قازاقستان • 24 ماۋسىم، 2021

«URKER-2021» ۇلتتىق بايگەسىنىڭ جەڭىمپازدارى ماراپاتتالدى

112 رەت كورسەتىلدى

«قازمەديا» ورتالىعىندا باسپا، راديو، ينتەرنەت-جۋرناليستيكا سالاسىنداعى «URKER-2021» ۇلتتىق بايگەسىنىڭ جەڭىمپازدارىن ماراپاتتاۋ ءراسىمى ءوتتى، دەپ حابارلايدى Egemen.kz.

2021 جىلى ۇيىمداستىرۋشىلاردىڭ مەكەنجايىنا رەسپۋبليكالىق جانە وڭىرلىك راديوستانتسيالاردان، باسپا جانە ينتەرنەت-باسىلىمداردان 340 ءوتىنىم كەلىپ ءتۇستى. 2017 جىلدان باستاپ بارلىعى 2 833 جۇمىس سىيلىققا ۇسىنىلدى، ونىڭ 248-ءى شورت-پاراققا ەندى. وتاندىق بۇقارالىق اقپارات قۇرالدارىنىڭ 67 ۇزدىك وكىلى «URKER» ەستەلىك مۇسىنشەسىنىڭ يەگەرى اتاندى.

قر اقپارات جانە قوعامدىق دامۋ ءمينيسترى ايدا بالاەۆا سالتاناتتى شارانىڭ باستالۋ راسىمىندە جۋرناليستەردىڭ ەڭبەگىنە العىسىن ءبىلدىرىپ، «اقپارات كەڭىستىگىنىڭ قوعام دامۋىنداعى الاتىن ورنى دا، قوساتىن ۇلەسى دە وتە زور. سەبەبى مەديا تەك رەسمي اقپارات تاراتۋدىڭ قۇرالى ەمەس، ۇلتتىق قاۋىپسىزدىك پەن مەملەكەتتىك يدەولوگيانىڭ وزەگى ەكەنىن ۇنەمى ايتىپ كەلەمىز. ازاماتتىق قوعامنىڭ قارقىندى دامۋى جۋرناليستەردىڭ كاسىبي جانە ازاماتتىق بەلسەندىگىنە تىعىز بايلانىستى»، - دەدى.

سونىمەن بىرگە ايدا بالاەۆا بيىل «تاۋەلسىزدىكتىڭ 30 جىلدىعىنا ارنالعان ۇزدىك ماتەريال» ارنايى نوميناتسياسىنىڭ قوسىلعانىن اتادى. بۇل نوميناتسياسىنىڭ جەڭىمپازى «سەمەي تاڭى» گازەتىنىڭ ءجۋرناليستى رىيزا مولداشەۆا اتاندى.

وعان قوسا وتاندىق راديونىڭ 100 جىلدىعىنا وراي تاعايىندالعان ارنايى جۇلدەنىڭ يەگەرى «Qazaq radiosy» اتاندى.

سالتاناتتى راسىمدە نوميناتسيالار بويىنشا جۋرناليستيكا سالاسىنداعى بەدەلدى سىيلىق جەڭىمپازدارىنىڭ ەسىمدەرى اتالدى:

جىلدىڭ ۇزدىك فوتوسۋرەتى - ماقسات شاعىرباەۆ newsroom.kz پورتالى

جىلدىڭ ۇزدىك رەپورتاجى - انۋار ابدراحمانوۆ BaigeNews.kz پورتالى

جىلدىڭ ۇزدىك اناليتيكالىق ماتەريالى - دينا يمامباەۆا «اقيقات» جۋرنالى

جىلدىڭ ۇزدىك جۋرناليستىك زەرتتەۋى - رىسبەك قىدىربەك «Aiqyn» گازەتى

جىلدىڭ ۇزدىك سۇحباتى - تامارا ۆاال Vlast.kz پورتالى

جىلدىڭ ۇزدىك تانىمدىق ماتەريالى - ومىربەك سانسىزباەۆ Massaget.kz پورتالى

راديوستانتسياداعى ۇزدىك جوبا - «نوۆوە ۋترو» «NS» راديوسى

جىلدىڭ ۇزدىك جاڭالىقتار پورتالى - inform.kz

جىلدىڭ ۇزدىك گازەتى - «TÚRKISTAN»

جىلدىڭ ۇزدىك جۋرنالى - «Forbes Kazakhstan»

تاۋەلسىزدىكتىڭ 30 جىلدىعىنا ارنالعان ۇزدىك ماتەريال - رىيزا مولداشەۆا «سەمەي تاڭى» گازەتى.

فيناليستەرگە ۇلتتىق بايگە جەڭىمپازى اتاعىندا كۋالىك، «URKER» ەستەلىك مۇسىنشەسى جانە ءبىر ميلليون تەڭگە مولشەرىندەگى قارجىلاي سىيلىق تابىستالدى.

كورەرمەندەر ماراپاتتاۋ ءراسىمىن سىيلىقتىڭ urker-awards.kz رەسمي سايتىندا تىكەلەي ەفيردە كورۋگە مۇمكىندىك الدى.

ايتا كەتەيىك، قازاقستاندىق «URKER» ۇلتتىق سىيلىعى، باسپا، راديو، ينتەرنەت-جۋرناليستيكا سالاسىنداعى جەتىستىكتەرى ءۇشىن بەرىلەتىن تالانتتى جۋرناليستەر مەن شىعارماشىلىق ۇجىمداردى انىقتاۋ، ولاردىڭ كاسىبي جۋرناليستيكانىڭ دامۋىنا قوسقان ۇلەستەرىن تانۋ ماقساتىندا 2017 جىلى قۇرىلعان.

سوڭعى جاڭالىقتار

دوللار قايتا قىمباتتاي باستادى

ەكونوميكا • بۇگىن، 11:47

نۇرحاننىڭ دومبىراسى

ونەر • بۇگىن، 09:05

ءتورت دۇركىن چەمپيون

TOKYO2020 • بۇگىن، 09:04

ءبىر ءوزى – ءبىر مەملەكەت

TOKYO2020 • بۇگىن، 09:00

ءاميان اقشاسىز قالدى

قارجى • بۇگىن، 08:47

ۇقساس جاڭالىقتار