قازاقستان • 17 ماۋسىم، 2021

باسەكەگە قابىلەتتىلىك رەيتينگىندە قازاقستان قاي ورىندا؟

42 رەت كورسەتىلدى

حالىقارالىق مەنەدجمەنتتى دامىتۋ ينستيتۋتىنىڭ (IMD، لوزاننا، شۆەيتساريا) الەمدىك باسەكەگە قابىلەتتىلىكتى زەرتتەۋ ورتالىعى 2021 جىلعى الەمدىك باسەكەگە قابىلەتتىلىك رەيتينگىسىنىڭ ناتيجەلەرىن جاريالادى، دەپ حابارلايدى Egemen.kz.

IMD رەيتينگى – كەلەسى فاكتورلاردى باعالايتىن كەشەندى زەرتتەۋدىڭ ناتيجەسى: «ەكونوميكالىق قىزمەت»، «ۇكىمەت تيىمدىلىگى»، «بيزنەستىڭ تيىمدىلىگى» جانە «ينفراقۇرىلىم». 2021 جىلى زەرتتەۋدە الەمنىڭ 64 ەلى باعالاندى. رەيتينگتە جەتەكشى ورىنعا شۆەيتساريا يە. ۇزدىك 5 ەلگە شۆەتسيا، دانيا، نيدەرلاندى جانە سينگاپۋر كىرەدى.

2021 جىلعى زەرتتەۋ ناتيجەلەرى بويىنشا قازاقستان رەسپۋبليكاسى وتكەن جىلعى رەيتينگپەن سالىستىرعاندا 7 تارماققا كوتەرىلىپ، 35-ورىندى يەلەندى. قازاقستان پورتۋگاليا (36 ورىن)، يندونەزيا (37 ورىن)، لاتۆيا (38 ورىن)، يسپانيا (39 ورىن)، سلوۆەنيا (40 ورىن)، ءۇندىستان (43 ورىن)، رەسەي (45 ورىن)، تۇركيا (51 ورىن) سياقتى ەلدەردەن الدا كەلەدى.

بيىل قازاقستان رەيتينگتىڭ بارلىق فاكتورلارى بويىنشا ءوز پوزيتسياسىن جاقسارتتى.

«ۇكىمەتتىڭ تيىمدىلىگى» فاكتورى بويىنشا قازاقستان ءوز پوزيتسياسىن 8 تارماققا جاقسارتىپ، 21 ورىنعا تۇراقتادى. جاقسارۋ بارلىق 5 سۋبفاكتور بويىنشا پوزيتسيالاردىڭ ارتۋىمەن تۇسىندىرىلەدى، اتاپ ايتساق: «مەملەكەتتىك قارجى» – 19 ورىن، «سالىق ساياساتى» – 5 ورىن، «ينستيتۋتسيونالدىق ورتا» – 46 ورىن، «بيزنەس تۋرالى زاڭناما» – 25 ورىن جانە «قوعامدىق قۇرىلىس» – 29 ورىن.

«بيزنەستىڭ تيىمدىلىگى» فاكتورى بويىنشا قازاقستان پوزيتسياسىنىڭ 6 تارماققا – 28 ورىنعا دەيىن جاقسارعانى بايقالادى. وسى فاكتور اياسىندا 4 سۋبفاكتور بويىنشا كورسەتكىشتەر جاقساردى. قازاقستاننىڭ «ەڭبەك نارىعى» سۋبفاكتورى بويىنشا پوزيتسياسى – 20 ورىن، «قارجى» – 46 ورىن، «مەنەدجمەنت پراكتيكاسى» – 13 ورىن، «قاتىناستار مەن قۇندىلىقتار» – 23 ورىن.

«ەكونوميكالىق قىزمەت» فاكتورى بويىنشا قازاقستان ءۇش پوزيتسياعا كوتەرىلىپ، 45-ورىنعا يە بولدى. جاقسارۋ بارلىق بەس سۋبفاكتور بويىنشا پوزيتسيالاردىڭ ارتۋىمەن تۇسىندىرىلەدى: «ىشكى ەكونوميكا» – 37-ورىن، «حالىقارالىق ساۋدا» – 58-ورىن، «سىرتقى ينۆەستيتسيالار» – 47-ورىن، «جۇمىسپەن قامتۋ» – 24-ورىن جانە «باعالار» – 13-ورىن.

«ينفراقۇرىلىم» فاكتورى بويىنشا قازاقستان ءتورت پوزيتسياعا كوتەرىلىپ، 47-ورىندى يەلەندى. ءۇش سۋبفاكتور بويىنشا پوزيتسيالاردى كوتەرۋ جاقسى ناتيجە كورسەتتى: «بازالىق ينفراقۇرىلىم» – 25-ورىن، «عىلىمي ينفراقۇرىلىم» – 57-ورىن، «دەنساۋلىق ساقتاۋ جانە قورشاعان ورتا» – 55-ورىن.

رەسپوندەنتتەردىڭ پىكىرىنشە، قازاقستان رەسپۋبليكاسى ەكونوميكاسىنىڭ نەعۇرلىم تارتىمدى بەس فاكتورىنىڭ قاتارىنا قولايلى بيزنەس-ورتا (رەسپوندەنتتەردىڭ 60%-ى)، ەكونوميكانىڭ سەرپىندىلىگى (46،4%)، قارجىلىق جاعدايعا قولجەتىمدىلىك، ساياساتتىڭ تۇراقتىلىعى مەن بولجامدىلىعى (42،7%) جانە سالىق جۇيەسىنىڭ باسەكەگە قابىلەتتىلىگى جاتادى (40،9%).

بۇعان دەيىن Boston Consulting Group Sustainable Economic Development Assessment 2021 (08.06.2021 ج) جاڭارتىلعان زەرتتەۋى شەڭبەرىندە قازاقستان ەكونوميكاسىنىڭ ەكونوميكالىق ورنىقتىلىق، ينفراقۇرىلىم ساپاسى، مەملەكەتتىك ينستيتۋتتار مەن قىزمەتتەر سياقتى كورسەتكىشتەرى بويىنشا باعالاۋىن ارتتىردى.

سوڭعى جاڭالىقتار

اقپاراتتىق حابارلاما

ەگەمەن قازاقستان • كەشە

دوللار تاعى دا ارزاندادى

ەكونوميكا • كەشە

ۇقساس جاڭالىقتار