راسىمەن, ىندەت جۇقتىرعاندار سانى ازايىپ, جاعداي تۇراقتالدى ما دەگەندە الەمنىڭ ءبىر بۇرىشىنان ەپيدەميالىق احۋالدىڭ ۋشىعىپ كەلە جاتقانىن ەستيسىڭ. تولقىننان – تولقىنعا ۇستانىمىمەن ءومىر ءسۇرىپ جۇرگەندەيمىز.
فۋتبولدان ەۋروپا چەمپيوناتى ءوتىپ جاتقان كورشىلەس رەسەي قايتا دابىل قاعا باستادى. العاشقىلاردىڭ ءبىرى بولىپ ءوز ۆاكتسيناسىن شىعارعانىمەن, ەل بيلىگى حالىقتى جاپپاي ۆاكتسينالاۋدى ءساتتى وتكىزە الماعان سەكىلدى. قازىرگى ۋاقىتتا ماسكەۋدە ىندەت جۇقتىرعاندار سانى وتكەن جىلدىڭ جەلتوقسان ايىنداعى دەڭگەيگە جەتتى, ال اۋرۋحاناعا تۇسكەن ناۋقاستار سانى وتكەن اپتامەن سالىستىرعاندا 70 پايىزعا وسكەن. كەيبىر ساراپشىلار ەكى-ءۇش اپتادان كەيىن ەل استاناسىنداعى اۋرۋحانالاردا ورىن جەتپەۋى مۇمكىن دەپ ەسكەرتىپ وتىر.
سپورتتىق ءىس-شارا ءوتىپ جاتقان سانكت-پەتەربۋرگتىڭ بيلىگى دە قاۋىپسىزدىك شارالارىن كۇشەيتە باستادى. 15 تامىزعا دەيىن قالاداعى مەملەكەتتىك مەكەمەلەردىڭ جانە ۋنيتارلىق كاسىپورىنداردىڭ قىزمەتكەرلەرىن ۆاكتسينالاۋ جۇرگىزىلەدى. سونداي-اق سانكت-پەتەربۋرگ اكىمشىلىگى 20 ماۋسىمنان باستاپ ەۋروپا فۋتبول چەمپيوناتىنىڭ فان-ايماعىنداعى كورەرمەندەر سانىن 5-تەن 3 مىڭ ادامعا دەيىن قىسقارتتى.
رەسەيلىك دەنساۋلىق ساقتاۋ ماماندارى بىرنەشە ايدان بەرى ۆيرۋستىڭ ءۇندىستاندا تابىلعان دەلتا ءتۇرى رەسەيگە جەتىپ, تەز تارالاتىنىن ەسكەرتىپ كەلگەن. كەيبىر دارىگەرلەر شەتەلدەن جانە رەسەي ايماقتارىنان كەلگەن فۋتبول جانكۇيەرلەرى قالادا ۆيرۋستىڭ دەلتا نۇسقاسىن تاراتادى دەپ قاۋىپتەنەدى.
وسىنداي قاتەر برازيلياعا دا ءتونىپ وتىر. ەلدەگى COVID-19-بەن بايلانىستى ءولىم سانى 500 مىڭنان استى, بۇل – الەمدەگى ەكىنشى كورسەتكىش. مامانداردى ۆاكتسينالاۋدىڭ باياۋ ءجۇرۋى الاڭداتۋدا. پاندەميا باستالعالى بەرى ەل بيلىگىنىڭ ارەكەتىنە كوڭىلى تولماعان حالىق قاۋىپسىزدىك شارالارى ءۇشىن بيلىكتى كىنالاپ وتىر. افريكا مەن ءۇندىستاندا دا داعدارىس جالعاسىپ جاتىر.
جاز ايلارىنداعى تۋريزم ماۋسىمىنان ەكىنشى جىل قۇر قالعىسى كەلمەگەن ەۋروپا تۇرعىنداردى ۆاكتسينالاۋدى قارقىندى جۇرگىزىپ, شەكارادان تەك ەكپە العانداردى وتكىزبەكشى. جاقىندا The Washington Post باسىلىمى جۇرگىزگەن تالداۋ ۆاكتسينالاۋ قارقىندى جۇرگەن ايماقتا ىندەت جۇقتىرعاندار سانى از, ال كەرىسىنشە ەكپە الماعاندار اراسىندا جوعارى دەگەن قورىتىندىعا كەلگەن. بولاشاقتا ۆاكتسينا الماعان جاندار ءۇشىن شەكتەۋ كوبەيمەي مە دەگەن سۇراق تۋادى. ويتكەنى قازىردىڭ وزىندە ماماندار ۆاكتسينانىڭ ماڭىزىن ارتتىرىپ, ىندەتپەن كۇرەسۋدىڭ وزگە جولى جوق ەكەنىن ايتىپ ءجۇر.
ماۋسىمنىڭ ءۇشىنشى جەكسەنبىسىندە مەديتسينا قىزمەتكەرلەرىنىڭ كۇنىن اتاپ وتكەن ەلدەر اق حالاتتى ابزال جانداردىڭ ەرەن ەڭبەگىن قايتالاپ ايتۋدان شارشامايدى. سالاداعى داعدارىستى, اۋىرتپالىقتى ءوز موينىنا العان مامانداردىڭ كەڭەسى مەن ەسكەرتۋىنە ءمان بەرمەسەك بولمايدى. وسىدان تۋرا ءبىر جىل بۇرىن ەلىمىزدەگى جاعداي كۇرت ۋشىعىپ, ەڭ كۇردەلى كەزەڭدەردىڭ ءبىرى بولعانى ەسىمىزدە. سول سەبەپتى ىندەت تولىق جويىلماي, بوساڭسۋدىڭ رەتى جوق.
