ايماقتار • 24 ماۋسىم، 2021

قمدب سارىاعاشتا حالىقارالىق كونفەرەنتسيا وتكىزدى

25 رەت كورسەتىلدى

بۇگىن تۇركىستان وبلىسى سارىاعاش اۋدانى ىنتىماق اۋىلىندا قازاقستان مۇسىلماندارى ءدىني باسقارماسىنىڭ ۇيىتقى بولۋىمەن حالىقارالىق كونفەرەنتسيا ءوتتى، دەپ حابارلايدى Egemen.kz.

ءابدىساتتار سمانوۆ پەن ابدىعاپپار شاكىر ۇلىنىڭ رۋحىنا ارنالعان ء«دىن رۋحانياتىنىڭ ۇلاعاتتى ۇستازدارى» عىلىمي-تانىمدىق كونفەرەنتسياسىنا قمدب توراعاسى، باس ءمۇفتي ناۋرىزباي قاجى تاعان ۇلى، وزبەكستان مۇسىلماندارى ءدىني باسقارماسىنىڭ توراعاسى ۋسمانحان اليموۆ، قىرعىزستان ءمۇفتيىنىڭ مىندەتىن اتقارۋشى جوروبوي قاجى شەرعازىەۆ، قمدب توراعاسىنىڭ ورىنباسارى، نايب ءمۇفتي ەرشات اعىباي ۇلى، اپپارات باسشىسى عىلىمبەك جادىگەر ۇلى، قمدب عۇلامالار كەڭەسىنىڭ مۇشەلەرى، وبلىستىڭ باس يمامدارى مەن مەدرەسە ديرەكتورلارى قاتىستى.

القالى جيىن الدىمەن سمانوۆتار اۋلەتىنەن دۇنيەدەن وتكەن جانداردىڭ رۋحىنا قاسيەتتى قۇران اياتتارىن وقۋمەن باستالدى. قۇران دۇعاسى جاسالىپ، ءابدىساتتار مەن ابدىعاپپار ۇستازداردىڭ ءدىن رۋحانياتى جولىندا اتقارعان ەڭبەگىنە توقتالعان قىسقاشا بەينەروليك ۇسىنىلدى.

كونفەرەنتسيا بارىسىندا قمدب توراعاسى، باس ءمۇفتي ناۋرىزباي قاجى تاعان ۇلى بايانداما جاساپ، ءدىن عۇلامالارىنىڭ ماعىنالى عۇمىرىنا توقتالدى.

«داستۇرىمىزبەن بىتە قايناساتىن مۇسىلماندىق سيپات ءسوز بولعاندا وڭتۇستىك ولكە نازاردان تىس قالمايدى. قازاقتىڭ بايتاق دالاسى، ونىڭ ىشىندە سارىاعاش جۇرتىنا اتى ءماشھۇر قوس بىردەي ءدىن جاناشىرى ءابدىساتتار، ابدىعاپپار شاكىرۇلدارى تۋرالى كوپ ايتۋعا بولادى. ەلىمىزدەگى ءدىني ءبىلىم بەرەتىن مەدرەسەلەر تۋرالى ايتىلعاندا العاش «سارىاعاش مەدرەسەسى» ەسكە تۇسەدى. ال «سارىاعاش مەدرەسەسى» تۋرالى ايتىلعاندا سمانوۆتار اۋلەتى الدا تۇرادى. وسى مەدرەسەگە ءابدىساتتار اعامىز ءوزى باسشىلىق ەتىپ، كەلگەن جاستاردىڭ ءدىني ساۋاتىن اشىپ قانا قويماي، ولاردى مامان ەتىپ دايىنداۋعا كۇش سالدى.

پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «سەندەردىڭ ەڭ جاقسىلارىڭ – قۇراندى ۇيرەنىپ ونى ۇيرەتكەندەرىڭ» دەگەن وسيەتىنە امال ەتتى. سونىمەن قاتار ءابدىساتتار سمانوۆ قاسيەتتى قۇران كارىمنىڭ قازاق تىلىندەگى اۋدارماسىن جاساپ، بىرقاتار عىلىمي ەڭبەكتەردىڭ اۆتورى اتاندى. قازىرگى تاڭدا ۇلكەن ءبىر پارمەندى ينستيتۋتقا اينالعان عۇلامالار كەڭەسىنىڭ قۇرىلعان جىلدارىندا مۇشە بوپ، العاشقى ءپاتۋالاردى قابىلداۋدا عالىم رەتىندە ۇلەسىن قوستى. جىلدار بويى مەدرەسە قابىرعاسىندا كوپتەگەن شاكىرت تاربيەلەدى» دەي كەلە باس ءمۇفتي ناۋرىزباي قاجى تاعان ۇلى القالى جيىنعا ارقاۋ بولعان ۇلاعاتتى ۇستازداردىڭ ءدىن مەن رۋحانيات جولىندا اتقارعان ەڭبەگىنە ەرەكشە توقتالدى. 

سونىمەن قاتار حالىقارالىق عىلىمي-تانىمدىق كونفەرەنتسياسىنا ارنايى كەلگەن وزبەكستان مۇسىلماندارى ءدىني باسقارماسىنىڭ توراعاسى ۋسمانحان اليموۆ پەن قىرعىزستان ءمۇفتيىنىڭ مىندەتىن اتقارۋشى جوروبوي قاجى شەرعازىەۆ القالى جيىننىڭ ماڭىزىنا توقتالىپ، عالىمنىڭ اللا الدىنداعى دارەجەسى جايىندا ناسيحاتىن جەتكىزدى.

سوڭعى جاڭالىقتار

تۋريستكە دە ءتارتىپ بار

ايماقتار • بۇگىن، 18:06

دوللار قايتا قىمباتتاي باستادى

ەكونوميكا • بۇگىن، 11:47

ۇقساس جاڭالىقتار