پارلامەنت • 21 ماۋسىم، 2021

ازاماتتاردىڭ كونستيتۋتسيالىق باقىلاۋعا قول جەتكىزۋىن كەڭەيتۋ قاجەت – قايرات ءمامي

10 رەت كورسەتىلدى

پارلامەنت پالاتالارىنىڭ بىرلەسكەن وتىرىسىندا قر كونستيتۋتسيالىق كەڭەسىنىڭ رەسپۋبليكاداعى كونستيتۋتسيالىق زاڭدىلىقتىڭ جاي-كۇيى تۋرالى جىل سايىنعى جولداۋى تىڭدالدى، دەپ حابارلايدى Egemen.kz.

«بيىلعى جىل قازاقستان رەسپۋبليكاسى مەملەكەتتىك تاۋەلسىزدىگىنىڭ 30 جىلدىعىمەن ەرەكشەلەنىپ وتىر. ۇلى دالا ەلىنىڭ دەربەس مەملەكەتتىلىگىن قالىپتاستىرۋداعى شەشۋشى قادامدار ەلىمىزدىڭ تۇڭعىش پرەزيدەنتى-ەلباسى نۇرسۇلتان نازارباەۆتىڭ باستاۋىمەن 1995 جىلى 30 تامىزدا بۇكىلحالىقتىق رەفەرەندۋمدا قابىلدانعان قولدانىستاعى وسى كونستيتۋتسيا اياسىندا جۇزەگە اسىرىلدى.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ اتاپ وتكەندەي، «وسىناۋ تولاعاي تابىستاردىڭ بارىنە ەلباسىنىڭ دارا كوشباسشىلىعىنىڭ ءھام حالقىمىزدىڭ دانالىعى مەن پاراساتىنىڭ، بىرلىگى مەن ىنتىماعىنىڭ، وتانداستارىمىزدىڭ قاجىرلى ەڭبەگىنىڭ ارقاسىندا قول جەتكىزدىك»، دەدى كونستيتۋتسيالىق كەڭەستىڭ توراعاسى قايرات ءمامي.

ونىڭ ايتۋىنشا، جاقىندا بەكىتىلگەن قازاقستان رەسپۋبليكاسىنىڭ 2025 جىلعا دەيىنگى ۇلتتىق دامۋ جوسپارى، قازاقستان رەسپۋبليكاسىنىڭ 2025 جىلعا دەيىنگى جالپىۇلتتىق باسىمدىقتارى، قازاقستان رەسپۋبليكاسىندا مەملەكەتتىك باسقارۋدى دامىتۋدىڭ 2030 جىلعا دەيىنگى تۇجىرىمداماسى ءتيىستى مىندەتتەردى شەشۋگە قىزمەت ەتەدى.

بۇل قۇجاتتاردى ىسكە اسىرۋ قازىرگى كەزەڭنىڭ سىن-قاتەرلەرىن ەڭسەرۋگە باعىتتالعان جانە ورتا مەرزىمدى پەرسپەكتيۆادا، حالىقتىڭ تۇرمىس ساپاسى مەن تابىسىنىڭ شىنايى ارتۋىمەن قوسا جۇرەتىن، ەلدىڭ ورنىقتى جانە ساپالى ەكونوميكالىق ءوسۋ جولىنا باعىت الۋىن قامتاماسىز ەتۋگە ارنالعان.

«مەملەكەتتىك ەگەمەندىكتىڭ نەگىزگى دىڭگەكتەرىن ايقىنداۋدا جانە ىسكە اسىرۋدا كونستيتۋتسيالىق كەڭەستىڭ شەشىمدەرى ماڭىزدى ءرول اتقارادى.

كونستيتۋتسيالىق كەڭەستىڭ قاۋلىلارىندا ەلدىڭ كونستيتۋتسيالىق قۇرىلىسىنىڭ نەگىزدەرى، ادامنىڭ جانە ازاماتتىڭ قۇقىقتارى مەن بوستاندىقتارىن قورعاۋ، رەسپۋبليكا پرەزيدەنتىنىڭ، پارلامەنتتىڭ، ۇكىمەتتىڭ مارتەبەسى مەن وكىلەتتىكتەرى، بيلىك تارماقتارىنىڭ ءوزارا قارىم-قاتىناسى، زاڭ شىعارۋ پروتسەسى، سوتتاردىڭ جانە وزگە دە مەملەكەتتىك ورگانداردىڭ قۇزىرەتى مەن قىزمەتىنىڭ مازمۇندارى جان-جاقتى ءتۇسىندىرىلدى»، دەدى قايرات ءمامي.

كونستيتۋتسيالىق كەڭەس ەلدە قۇقىقتىق مەملەكەت قاعيداتتارىن نىعايتۋ جونىندە ناقتى ۇسىنىستار ەنگىزدى.

«كونستيتۋتسيالىق كەڭەستىڭ شەشىمدەرىن ورىنداۋ پروتسەسى جالعاسۋدا. رەسپۋبليكا پرەزيدەنتى مالىمدەگەن جانە جۇرگىزىپ وتىرعان قوعام مەن مەملەكەتتى ودان ءارى دەموكراتيالاندىرۋ باعىتى كونستيتۋتسيالىق باقىلاۋ ورگانىنىڭ ءرولىن ارتتىرۋدى جانە كونستيتۋتسيالىق كەڭەس تۋرالى زاڭنامانى جەتىلدىرۋدى تالاپ ەتەدى. ازاماتتاردىڭ كونستيتۋتسيالىق باقىلاۋعا قول جەتكىزۋىن كەڭەيتۋ قاجەت.

بۇل باعىتتا سوتتاردىڭ كونستيتۋتسيالىق كەڭەسكە ءوتىنىش جاساۋ ءتارتىبىن، تاراپتاردىڭ قولدانىستاعى زاڭنىڭ كونستيتۋتسيالىعىن تەكسەرۋ تۋرالى وتىنىشتەرىن قاراۋ ءتارتىبىن وڭتايلاندىرۋ وزەكتى. ەۋروپا كەڭەسىنىڭ ۆەنەتسيا كوميسسياسى بۇل ماسەلەلەر بويىنشا وڭ قورىتىندىسىن بەردى»، دەدى ول.

سوڭعى جاڭالىقتار

«ساتەمىر حان» كىم؟

رۋحانيات • كەشە

«ەسىل وزەن»

ونەر • كەشە

تاسادا قالعان تۇلعا

تاريح • كەشە

ساحنا سۋرەتكەرى

ونەر • كەشە

ۇقساس جاڭالىقتار