ۇلتتىڭ ۇلى ويشىلى اباي قۇنانباي ۇلىنىڭ قارا سوزدەرىنە نەگىزدەلگەن قويىلىم تەاتر سىنشىلارى مەن فەستيۆالعا قاتىسۋشىلاردىڭ تاراپىنان جوعارى باعاعا يە بولدى.
«ناۋرۋز» – رەسەي فەدەراتسياسىنا قاراستى ۇلتتىق تەاترلار اراسىنداعى جالعىز اۋقىمدى
تەاتر فەستيۆالى. فەستيۆالگە قازاقستان, قىرعىزستان, ازەربايجان, تۇرىكمەنستان, وزبەكستان, تاجىكستان جانە رەسەيدىڭ ۇلتتىق رەسپۋبليكالارىنان 25 تەاتر قاتىستى. دوداعا قاتىسۋعا ءوتىنىم جىبەرگەن ەلىمىزدەگى 33 تەاتردىڭ ىشىنەن حالىقارالىق سىنشىلار كوميسسياسى ىرىكتەگەن قۋىرشاق جانە قاللەكي تەاترلارى ساراپتامادان ءوتىپ, ارنايى شاقىرتۋ العان.
سونداي-اق ونەر ورداسى الداعى 22-30 ماۋسىم كۇندەرى ارالىعىندا رەسەيدەگى حالىقارالىق «كۋكART» قۋىرشاق تەاتر فەستيۆالىنە جول تارتپاق. ۇزدىكتەر باس قوساتىن ونەر وردالارىنىڭ قاتارىندا مەملەكەتتىك قۋىرشاق تەاترىنىڭ اتىنان «رومەو مەن دجۋلەتتا» (رەج.د.جۇماباەۆا) قويىلىمى قاتىسادى. سپەكتاكلدىڭ تاقىرىبى مەن كورەرمەنگە بەرەر ويى, مازمۇنى مەن ماڭىزى ەرەكشە.
ايتا كەتەيىك, «رومەو مەن دجۋلەتتا» – تەاتر رەپەرتۋارىنا 2019 جىلدىڭ 24 قاڭتارىندا قوسىلعان ەرەسەكتەرگە ارنالعان سپەكتاكلدەردىڭ ءبىرى. قويىلىم سۇلۋلىق پەن تازالىققا تابىنۋدان, البىرتتىعى جاراسقان ەكى عاشىقتىڭ تاعدىرى ارقىلى اۋلەت پەن توبىردىڭ بىتپەس داۋىن ارقاۋ ەتۋدەن تۋىنداعان. جارىققا شىققالى بىرنەشە حالىقارالىق تەاتر فەستيۆالىندە باق سىناعان سپەكتاكل قۋىرشاق تەاترىنىڭ جاڭا باعىتتاعى باتىل تاجىريبەلەرىن كورسەتىپ كەلەدى.
كۋكART حالىقارالىق قۋىرشاق فەستيۆالى – 1993 جىلدان بەرى وتكىزىلىپ كەلە جاتقان قايىرىمدىلىق باعىتتاعى كوممەرتسيالىق ەمەس جالعىز فەستيۆال. بيىل فەستيۆالگە 27 جىل تولادى. ول كوپ ۇلتتى رەسەيدىڭ ءارتۇرلى ايماقتارىنداعى قۋىرشاق تەاترلارىن بىرىكتىرەدى. ءتۇرلى ەلدەر مەن حالىقتار اراسىنداعى مادەني كوپىرگە اينالعان بيىلعى فەستيۆالدا رەسەي فەدەراتسياسىنىڭ قۇرامىنداعى 10-نان استام تەاتر ۇجىمىمەن قاتار, يزرايل, گەرمانيا, بولگاريا, فينليانديا, ەستونيا, قىتاي, سەربيا تەاترلارى ونەر جارىستىرادى. مادەني جوبانىڭ باعدارلاماسى ءداستۇرلى ءۇش باعىتتان تۇرادى: نەگىزگى, ارنايى جانە كلۋبتىق قويىلىمدار. مەملەكەتتىك قۋىرشاق تەاترىنىڭ «رومەو مەن دجۋلەتتا» قويىلىمى نەگىزگى باعدارلاماعا ەنگەن. سپەكتاكل 27 ماۋسىم كۇنى زازەركالە تەاترىنىڭ ساحناسىندا قويىلادى.
تەاتر فەستيۆالىنىڭ باستى ماقساتى – قۋىرشاق تەاترى ونەرىنىڭ الەمدىك كەڭىستىكتە دامۋ جولىن ساقتاي وتىرىپ, ءار ەلدىڭ رەپەرتۋار ساياساتىمەن كەڭىنەن تانىسۋ, ونەر وشاقتارىنىڭ شىعارماشىلىق تىنىسىن باعامداۋ.
فەستيۆال اياسىندا قويىلىمداردىڭ كورسەتىلىمىنەن تىس فەستيۆال قاتىسۋشىلارىنىڭ اراسىندا دوڭگەلەك ۇستەلدەر مەن شەبەرلىك ساعاتتارى, ت.ب. ءىس-شارالار ۇيىمداستىرىلماق.
