وقيعا • 18 ماۋسىم، 2021

قالانىڭ وركەندەۋىنە ۇلەس قوسقاندارعا «شىمكەنت قالاسىنىڭ قۇرمەتتى ازاماتى» اتاعى بەرىلدى

31 رەت كورسەتىلدى

بۇگىن قالا كۇنى مەرەكەسىنە وراي «مەرەكەڭمەن، شىمقالا!» اتتى سالتاناتتى ءىس-شارا ءوتتى. مەرەكەلىك جيىندا ەڭبەگى ەلەۋلى ازاماتتارعا قۇرمەت كورسەتىلدى، دەپ حابارلايدى Egemen.kz.

شىمكەنت قالاسى ءماسليحاتىنىڭ كەزەكتەن تىس بەسىنشى سەسسياسىندا 20 قالا تۇرعىنى «شىمكەنت قالاسىنىڭ قۇرمەتتى ازاماتى» اتانعان بولاتىن. ولار شىمكەنتتىڭ الەۋمەتتىك-ەكونوميكالىق جانە مادەني دامۋىنا ەلەۋلى ۇلەس قوسىپ، قوعامدىق قىزمەتتە بەلسەندىلىك تانىتقانى ءۇشىن وسى اتقا لايىق دەپ تانىلدى. ءبىرى زەينەتكەر-ۇستاز، ءبىرى يمام بولسا، ەندى ءبىرى پروفەسسور مەن كاسىپكەر.

شىمكەنت قالاسىنىڭ اكىمى مۇرات ايتەنوۆ وسىناۋ ماراپاتقا يە بولعانداردى قۇتتىقتاپ، ىزگى تىلەگىن جەتكىزدى.

– ەلباسىنىڭ تاريحي جارلىعىنا سايكەس، 2018 جىلعى 19 ماۋسىمدا شىمكەنت قالاسى رەسپۋبليكالىق ماڭىزى بار قالا ستاتۋسىنا يە بولعان ەدى. ودان بەرى تۇپ-تۋرا 3 جىل ۋاقىت ءوتتى. قالا كۇنى – وتكەندى سارالاپ، بۇگىندى باعالاپ، ەرتەڭگە بولجام جاسايتىن مەرەيلى مەرەكە. سوڭعى 3 جىلدىڭ كورسەتكىشتەرىنە زەر سالساق، بۇل كورەگەن شەشىم قالانىڭ ەكىنشى تىنىسىن اشتى دەپ ايتۋعا ابدەن بولادى. بىرىنشىدەن، قالا بيۋدجەتى 3،6 ەسەگە ءوسىپ، 131،2 ملرد تەڭگەدەن بيىل 481 ملرد تەڭگەگە جەتتى. ينۆەستيتسيا كولەمى سوڭعى ءۇش جىلدا ەكى ەسەگە جۋىق ءوسىپ، 214 ملرد تەڭگەدەن بيىل 400 ملرد تەڭگەگە جەتەدى. 2025 جىلعا دەيىن قالاداعى نەگىزگى ينجەنەرلىك ينفراقۇرىلىم ماسەلەسى شەشىلەدى. 3 جىل بۇرىن 402،5 مىڭ شارشى مەتر تۇرعىن ءۇي بەرىلسە، بيىل ءبىر ميلليونعا جەتكىزۋدى جوسپارلاپ وتىرمىز.

تاۋەلسىزدىكتىڭ 30 جىلدىعى قاراساڭىندا وسىنداي جەتىستىكتەردىڭ بەرىك ىرگەتاسىن قالاعان، شىمقالامىزعا ۇنەمى قامقورلىق كورسەتىپ وتىرعان ەلباسىمىز نۇرسۇلتان ءابىش ۇلى نازارباەۆتىڭ شىمكەنت قالاسىنىڭ دامۋىنداعى تاريحي ءرولىن اتاپ ءوتۋىمىز قاجەت. مەملەكەت باسشىسى ءۇشىنشى مەگاپوليستىڭ قارقىندى دامۋىنا قاتىستى ناقتى تاپسىرمالار بەرىپ، بيىك مەجەلەر مەن ماڭىزدى مىندەتتەردى بەلگىلەپ بەردى. شىمكەنتتى حالىققا قولايلى قالا ەتە ءتۇسۋ باعىتىنداعى وسىناۋ جاسامپاز جۇمىسقا بارشاڭىزدى اتسالىسۋعا شاقىرامىن. قالامىزدىڭ قارقىندى دامۋىنا قوسىپ جاتقان ۇلەستەرىڭىز ءۇشىن بارشاڭىزعا شەكسىز العىسىمدى بىلدىرەمىن، – دەدى قالا اكىمى.

قالا اكىمى مۇرات ايتەنوۆ، شىمكەنت قالاسى ءماسليحاتىنىڭ حاتشىسى باحادىر نارىمبەتوۆ قالانىڭ دامۋىنا ۇلەس قوسقان ازاماتتاردى ماراپاتتاپ، ارنايى توسبەلگىنى تابىس ەتتى. مۇرات دۇيسەنبەك ۇلى ماراپاتتاۋ ساتىندە ەڭبەگى سىڭگەن ازاماتتاردىڭ بارىنە ەرەكشە قوشامەت كورسەتتى.

سالتاناتتى ءىس-شارا ودان ءارى مەرەكەلىك كونتسەرتكە ۇلاستى.

سوڭعى جاڭالىقتار

ۇقساس جاڭالىقتار