قازاقستان • 22 ماۋسىم، 2021

سىرتقى ىستەر ءمينيسترىنىڭ ازەربايجانعا رەسمي ساپارى قالاي ءوتتى

9 رەت كورسەتىلدى

قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى باكۋ قالاسىنا رەسمي ساپارمەن بارىپ كەلدى. ونىڭ ازەربايجان رەسپۋبليكاسىنىڭ پرەزيدەنتى يلحام اليەۆپەن جانە پرەمەر-مينيستر الي اسادوۆپەن كەزدەسۋلەرى، سونداي-اق سىرتقى ىستەر ءمينيسترى دجەيحۋن بايراموۆپەن كەلىسسوزدەرى ءوتتى، دەپ حابارلايدى Egemen.kz.

م.تىلەۋبەردى ازەربايجان كوشباسشىسىنا قازاقستان پرەزيدەنتى قاسىم-جومارت توقاەۆ پەن تۇڭعىش پرەزيدەنت – ەلباسى نۇرسۇلتان نازارباەۆتىڭ جىلى لەبىزدەرى مەن تىلەكتەرىن جەتكىزدى. ول حالىقارالىق قۇقىق پەن بۇۇ قاۋىپسىزدىك كەڭەسىنىڭ قارارلارى نەگىزىندە ەلدىڭ اۋماقتىق تۇتاستىعىن قالپىنا كەلتىرۋىمەن قۇتتىقتاپ، جوعارى دەڭگەيدەگى ۋاعدالاستىقتاردىڭ ىسكە اسىرىلۋىن تالقىلادى.

ءوز كەزەگىندە پرەزيدەنت ي.اليەۆ قازاقستان مەن ازەربايجاندى بۇرىننان كەلە جاتقان سەنىمدى قارىم-قاتىناستار بايلانىستىراتىنىن اتاپ ءوتتى. «بۇل دوستىقتىڭ نەگىزىن نۇرسۇلتان نازارباەۆ پەن گەيدار اليەۆ قالادى، ال بۇگىندە بۇل باعىتتى ەكى ەلدىڭ پرەزيدەنتتەرى جالعاستىرۋدا»، - دەدى ار پرەزيدەنتى. ول پرەزيدەنت ق.توقاەۆتىڭ ازەربايجانعا جوسپارلانعان ساپارى قر مەن ار ىنتىماقتاستىعىنا قوسىمشا سەرپىن بەرەتىنىنە سەنىم ءبىلدىردى.

تاراپتار ساۋدا-ەكونوميكالىق بايلانىستاردى ودان ءارى نىعايتۋ جانە ترانزيت-كولىكتىك الەۋەتىن دامىتۋ جونىندەگى كۇش-جىگەردى ۇيلەستىرۋ قاجەتتىگىنە كەلىستى.

ار پرەمەر-ءمينيسترى الي اسادوۆپەن كەزدەسۋ بارىسىندا ەكىجاقتى ىنتىماقتاستىقتىڭ، اتاپ ايتقاندا ينۆەستيتسيالىق، ساۋدا-ەكونوميكالىق، ترانزيت-كولىكتىك جانە ەنەرگەتيكا سالالارىنداعى كەڭ اۋقىمدى ماسەلەلەرى قارالدى. قازاقستان ءسىم باسشىسى ازەربايجان بيزنەسىنىڭ وكىلدەرىنە قر اۋماعىندا كوتەرمە-تاراتۋ ورتالىقتارى جەلىسىن قۇرۋعا قاتىسۋدى ۇسىندى.

ار ۇكىمەتىنىڭ باسشىسى ساۋدا قاتىناستارىن، اسىرەسە قازاقستاننىڭ باتىس وڭىرلەرىنە ازەربايجان ونىمدەرىن جەتكىزۋدەگى الەۋەتتى اتاپ ءوتتى. قازاقستاندىق كومپانيالاردى تاۋلى قاراباقتى قالپىنا كەلتىرۋگە بەلسەندى قاتىسۋعا شاقىردى، بۇل بۇگىنگى تاڭدا ازەربايجان قوعامى ءۇشىن باسىمدىق بولىپ تابىلادى.

ازەربايجاننىڭ سىرتقى ىستەر ءمينيسترى د.بايراموۆپەن كەلىسسوزدەردە تاراپتار ەكىجاقتى ىنتىماقتاستىقتىڭ، وڭىرلىك جانە حالىقارالىق كۇن ءتارتىبىنىڭ، ونىڭ ىشىندە كاسپي پروبلەماتيكاسى مەن بۇۇ، ەقىۇ، تمد، اوسشك، تۇركى كەڭەسى جانە باسقا دا كوپجاقتى ۇيىمدار شەڭبەرىندەگى ءوزارا ءىس-قيمىلدىڭ كەڭ اۋقىمدى ماسەلەلەرى بويىنشا «ساعاتتاردى تەڭەستەردى».

م.تىلەۋبەردى ازەربايجان، ارمەنيا جانە رەسەي اراسىنداعى 2020 جىلعى 10 قاراشاداعى جانە 2021 جىلعى 11 قاڭتارداعى قول جەتكىزىلگەن ۇشجاقتى ۋاعدالاستىقتاردى قۇپتادى. قاراباق توڭىرەگىندەگى جاعدايدىڭ تۇراقتانۋى وڭتۇستىك كاۆكازدىڭ قازاقستانمەن جانە ورتالىق ازيا ەلدەرىمەن نەعۇرلىم اۋقىمدى ترانسوڭىرلىك ينتەگراتسياسى، وڭىردەگى كولىك بايلانىستارىنىڭ قايتا اشىلۋىن ەسكەرە وتىرىپ، ەكى ەلدىڭ كاسپي پورتى ينفراقۇرىلىمىنىڭ ءوسىپ كەلە جاتقان الەۋەتىن اشىپ كورسەتۋ ءۇشىن جاڭا جاعدايلار تۋعىزاتىنىنا سەنىم ءبىلدىردى.

ءوز كەزەگىندە د.بايراموۆ وڭتۇستىك كاۆكاز وڭىرىندەگى اعىمداعى جاعداي، ازەربايجاننىڭ قابىلدانعان ۇشجاقتى ۋاعدالاستىقتاردى ىسكە اسىرۋ بويىنشا قولعا الىنعان قادامدارى تۋرالى حاباردار ەتتى.

تاراپتار ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ كەزەكتى 17-ءشى وتىرىسىن وتكىزۋ، ترانسكاسپي حالىقارالىق كولىك باعىتى شەڭبەرىندەگى جوبالاردى ىسكە اسىرۋ بويىنشا جوسپارلاردى بەلگىلەدى، قازاقستاندىق كومپانيالاردىڭ قاراباقتىڭ بوساتىلعان اۋماقتارىنىڭ ازاماتتىق ينفراقۇرىلىمىن قالپىنا كەلتىرۋگە قاتىسۋ پەرسپەكتيۆالارىن قارادى.

قازاقستان ءسىم باسشىسى قازاقستاندىق جۇك ەلەكتروۆوزدارى مەن استىقتى ازەربايجان نارىعىنا جەتكىزۋدى، كاسپي تەڭىزىنىڭ ءتۇبى بويىنشا تالشىقتى-وپتيكالىق بايلانىس جەلىسىن (توبج) وتكىزۋ جونىندەگى بىرلەسكەن جوبانى جۇزەگە اسىرۋدى قاناعاتتانۋشىلىقپەن اتاپ ءوتتى. بۇل ءبىزدىڭ ەلدەرىمىزدىڭ تەلەكوممۋنيكاتسيا سالاسىنداعى ترانزيتتىك الەۋەتىن كەڭەيتەدى.

2022 جىلى قازاقستان مەن ازەربايجان اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنا وراي تاراپتار وسى مەرەيتوي كۇنىن مەرەكەلەۋگە مۇقيات دايىندالۋ قاجەتتىگى تۋرالى كەلىستى.

ساپار اياسىندا قازاقستاندىق دەلەگاتسيا ازەربايجان حالقىنىڭ جالپىۇلتتىق كوشباسشىسى گەيدار اليەۆتىڭ بەيىتىنە جانە شەحيدتەر اللەياسىنداعى ماڭگىلىك الاۋ مونۋمەنتىنە گۇل شوقتارىن قويۋ راسىمىنە قاتىستى.

سوڭعى جاڭالىقتار

ەرتەڭىن ويلاعان ەكپە الادى

كوروناۆيرۋس • بۇگىن، 16:53

ۇقساس جاڭالىقتار