مەملەكەت باسشىسى نۇرسۇلتان نازارباەۆ جەڭىستىڭ 65 جىلدىعىن ەلىمىزدىڭ بارلىق وڭىرىندە لايىقتى دەڭگەيدە اتاپ ءوتۋدى تاپسىرعان بولاتىن. ەلباسىنىڭ ايتۋىنشا, بىردە-ءبىر سوعىس ارداگەرى, ولاردىڭ جەسىرلەرى جانە تىل ەڭبەككەرلەرى وزدەرىن مەملەكەت نازارىنان تىس قالىپ, ۇمىتىلعان جانداي سەزىنبەۋى ءتيىس.
جۋىردا الماتى وبلىسىنىڭ جامبىل اۋدانىنداعى بەسمويناق ەلدى مەكەنىندە 220 ادامنىڭ ەسىمى جازىلعان ءمارمار تاستان جاسالعان مونۋمەنتتىڭ اشىلۋ سالتاناتى بولدى. ەل ازاماتتارىن ەل ەسىندە قالدىرۋ ماقساتىندا تۇرعىزىلعان مونۋمەنتتىڭ بيىكتىگى – 7 مەتر. ال ورتادا ماڭگىلىك الاۋ جانىپ تۇر. مۇنداي يگى ءىستى “بولاشاققا – باعدار, ۇرپاققا ونەگە” دەپ سانايتىن اۋىل ازاماتتارى ء“بىر جاعادان باس, ءبىر جەڭنەن قول شىعارىپ”, ونىڭ بوي كوتەرۋىنە اتسالىستى. مونۋمەنتتىڭ ەكى جاعىندا سوعىسقا قاتىسقان, قۋعىن-سۇرگىنگە ۇشىراعان, ەڭبەك ەرى اتانعان جەرگىلىكتى جالپى سانى 220 ادامنىڭ ەسىمى جازىلعان. ونىڭ 205-ءى – سوعىس ارداگەرى, 13-ءى – زۇلمات زاماندا قۋعىن-سۇرگىنگە ۇشىراعاندار, 2-ءۋى – ەڭبەك ەرى. سوعىستان امان-ەسەن ورالعان 76 ارداگەردىڭ بۇگىندە ۇشەۋىنىڭ عانا كوزى ءتىرى. – جەرگىلىكتى مەكتەپتى 20 جىل باسقارعان تىلەگەن جاقىپباي ۇلى اعامىزدىڭ ەسكەرتكىشتى تۇرعىزۋدا كومەگى زور بولدى. ول كىسىدەن بارلىق دەرەكتەردى الىپ, ەل ازاماتتارىنىڭ ەسىمىن تولىق جازىپ قويدىق. مونۋمەنت مەشىتتىڭ اۋلاسىنا تۇرعىزىلعاندىقتان, ەسكەرتكىش تاقتاعا: “اللا تاعالانىڭ ءۇيى – مەشىتتە قايتىس بولعانداردىڭ ارۋاعىنا دۇعا جاسالسىن, كەلەر كۇننەن ءار ازامات ءوز وتباسىنا, حالقىنا جاقسىلىق تىلەگەي!” – دەپ جازدىرتتىم. “الەمنىڭ جارىعىن سىيلاعان – انا!”, ء“ار كۇنگى بىتكەن ءىس – كەلەشەك تاريح!”, “ولىگە يمان, تىرىگە بەرەكە بەرسىن!” – دەگەن سوزدەر دە جازۋلى. وسىنداي يگى ءىستىڭ جۇزەگە اسۋىنا اۋدان ازاماتى, بەلگىلى جازۋشى ناعاشىبەك قاپالبەك ۇلىنىڭ, اۋىل اقساقالدار القاسىنىڭ توراعاسى نۇرمانبەت امانجول ۇلىنىڭ ۇلەسى بار. مەشىتكە كەلگەن يماندى جاستارىمىزدىڭ بويىندا وتاندى سۇيۋگە دەگەن سەزىم ارتا بەرسىن, – دەيدى ەسكەرتكىشتىڭ نەگىزگى اۋىرتپالىعىن كوتەرىپ, جەكە قارجىسىنا تۇرعىزعان اۋىل ازاماتى مۇحتار جۋاروۆ. ەسكەرتكىشتىڭ اشىلۋ سالتاناتىندا وتكەنگە سالاۋات ايتىلىپ, قۇربانداردىڭ رۋحىنا قۇران باعىشتالدى. اعابەك قونارباي ۇلى. الماتى وبلىسى.
