دەنساۋلىق ساقتاۋ ينفراقۇرىلىمىن دامىتۋدىڭ جاڭا ستاندارتتارىن ەنگىزۋ ماسەلەلەرى قارالدى, ولاردى مەملەكەتتىك-جەكەشەلىك ارىپتەستىك اياسىندا ەلىمىزدە 20 ءىرى كوپبەيىندى اۋرۋحانا سالۋ ارقىلى ىسكە اسىرۋ جوسپارلانىپ وتىر. ولاردىڭ ىشىندە 4 كلينيكا ەلىمىزدىڭ جەتەكشى مەديتسينالىق ۋنيۆەرسيتەتتەرىنىڭ جانىنان سالىناتىن بولادى, بۇل عىلىمدى, ءبىلىم بەرۋدى جانە ەمدەۋ پروتسەسىن كەشەندى تۇردە دامىتۋعا, كلينيكالىق زەرتتەۋلەردىڭ تيىمدىلىگىن ارتتىرۋعا مۇمكىندىك بەرەدى.
وسىنداي زاماناۋي مەكەمەلەردىڭ ءبىرى «استانا مەديتسينا ۋنيۆەرسيتەتى» كەاق جانىنداعى بىرىككەن ۋنيۆەرسيتەت اۋرۋحاناسى بولادى.
مەديتسينالىق ورتالىق JCI حالىقارالىق ستاندارتتارىنا ساي, 800 توسەكتىك تاۋلىكتىك ستاتسيوناردى, كۇندىزگى ستاتسيوناردى, كونسۋلتاتسيالىق-دياگنوستيكالىق كەشەندى, عىلىمي-زەرتتەۋ جانە كلينيكالىق زەرتحانالاردى, اۋديتوريالار مەن وقۋ سىنىپتارىن قامتيتىن بولادى. جوبانى 2023 جىلدىڭ ءى توقسانىندا ىسكە اسىرۋ كوزدەلگەن.
«حالىقارالىق ستاندارتتارعا ساي كەلەتىن زاماناۋي مەديتسينالىق ينفراقۇرىلىمنىڭ بولۋى ەلىمىزدىڭ بۇكىل دەنساۋلىق ساقتاۋ جۇيەسىن ودان ءارى دامىتۋ ءۇشىن تۇبەگەيلى مانگە يە. الدىمىزدا دەنساۋلىق ساقتاۋ ينفراقۇرىلىمىن جانە مەديتسينا قىزمەتكەرلەرىنىڭ بىلىكتىلىگىن جاڭعىرتۋ بويىنشا اۋقىمدى مىندەتتەر تۇر, بۇل حالىققا مەديتسينالىق قىزمەتتەردى ساپالى جاڭا دەڭگەيدە كورسەتۋگە جول اشادى», دەدى ا. مامين بولاشاق مەديتسينا ورتالىقتارىنىڭ شوۋ-رۋمىن تەكسەرۋ كەزىندە.
ينسپەكتسيالىق ساپارعا پرەمەر-ءمينيستردىڭ ورىنباسارلارى رومان سكليار مەن ەرالى توعجانوۆ, نۇر-سۇلتان قالاسىنىڭ اكىمى التاي كولگىنوۆ, دەنساۋلىق ساقتاۋ ءمينيسترى الەكسەي تسوي, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ قاتىستى.
