىز ءۇشىن ماڭىزدى تاريحي شەشىمدەردىڭ جاڭا استانادا قابىلداناتىنىن حابارلاعان بولاتىن. بۇل وقيعا وسى كيەلى عيماراتتا، ۇلى دەرجاۆالىق مەملەكەت باسشىلارىنىڭ باسىن قوسقان تۇڭعىش پرەزيدەنتتىڭ بۇرىنعى رەزيدەنتسياسىندا بولعان ەدى. بۇگىنگى قازاقستان استاناسىنىڭ تاريحى مەن بولاشاعى «ارمان قالا» كورمەسىنە ارقاۋ بولىپ وتىر. سەبەبى، تاڭعاجايىپ باس قالا – ەل ارمانى مەن ءۇمىتىنىڭ قالاسى، ەلىمىزدى مەكەن ەتكەن بارشا ۇلتتىڭ ۇلكەن ماقتانىشى، – دەدى سالتاناتتى ءىس-شارانىڭ اشىلۋىندا ەلباسى كىتاپحاناسىنىڭ ديرەكتورى باقىتجان تەمىربولات.
ودان كەيىن ءسوز العان نۇر-سۇلتان قالاسى اكىمىنىڭ ورىنباسارى ەرمەك قيزاتوۆ كورمەنى ۇيىمداستىرۋشىلارعا ريزاشىلىعىن ءبىلدىرىپ، ساتتىلىك تىلەدى.
مازمۇندى ءىس-شارا نۇر-سۇلتان قالاسى اكىمدىگى، ەلوردالىق مەملەكەتتىك ءارحيۆى، قازاقستان رەسپۋبليكاسى ۇلتتىق ءارحيۆى جانە «استاناگەنپلان» عزجي جشس مەن «KazExpoCongress» اق بىرلەسىپ ۇيىمداستىرىلدى.
كورمە ەلباسى جەكە ءارحيۆى مەن ەلباسى كىتاپحاناسى مۋزەيىندەگى كىتاپ قورىنىڭ ماتەريالدارى نەگىزىندە استانانىڭ قالىپتاسۋى مەن دامۋ تاريحىن كەشەندى زەرتتەۋدىڭ ناتيجەسى سانالادى. ول ەكى بولىمنەن تۇرادى، ءبىرىنشى «نۇر-سۇلتان – تاۋەلسىز قازاقستاننىڭ جاڭا استاناسى» بولىمىندە جاڭا استانانى سالۋ بويىنشا تۇڭعىش پرەزيدەنت – ەلباسى ن.ءا.نازارباەۆتىڭ باستامالارى مەن يدەيالارى تۋرالى دۇنيەلەر ۇسىنىلسا، ەكىنشى «نۇر-سۇلتان – ديپلوماتيا جانە بىتىمگەرشىلىك ورتالىعى» بولىمىنەن ەلوردادا وتكەن، جاس استانانىڭ جانە تۇتاستاي مەملەكەتتىڭ حالىقارالىق مارتەبەسىن نىعايتۋعا ىقپال جاساعان جاھاندىق اۋقىمداعى ماڭىزدى وقيعالار تۋرالى ماتەريالدار كەشەنىمەن تانىس بولاسىز.
«قازاقستاندىق جول» جوباسىنىڭ قورىتىندى كورمەسى ازاتتىعىمىزدىڭ بەسىگى – الماتى قالاسىنا ارنالادى. ءىس-شارا قازاقستاننىڭ تاۋەلسىزدىك كۇنى قارساڭىنا جوسپارلانىپ وتىر.
ايتا كەتەيىك، «ارمان قالا» كورمەسى 8 تامىزعا دەيىن جالعاسادى.