اۋدان جۇرتشىلىعى قاۋىپ-قاتەرى الەمدى قوبالجىتىپ تۇرعان پاندەميا كەزىندە يگى مۇراتتار توڭىرەگىندە توپتاسا ءبىلدى. ەل ىشىندەگى بىرلىكتىڭ بەكەمدىگى, ىرىستى ىنتىماقتىڭ جان سۇيسىنتەر جاراسىمى وسى كەزدە بايقالدى. ەل پرەزيدەنتى قاسىم-جومارت توقاەۆتىڭ ۆولونتەر جىلى تۋرالى باستاماسىنان كەيىن ىزگى نيەت, ادال كوڭىل بۋلىعىپ تۇرعان بۇلاقتىڭ كوزى اشىلعانداي بۋىرقانىپ سالا بەردى.
الدىمەن اۋدانداعى قايىرىمدى جاندار قاناتتاسا بىرىگىپ, جوسپار جاسادى. اتقارىلار ءىس-قيمىلدى كوڭىل تارازىسىندا باعامداپ, ەكشەپ الدى. وبرازعا وراپ ايتقاندا, وزگەگە قوڭ ەتىن كەسىپ بەرۋگە دايىن تۇراتىن جانى جومارت, پەيىلى كەڭ ەرىكتىلەر توبى الدەنەشە رەت الەۋمەتتىك قايىرىمدىلىق اكتسيالارىن وتكىزىپ, ىزگى نيەتپەن ىزەتتى قامقورلىق جاساپ, كومەككە ءزارۋ ادامدارعا قول ۇشىن سوزىپ, قولعانات بولا ءبىلدى. ولار وتكەن قىستا اۋداننىڭ ەلدى مەكەندەرىندەگى جالعىزىلىكتى جانداردىڭ اۋلالارىن تازارتىپ, باعىمداعى مالدارىنا جەم-شوپتەرىن جەتكىزىپ بەرىپ, سوزىلمالى سىرقاتى بار ادامدارعا ەمحانادان تەگىن ءدارى-دارمەكتەرىن اكەلىپ بەردى. كوكتەم شىعا ونداعان زەينەتكەردىڭ باۋ-باقشاسىنداعى ەگىستىك جەرىن جىرتىپ, اۋلالارىن كۇل-قوقىستان تازالاپ, اق العىستارىن ارقالادى. «قىزىل ايماقتىڭ» قۇرساۋىندا تۇرعان كەزدە كۇتىمسىز قالعان تۇرعىن ۇيلەرىن اكتەپ, شارباقتارىن تۇزەپ, دالىزدەرىن سىرلاپ, كوزتارتارلىق ەتىپ قۇلپىرتىپ قويدى. وسىنداي جاناشىرلىقتىڭ ناتيجەسىندە كومەككە ءزارۋ ادامداردىڭ دا ەڭسەسى كوتەرىلىپ, وزدەرىنىڭ جالعىز ەمەس ەكەندىكتەرىن ۇعىپ, قوعامنىڭ قايىرىمدىلىعىنا ءتانتى بولىستى.
ارينە, ەرىكتى بولۋ ىزگى جۇرەكتىڭ ىزەتتى بۇيرىعى. بيىل اقپان ايىنىڭ باسىندا قۇرىلعان ەرىكتىلەر كورپۋسى از ۋاقىتتىڭ ىشىندە اۋقىمدى شارۋالار اتقارۋىمەن كوزگە ءتۇستى. ولار ارقيلى الەۋمەتتىك جوبالاردى قولعا الىپ, ونداعان وتباسىنا قامقورلىق كورسەتتى. قيىن كەزدە ۇيىسا ۇيىمداسقان شاراپاتتى شارۋا ءوڭىر جاسىل ايماقتىڭ ساناتىنا ەنگەندە دە توقىراعان جوق. كوپبالالى, الەۋمەتتىك جاعىنان از قامتىلعان وتباسىلاردىڭ تىنىس-تىرشىلىگى باستى نازاردا. ورتاق ىسكە وبلىستىق جانە اۋداندىق ءماسليحاتتاردىڭ Nur Otan پارتياسىنان سايلانعان دەپۋتاتتارى دا اتسالىسۋدا. ولار اتباسار قالاسىنداعى №2 ارنايى مەكتەپ-ينتەرناتقا كوپ كومەكتەستى. دەنساۋلىعىندا اقاۋى بار بالالاردى ءبىر ۋاقىت سەيىلتىپ, تابيعات اياسىندا سەرۋەن ۇيىمداستىردى. جاي عانا سەرۋەن ەمەس, وڭىردەگى تاريحي ورىنداردى كورسەتىپ, قاسيەتىنە بويلاتقان مازمۇندى ساپار. ساپاردان سوڭ بالالار تورعايلارعا ۇيا جاساپ, قۇستارعا جەم شاشاتىن استاۋشالار ورناتتى.
اتباسارلىق ەرىكتىلەر ادام كوڭىلىن جادىراتۋمەن قاتار, تابيعاتتى كولدەنەڭ جاتقان كوپ بۇراۋدان ارىلتىپ, سۇلۋداي سىلانا تۇسۋىنە ىقپال ەتتى. بىرنەشە مارتە اۋدان ەلدى مەكەندەرىندە سەنبىلىكتەر ۇيىمداستىرىلدى. ەڭكەيگەن كارىدەن ەڭبەكتەگەن بالاعا دەيىن قاتىسقان يگى ءىس كەزىندە كوشەلەر تازالانىپ, كۇل-قوقىس ارنايى ورىندارعا شىعارىلدى.
ء«بىر جەڭنەن قول, ءبىر جاعادان باس» شىعارعان بىرلىك اۋدانداعى ونداعان ۇلتتىڭ ىزگى مۇراتىن ءبىر ارنادا توعىستىرىپ, قاي كەزدە دە, قانداي سىناقتا دا بىرگە ەكەندىكتەرىن ۇقتىرىپ بەردى. بالكىم, قيىندىقتى قابىرعاسى قايىسپاي كوتەرىپ الاتىن قايسارلىق وسىنداي ىنتىماقتان تۋىندايتىن شىعار.
اقمولا وبلىسى,
اتباسار اۋدانى
