«قايتا وڭدەلگەن پلاستيكتەن جاسالعان كارتانىڭ ەكولوگيالىق فۋنكتسياسى دا بار. بانك كارتاسىمەن جاسالعان ءاربىر تولەمنىڭ ترانزاكتسيا سوماسىنان 0,5 پايىز – Eurasian Environmental Fund-قا, تاعى 0,5 پايىزى Eurasian Pay, Apple Pay, Samsung Pay ارقىلى جاسالعان بايلانىسسىز تولەمدەر ءۇشىن كليەنتكە بونۋس رەتىندە جىبەرىلەدى. ەكوكارتامەن مەيلىنشە كوبىرەك تولەم جاسالعان سايىن سونشالىقتى ەكولوگيالىق باعدارلامالاردى قولداۋعا قارجى باعىتتالىپ وتىرادى», دەيدى ەۋرازيالىق بانك باسقارما توراعاسى يۆان بەلوحۆوستيكوۆ.
اتالعان ەكو كارتانى پايدالانۋ ارقىلى ءاربىر قازاقستاندىق ەل ەكولوگياسىنىڭ جاقسارۋىنا از دا بولسا ۇلەسىن قوسىپ وتىرماق. «جاسىل بونۋستار» جيناقتالىپ وتىراتىن قور ءبىر اي بۇرىن عانا «استانا» حالىقارالىق قارجى ورتالىعىنىڭ بازاسىندا قۇرىلعان.
– ءبىزدىڭ ميسسيامىز – قازاقستاندا كومىرتەگى بەيتاراپتىعىنا قول جەتكىزۋ. ءبىز ەلگە شىنايى كومەگىن تيگىزە الاتىن ءتۇرلى باعدارلامالار مەن بىرلەسكەن جوبالار جاساۋ ءۇشىن ەكوبەلسەندىلەر مەن ەكولوگتاردى شاقىرامىز. قوردىڭ جۇمىسى اشىق جۇرگىزىلەدى, – دەيدى «استانا» حالىقارالىق قارجى ورتالىعى «جاسىل قارجى» قورىنىڭ باس ديرەكتورى ايدار قازىباەۆ.
Mastercard كومپانياسىنىڭ ورتالىق ازياداعى باس ديرەكتورى رافال ترەپكانىڭ ايتۋىنشا, وڭىردە الدىڭعى قاتارلى قارجىلىق شەشىمدەر ىسكە اسۋى ءۇشىن Mastercard بەلسەندى جۇمىس جۇرگىزىپ جاتىر. ترەپكا سونداي-اق ەكولوگيالىق كارتالاردى نارىققا شىعارۋ پروتسەسىنىڭ قازاقستاندا دا باستالعانىنا قۋانىش ءبىلدىردى. ال بانك كارتالارى ءۇشىن پلاستيك وندىرۋمەن اينالىساتىن «روزان ازيا» كومپانياسىنىڭ ديرەكتورى دانيار بايباتشاەۆتىڭ ايتۋىنشا, قايتا وڭدەلگەن پلاستيكتەن ەكوكارتا ءوندىرىسىن جاساۋ تىم قىمباتقا تۇسەدى. «سول سەبەپتى, مۇندا ەشكىم پايدا كورمەيدى. ويتكەنى قاتىسۋشىلار ءۇشىن بۇل كوممەرتسيالىق ەمەس, الەۋمەتتىك جوبا. ەڭ باستىسى – وسى ارقىلى ەكولوگيالىق پروبلەمالارعا جانە «جاسىل تەحنولوگيالارعا» ەل نازارىن اۋدارا الامىز», دەيدى ول.
ادەتتەگى بانك كارتالارى جۇمساق جانە بەرىك ماتەريال بولىپ سانالاتىن پوليۆينيلحلوريدتەن جاسالادى. رەسەيلىك «ەكولاين» كومپانياسى ديرەكتورىنىڭ ورىنباسارى ەلەنا ۆيشنياكوۆانىڭ ايتۋىنشا, بانك كارتالارىن ۋتيليزاتسيالاۋ وتە كوپ قيىندىق تۋدىرادى. سەبەبى كارتالار تەك 200 گرادۋستىق ىستىقتا عانا جويىلادى. ال مۇنداي جوعارى تەمپەراتۋرا كەزىندە اۋاعا ديوكسين, قورعاسىن, سىناپ, كادمي, فتالات سياقتى ۋلى ەلەمەنتتەر ءبولىنىپ شىعادى. سوندىقتان سوڭعى كەزدە رەسەيلىك ماماندار پلاستيكالىق كارتالاردى تسيفرلى كارتاعا اۋىستىرۋ تۋرالى ۇسىنىستار ايتا باستادى. وسىلايشا, قايتا وڭدەلمەيتىن قالدىقتار كولەمىن ازايتىپ, ولاردى دايىنداۋعا جۇمسالعان رەسۋرستاردى ۇنەمدەيمىز, دەيدى ساراپشىلار.
سوڭعى دەرەكتەر بويىنشا قازاقستاندا 30 ملرد توننادان استام وندىرىستىك جانە تۇتىنۋ قالدىقتارى جينالعان. سونىڭ ىشىندە پلاستيكالىق قالدىقتاردى قايتا وڭدەۋ جانە جويۋ ماسەلەسى وزەكتى بولىپ تۇر. 2016 جىلى ەلدەگى پلاستيك قالدىق سانى 283 387 توننا بولسا, 2018 جىلى سونىڭ 9 مىڭ تونناعا جۋىعى عانا وڭدەلگەن.
ايتپاقشى, ەلىمىزدەگى تۇڭعىش ەكو كارتانى 10 ماۋسىمنان باستاپ eubank.kz سايتىندا ونلاين ءوتىنىم بەرۋ ارقىلى الا الاسىز. ءبىر جىل بويى كارتاعا تەگىن قىزمەت كورسەتىلەدى.
