الەم • 23 ماۋسىم، 2021

قر پرەزيدەنتىنىڭ ارنايى وكىلى بريۋسسەلگە جۇمىس ساپارىمەن باردى

20 رەت كورسەتىلدى

قازاقستان مەن ەۋروپالىق وداق اراسىنداعى ىنتىماقتاستىق ماسەلەلەرىن تالقىلاۋ ءۇشىن قر پرەزيدەنتىنىڭ حالىقارالىق ىنتىماقتاستىق بويىنشا ارنايى وكىلى ەرجان قازىحان بريۋسسەلگە جۇمىس ساپارىمەن باردى، دەپ حابارلايدى Egemen.kz ءسىم ءباسپاسوز قىزمەتىنە سىلتەمە جاساپ.

ە. قازىحان ەۋروپالىق كەڭەستىڭ، ەۋروپالىق كوميسسيانىڭ، ەۋروپالىق پارلامەنتتىڭ، ەۋروپالىق سىرتقى ءىس-قيمىل قىزمەتىنىڭ جوعارى وكىلدەرىمەن، سونداي-اق ەۋروپالىق ينۆەستيتسيالىق بانك باسشىلىعىمەن كەزدەسۋلەر وتكىزدى.

ە. قازىحان ەۋروپالىق كەڭەستىڭ باسشىسى شارل ميشەلگە پرەزيدەنت قاسىم-جومارت توقاەۆتىڭ ارنايى جولداۋىن جەتكىزدى. تاراپتار قازاقستان مەن ەۋرووداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى جۇزەگە اسىرۋدىڭ اعىمداعى جاي-كۇيى مەن الداعى پەرسپەكتيۆالارىن تالقىلادى. ارنايى وكىل ەۋرووداقپەن ءتيىمدى جانە جان-جاقتى ىنتىماقتاستىقتى دامىتۋ قازاقستاننىڭ سىرتقى ساياساتىنىڭ ستراتەگيالىق باسىمدىعى بولىپ تابىلاتىنىن اتاپ ءوتتى. جوعارى جانە اسا جوعارى دەڭگەيدەگى ساياسي ديالوگتى قولداۋ تۋرالى كەلىسىمگە قول جەتكىزىلدى. وسى تۇرعىدا تاراپتار مەملەكەت باسشىسىنىڭ بريۋسسەلگە ساپارىن ۇيىمداستىرۋ ماسەلەسىن تالقىلادى.

ەۋروپالىق سەرىكتەستەر قازاقستاننىڭ كوروناۆيرۋسقا قارسى وتاندىق «QazVac» ۆاكتسيناسىن شىعارۋ جانە قولدانۋ سالاسىنداعى جەتىستىگىن جوعارى باعالادى. ەۋروپالىق دارىلىك پرەپاراتتار جونىندەگى اگەنتتىك ماقۇلداعان جاعدايدا، قازاقستاندىق ۆاكتسينا پاندەميامەن كۇرەستە شەتەلدىك سەرىكتەستەردى قولداۋدىڭ ەۋروپالىق تەتىگى، «Team Europe» جەلىسى بويىنشا قازاقستان مەن ەۋرووداق اراسىنداعى ىنتىماقتاستىقتىڭ تاعى ءبىر ماڭىزدى نەگىزىنە اينالۋى مۇمكىن.

كەزدەسۋلەر بارىسىندا تاراپتار حالىقارالىق كۇن تارتىبىندەگى وزەكتى ماسەلەلەردى، سونىڭ ىشىندە جاھاندىق جانە وڭىرلىك قاۋىپسىزدىك، اۋعانستانداعى جاعدايدى تۇراقتاندىرۋ ماسەلەلەرى بويىنشا پىكىر الماستى.

قازاقستان مەن ەۋرووداقتىڭ ساۋدا، ينۆەستيتسيالار، جاسىل ەكونوميكا جانە ەنەرگەتيكا ماسەلەلەرى بويىنشا ىنتىماقتاستىعى ە. قازىحاننىڭ ەۋروكوميسسيا باسشىلىعىمەن كەزدەسۋىنىڭ نەگىزگى تاقىرىبى بولدى. تاراپتار ەۋروپالىق شيكىزات اليانسى (European Raw Material Alliance) جانە ەۋروپالىق باتارەيا اليانسى (European Battery Alliance) شەڭبەرىندەگى ارىپتەستىك ماسەلەلەرىن تالقىلادى.

ە. قازىحان ەۋروپالىق پارلامەنت دەپۋتاتتارىنىڭ توبىمەن، سونىڭ ىشىندە قازاقستان-ەۋرووداق دوستىق توبىنىڭ مۇشەلەرىمەن جانە ورتالىق ازيا مەن مونعوليا بويىنشا ەۋروپارلامەنت دەلەگاتسياسىمەن كەزدەسۋلەر وتكىزدى.

ەۋرودەپۋتاتتار پرەزيدەنت قاسىم-جومارت توقاەۆ باستاماشى بولعان ساياسي رەفورمالاردىڭ الەۋەتىن اتاپ ءوتتى. پارلامەنتشىلەر مەملەكەت باسشىسىنىڭ ادام قۇقىقتارى سالاسىنداعى ءبىرىنشى كەزەكتەگى شارالار جوسپارى تۋرالى جارلىعى جونىندەگى مالىمەتتى جىلى قابىلدادى.

ارنايى وكىل قازاقستان كەڭ اۋقىمدى ماسەلەلەر تىزبەگى بويىنشا، ونىڭ ىشىندە دەموكراتيالاندىرۋ، زاڭ ۇستەمدىگى مەن ادام قۇقىقتارىن قامتاماسىز ەتۋ، ازاماتتىق ينستيتۋتتاردى دامىتۋ سالاسىندا اشىق جانە سىندارلى ديالوگقا ءازىر ەكەنىن اتاپ ءوتتى.

ە. قازىحان سونداي-اق ەۋروپالىق ينۆەستيتسيالىق بانك (ەيب) باسشىلىعىمەن كەلىسسوزدەر جۇرگىزدى. تاراپتار داعدارىستان كەيىنگى كەزەڭدە قازاقستان مەن ەيب اراسىنداعى ەكونوميكالىق ىنتىماقتاستىقتىڭ پەرسپەكتيۆالارىن تالقىلادى. شاعىن جانە ورتا بيزنەس سالاسىنداعى ىنتىماقتاستىق، اۋىل شارۋاشىلىعى، تسيفرلىق تەحنولوگيالار، كولىك جانە «جاسىل» جوبالاردى دامىتۋ، سونداي-اق قازاقستان ەكونوميكاسىن دەكاربونيزاتسيالاۋ جانە 2060 جىلعا قاراي كومىرتەگى بەيتاراپتىعىنا قول جەتكىزۋ جونىندەگى جوسپارلارعا ەرەكشە كوڭىل ءبولىندى.

سوڭعى جاڭالىقتار

تۋريستكە دە ءتارتىپ بار

ايماقتار • بۇگىن، 18:06

دوللار قايتا قىمباتتاي باستادى

ەكونوميكا • بۇگىن، 11:47

ۇقساس جاڭالىقتار