ەكى بولىمنەن تۇراتىن كورمە قازاق باتىرلارى جانە سامۋرايلاردىڭ اسكەري ساۋىت-سايماندارى, قارۋ-جاراقتارىمەن عانا ەمەس, سونىمەن قاتار قازاقستان مەن جاپونيا تاريحى, سالت-داستۇرلەرى, ادەت-عۇرىپتارى, ۇلتتىق مادەني ءھام تۇرمىس بۇيىمدارىمەن تانىستىرسا, كۇمىس زالدا سامۋرايلىق ءۇردىس ناسيحاتتالىپ, جاپون ونەرى مەن ءداستۇرى ۇسىنىلدى.
وعان قوسا كورمە زالىندا «بەس قارۋ» جاۋىنگەرلىك قۇرال-سايمان جيىنتىعى, ساربازدىڭ قورعانىس جاراعى, سونداي-اق باتىرلىق ءداستۇردىڭ پايدا بولۋىنا ىقپال ەتكەن كوشپەندى مادەنيەتتىڭ تاريحى مەن جەتىستىكتەرى جايلى باياندايتىن جادىگەرلەر ۇسىنىلسا, ورتاعاسىرلىق جاۋىنگەرلەر ءتيپى – باتىرلار مەن سامۋرايلار بەينەسىن ءبىر-بىرىمەن تىعىز بايلانىستىرا كورسەتۋىمەن قۇندى بولدى.
