وقيعا • 18 ماۋسىم، 2021

الماتى وبلىسىندا ۇزدىك دارىگەرلەرگە 1 ملن تەڭگەدەن بەرىلدى

113 رەت كورسەتىلدى

الماتى وبلىسىندا دەنساۋلىق ساقتاۋ سالاسى قىزمەتكەرلەرىن كاسىبي مەرەكەلەرىمەن قۇتتىقتادى، دەپ حابارلايدى Egemen.kz.

وسى مەرەيلى كۇنگە ارنالعان سالتاناتتى جيىنعا وبلىس اكىمى اماندىق باتالوۆ قاتىسىپ، جىل سايىن 10 نوميناتسيا بويىنشا وتەتىن كونكۋرستا بيىلعى ۇزدىك شىققانداردى ماراپاتتادى. الماتى ايماقتىق كلينيكالىق بالالار اۋرۋحاناسىنىڭ گەماتولوگ دارىگەرى مەرۋەرت جۇماباەۆا مەن ىلە اۋدانى قوسوزەن دارىگەرلىك امبۋلاتورياسىنىڭ مەڭگەرۋشىسى الما سەمباەۆا «ۇزدىك دارىگەر» جانە «ۇزدىك اۋىل دارىگەرى» اتالىمىنىڭ جەڭىمپازدارى اتانىپ، ارقايسىسىنا 1 ملن. تەڭگەنىڭ سەرتيفيكاتى بەرىلدى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

سالتاناتتى جيىن وبلىستاعى دەنساۋلىق ساقتاۋ سالاسىنىڭ جەتىستىكتەرى تۋرالى فيلممەن اشىلدى. مۇنان سوڭ مەديتسينا ماماندارىنا وبلىس اكىمى اماندىق باتالوۆ قۇتتىقتاۋ ءسوزىن جەتكىزدى:

- قۇرمەتتى مەديتسينا سالاسىنىڭ قىزمەتكەرلەرى مەن ارداگەرلەرى! سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن! ەلدەگى قالىپتاسقان پاندەميا جاعدايىندا بار ءبىلىمى مەن تاجىريبەسىن، ەرىك-جىگەرىن ىندەتپەن كۇرەسكە، حالىقتىڭ ساۋلىعىن قورعاۋعا باعىتتاعان بارشاڭىزعا جەتىسۋلىقتاردىڭ اتىنان جانە ءوز اتىمنان العىس ايتامىن! دەنى ساۋ ادام – قوعامنىڭ بايلىعى. سوندىقتان كەز كەلگەن مەملەكەت ەل ازاماتتارىنىڭ دەنساۋلىعىن ساقتاۋدى، ءال-اۋقاتىن ارتتىرۋدى ءبىرىنشى كەزەككە قويادى. بۇل رەتتە ەلباسىنىڭ تاپسىرماسىنا جانە پرەزيدەنتىمىز قاسىم-جومارت توقاەۆتىڭ الدىمىزعا قويعان مىندەتتەرىنە سايكەس اۋرۋدىڭ الدىن الۋعا، مەديتسينالىق قىزمەتتىڭ قولجەتىمدى ءارى ساپالى بولۋىن قامتاماسىز ەتۋگە بار جاعداي جاسالىپ كەلەدى. عيماراتتار جاڭارتىلىپ، ماتەريالدىق-تەحنيكالىق بازا نىعايتىلدى. مەديتسينا قىزمەتكەرلەرىنىڭ الاڭسىز جۇمىس ىستەۋىنە قاجەتتى بارلىق مۇمكىندىكتەر قاراستىرىلدى، - دەپ اتاپ ءوتتى ا. باتالوۆ.

ول ءوز سوزىندە بيىلعى جىلى مەديتسينا سالاسىنا بولىنگەن قارجى 168 ملرد. تەڭگەدەن اسقانىن ايتتى. سول سياقتى قازىر جەرگىلىكتى بيۋدجەت ەسەبىنەن مەديتسينالىق جوعارى وقۋ ورىندارىندا جانە رەزيدەنتۋرادا 239 ادام وقۋدا، بيىلعى جىلى تاعى 30 ستۋدەنتتى وقۋعا كىرگىزۋ جوسپارلانعان. سونداي-اق وتكەن جىلى مەديتسينا قىزمەتكەرلەرىنە 127 پاتەر ساتىپ الۋعا 756 ملن. تەڭگە جۇمسالدى. تاعى 30 جالگەرلىك ءۇي جاڭا كوتتەدجدى قالاشىقتان بەرىلدى. وعان قوسا تالدىقورعاندا دەنساۋلىق ساقتاۋ ماماندارىنا ارناپ تاعى ءبىر كوپ پاتەرلى ءۇي سالۋ جوسپارلانىپ وتىر.

- «دەنىڭ ساۋ بولسا، داۋلەت سول»، دەيدى بابالارىمىز. ال ۇلى دارىگەر گيپپوكرات: «مەديتسينا شىندىعىندا ونەر اتاۋلىنىڭ ىشىندەگى ەڭ يگىسى» دەگەن ەكەن. راسىندا ادام جانىنا اراشاشى بولعاننان ارتىق يگىلىك جوق. انتىنا ادالدىق تانىتىپ، كۇن سايىن ەرلىككە تەڭ ءىس اتقارىپ جۇرگەن سىزدەردىڭ ارقايسىلارىڭىز بارلىق قۇرمەتكە لايىقسىزدار. ءبىز جۋىردا ينفەكتسيالىق اۋرۋحانانىڭ قارسى بەتىنە ارنايى سكۆەر جاساپ، سكۆەرگە مەديتسينا قىزمەتكەرلەرىنە ارنالعان ەسكەرتكىش قويامىز. ەسكەرتكىشتىڭ جوباسى دايىن. وندا دارىگەردىڭ الاقانىندا ءومىر اعاشى ءوسىپ تۇرعانى بەينەلەنەدى، - دەدى ا.باتالوۆ.

مۇنان سوڭ ىندەتپەن كۇرەس كەزىندە قازا بولعان دەنساۋلىق ساقتاۋ سالاسىنىڭ ماماندارىنىڭ بەينەلەرءى مەن ەسىمدەرى ەكراننان كورسەتىلىپ، جينالعان قاۋىم ولاردى ءبىر مينۋت ۇنسىزدىكپەن ەسكە الدى.

سالتانات شارا ناگرادتاۋ راسىمىمەن جالعاستى. وبلىس اكىمى 10 اتالىم بويىنشا وتكەن كونكۋرستىڭ جەڭىمپازدارىنا ماراپات تاپسىردى. ماسەلەن، الماتى ايماقتىق كلينيكالىق بالالار اۋرۋحاناسىنىڭ گەماتولوگ دارىگەرى مەرۋەرت جۇماباەۆا «ۇزدىك دارىگەر» اتانسا، ىلە اۋدانى قوسوزەن دارىگەرلىك امبۋلاتورياسىنىڭ مەڭگەرۋشىسى الما سەمباەۆا «ۇزدىك اۋىل دارىگەرى» نوميناتسياسىن جەڭىپ الدى. «دەنساۋلىق سالاسىنىڭ ۇزدىك مەنەدجەرى» اتالىمىنىڭ جۇلدەسى تالدىقورعان قالاسىنداعى وبلىستىق كارديولوگيالىق ورتالىقتىڭ ديرەكتورى نۇرسان سۇراشەۆكە بەرىلدى. ولارعا 1 ملن. تەڭگەنىڭ سەرتيفيكاتى ۇسىنىلدى.

«ۇزدىك فەلدشەر» جۇلدەسىن تالعار اۋدانى، ارقاباي اۋىلى مەديتسينالىق پۋنكتىنىڭ فەلدشەرى مارياحان يبىشەۆا جانە «ۇزدىك ورتا مەديتسينا قىزمەتكەرى» جۇلدەسىن سارقان اۋداندىق ورتالىق اۋرۋحاناسىنىڭ مەيىربيكەسى اينۇر ماكەنوۆا الىپ، ارقايسىسى 750 مىڭ تەڭگەدەن اقشالاي سىيلىققا يە بولدى. سونىمەن بىرگە تالدىقورعان قالاسىنداعى «نۇر اۆيتسەنۋم» مەديتسينالىق ورتالىعىنىڭ الەۋمەتتىك قىزمەتكەرى مارينا تەرپيلوۆسكايا -«ۇزدىك الەۋمەتتىك قىزمەتكەر» اتانىپ، 500 مىڭ تەڭگەنىڭ اقشالاي سەرتيفيكاتىن يەلەندى.تالدىقورعان قالاسى 6-شى شاعىن اۋدانداعى العاشقى مەديتسينالىق-سانيتارلىق كومەك كورسەتۋ ورتالىعى - «ۇزدىك دارىگەرلىك امبۋلاتوريا»، قاپشاعاي قالاسى قوسقۇدىق اۋىلدىق فەلدشەرلىك-اكۋشەرلىك پۋنكتى - «ۇزدىك فەلدشەرلىك-اكۋشەرلىك پۋنكت»، ەسكەلدى اۋدانى تەڭلىك اۋىلىنىڭ مەدپۋنكتى - «ۇزدىك مەديتسينالىق پۋنكت»، جامبىل اۋدانى جەدەل جانە شۇعىل مەديتسينالىق كومەك بولىمشەسى «جەدەل جاردەم قىزمەتىنىڭ ۇزدىك پودستانتسياسى» اتانىپ، مەكەمەلەرگە 500 مىڭ تەڭگەدەن جۇلدە بەرىلدى.

سالتاناتتى شارادا وبلىس اكىمى وڭىردەگى 40-قا جۋىق مەديتسينا مامانىنا كاسىبي بىلىكتىلىگى جانە ماماندىعىنا ادالدىعى ءۇشىن «ەڭبەك ارداگەرى» مەدالى، قازاقستان رەسپۋبليكاسى دەنساۋلىق ساقتاۋ مينيسترلىگىنىڭ «دەنساۋلىق ساقتاۋ ءىسىنىڭ ۇزدىگى»، «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىلەرىن، وبلىس اكىمىنىڭ قۇرمەت گراموتاسى مەن العىس حاتتارىن تاپسىردى.

وبلىس اكىمى اماندىق باتالوۆقا دا دەنساۋلىق ساقتاۋ مينيسترلىگىنىڭ «دەنساۋلىق ساقتاۋ ىسىنە قوسقان ۇلەسى ءۇشىن» مەدالى بەرىلدى.

مەديتسينا ماماندارىنىڭ اتىنان سالا ارداگەرى تىلەۋبەردى جانسەڭگىروۆ جانە «ۇزدىك دارىگەر» نوميناتسياسىنىڭ جەڭىمپازى الماتى ايماقتىق كلينيكالىق بالالار اۋرۋحاناسىنىڭ گەماتولوگ دارىگەرى مەرۋەرت جۇماباەۆا ءسوز الدى. ارىپتەستەرىن كاسىبي مەرەكەلەرىمەن قۇتتىقتاي وتىرىپ، حالىقتىڭ دەنساۋلىعىن ساقتاۋعا، مەديتسينالىق قىزمەت ساپاسىن ارتتىرۋعا بۇدان ءارى دە ايانباي ەڭبەك ەتەتىندەرىن جەتكىزدى جانە وزدەرىنە كورسەتىلگەن قۇرمەت پەن قولداۋ شارالارى ءۇشىن ريزاشىلىقتارىن ءبىلدىردى.

سالا ماماندارىن ونەر يەلەرى دە قۇتتىقتاپ، ءان-جىردان شاشۋ شاشتى.

جالپى بيىلعى جىلى وبلىستا مەديتسينا سالاسىنىڭ بيۋدجەتى 168 ملرد. تەڭگەدەن استى. «Nur Otan» پارتياسىنىڭ سايلاۋالدى باعدارلاماسىنىڭ جول كارتاسى اياسىندا 2025 جىلعا دەيىن وڭىردە 109 دەنساۋلىق ساقتاۋ نىسانى سالىنادى، سونىڭ 23-ءى بيىل سالىنۋى ءتيىس، بۇل رەتتە 20-سى تەز تۇرعىزىلاتىن بلوكتى-ءمودۋلدى مەدپۋنكتتەر بولماق. قابىلدانعان شارالار مەن مەملەكەت قولداۋىنىڭ ارقاسىندا مەديتسينالىق جابدىقتارمەن، اۆتوكولىك قۇرالدارىمەن قامتۋ كورسەتكىشى 90%-كە جەتكىزىلدى. بيىلعى جىلى 3،2 ملرد. تەڭگەگە تاعى دا قوسىمشا زاماناۋي مەديتسينالىق قۇرالدار ساتىپ الىنادى. سونىڭ ناتيجەسىندە العاشقى مەديتسينالىق-سانيتارلىق كومەك كورسەتۋ ۇيىمدارىنىڭ جابدىقتالۋى 93%-عا جەتەدى.

سوڭعى جاڭالىقتار

ۇقساس جاڭالىقتار