پرەزيدەنت • 18 ماۋسىم، 2021

مەملەكەت باسشىسى «قازاقستاننىڭ ەڭبەك سىڭىرگەن دارىگەرى» اتاعىن ەنگىزۋدى ۇسىندى

65 رەت كورسەتىلدى

بۇگىن ەلوردادا «التىن جۇرەك» ەسكەرتكىشىنىڭ اشىلۋ راسىمىنە قاتىسقان قر پرەزيدەنتى قاسىم-جومارت توقاەۆ قازاقستان «رەسپۋبليكاسىنىڭ ەڭبەك سىڭىرگەن دارىگەرى» اتاعىن ەنگىزۋدى ۇسىندى، دەپ حابارلايدى Egemen.kz.

مەملەكەت باسشىسىنىڭ ايتۋىنشا، مەديتسينا قىزمەتكەرلەرىنىڭ قوعامداعى مارتەبەسىن ارتتىرۋ ءۇشىن «قازاقستان رەسپۋبليكاسىنىڭ ەڭبەك سىڭىرگەن دارىگەرى» اتاعى ەنگىزىلمەك. اتاقپەن بىرگە ماتەريالدىق سىياقى دا بەرىلەدى. ونىڭ كولەمىن ۇكىمەت بەلگىلەيدى.

بۇدان بولەك، پرەزيدەنت قاسىم-جومارت توقاەۆ دەنساۋلىق ساقتاۋ جۇيەسىندە قىزمەت ەتۋ وسكەلەڭ ۇرپاق ءۇشىن مارتەبەلى ءارى تارتىمدى بولۋى ءتيىس ەكەنىن اتاپ ءوتتى. سونىمەن قاتار پرەزيدەنت ورتا دەڭگەيدەگى مەديتسينا قىزمەتكەرلەرىنە قولداۋ كورسەتۋ ماسەلەسىنە توقتالدى. ونىڭ پىكىرىنشە، ولار دەنساۋلىق ساقتاۋ جۇيەسىنىڭ باستى رەسۋرسى جانە جۇمىستىڭ نەگىزگى بولىگىن اتقارادى.

«بىزگە مەيىرگەرلەردىڭ جاڭا بۋىنىن قالىپتاستىرۋ قاجەت. ولار تەك ورىنداۋشىلار عانا ەمەس، كوپ سالالى ەمدەۋ توبىنىڭ جاۋاپكەرشىلىك جۇكتەلگەن تەڭ قۇقىقتىق مۇشەلەرى بولۋى ءتيىس. وسى ورايدا ولاردىڭ كاسىبي دايىندىعىنىڭ دەڭگەيىن بىرتىندەپ كوتەرىپ، مەيىرگەرلىك ءىسىنىڭ مارتەبەسىن ارتتىرۋ قاجەت»، دەدى مەملەكەت باسشىسى.

پرەزيدەنت ءوز سوزىندە ەلباسىنىڭ باستاماسىمەن ىسكە اسىرىلعان ء«بىز بىرگەمىز» اكتسياسى اياسىندا پاندەمياعا قارسى كۇرەسكە زور ۇلەس قوسقان ەرىكتىلەر مەن مەتسەناتتاردىڭ قىزمەتىن اتاپ ءوتتى.

قاسىم-جومارت توقاەۆ بارشا مەديتسينا قىزمەتكەرلەرىن كاسىبي مەرەكەسىمەن قۇتتىقتاپ، «التىن جۇرەك» ەسكەرتكىشى ورنالاسقان ساياباقتى «دارىگەرلەر اللەياسى» دەپ اتاۋدى ۇسىندى. مەملەكەت باسشىسى جاڭادان اشىلعان كەشەن اق حالاتتى ابزال جاندارعا دەگەن حالىق العىسىنىڭ بەلگىسى بولاتىنىنا سەنىم ءبىلدىردى.

جيىن سوڭىندا مەملەكەت باسشىسى مەديتسينا قىزمەتكەرلەرىمەن اڭگىمەلەستى. دارىگەرلەر كورسەتىلىپ جاتقان قولداۋعا العىس ايتتى.

سوڭعى جاڭالىقتار

ۇقساس جاڭالىقتار