برۋنو پەتكوۆيچ. بۇل جىگىت قازىر 27 جاستا. 2019 جىلدان باستاپ حورۆاتيا ۇلتتىق قۇراماسى ساپىندا ونەر كورسەتىپ ءجۇر. پوزيتسياسى – شابۋىلشى. ناتيجەسى جامان ەمەس. قۇراما ساپىندا 8 ويىن وتكىزىپ, 5 گولدىڭ اۆتورى اتانعان. 2018 جىلى الەم چەمپيوناتىندا حورۆاتيالىقتار قارسىلاستارىمەن جان بەرە ايقاسىپ, ەكىنشى ورىنعا يەلىك ەتكەنى بەلگىلى. بىراق ودان بەرى ءۇش جىل ءوتتى. قۇراما قاتارى ءبىرشاما وزگەردى. سونىڭ ءبىرى اتاقتى شابۋىلشى ماريو مانجۋكيچ «زەينەتكە» شىققاندىقتان, ونىڭ ورنىنا بىردەن-ءبىر لايىق اياقدوپشى رەتىندە برۋنو پەتكوۆيچتىڭ قابىلدانۋى. ەگەر وسى چەمپيوناتتا بۇل جىگىت ىلكىمدىلىك تانىتسا, ءسوز جوق ەۋروپانىڭ بەدەلدى كلۋبتارى قاتارىنا الارى انىق.
الەكساندر سوبولەۆ. ماسكەۋدىڭ «سپارتاك» كلۋبىنىڭ جانە رەسەي ۇلتتىق قۇراماسىنىڭ شابۋىلشىسى. 1997 جىلى بارناۋل قالاسىندا دۇنيەگە كەلگەن. بىلتىر رەسەي پرەمەر-ليگاسىندا 15 دوپتىڭ اۆتورى اتانعان. ۇلتتىق قۇراما ساپىندا 6 ويىن وتكىزىپ, 3 گول سوققان. بۇل جامان ناتيجە ەمەس. اسىرەسە بۇل فۋتبولشى بويشاڭدىعىنىڭ (195 سم) ارقاسىندا باسپەن ويناۋعا جاپ-جاقسى توسەلگەن. شەتەلدىك باسىلىمدار «سوبولەۆتىڭ 9-شى ءنومىرلى جەيدەگە يە بولۋى – قۇرامانىڭ نەگىزگى شابۋىلشىسى ارتەم دزيۋبانى الماستىراتىنىنا ايعاق», دەپ جازىپ جاتىر. كوزى قىراعى سكاۋت-بارلاۋشىلار بۇيىرسا بۇل بالا ەۋرو-2020 چەمپيوناتىنان كەيىن
وتانداستارى اندرەي ارشاۆين, يۋري جيركوۆ, الەكساندر گولوۆين سياقتى قارت قۇرلىقتىڭ بەدەلدى كلۋبتارىندا ونەر كورسەتەدى دەيدى.
يوناس ۆيند. 1999 جىلى دانيادا دۇنيەگە كەلگەن. 2015 جىلى 16 جاسىندا ۇلتتىق قۇراما ساپىنا قابىلدانعان تالانتتى جاس. ويىن پوزيتسياسى – شابۋىلشى. قازىرگى تاڭدا دانيانىڭ كاسىبي فۋتبول كلۋبى «كوپەنگاگەندە» ونەر كورسەتىپ, 30 گولدىڭ اۆتورى اتانىپ ۇلگەرگەن. بىلتىر بۇل جىگىتتى اعىلشىننىڭ «ۆەست حەم» كلۋبى قاتارىنا قوسۋ ءۇشىن كوپ ارەكەتتەندى. بىراق ەكى جاق قارجىعا كەلىسە الماعانداي بولدى. دانيا قۇراماسى ساپىندا اتاقتى شابۋىلشىلار مارتين برەيتۋەيت («بارسەلونا») جانە يۋسسۋف پولسونمەن («رب لەيپتسيگ») تىزە قوسىپ, يوناس ۆيند دا ونەر كورسەتۋدە.
ۋگاردجان چاكىر. بۇل ازامات 1996 جىلى تۋعان. فۋتبولدان تۇركيا قۇراماسىنىڭ قاقپاشىسى. ستاتيستيكاعا جۇگىنسەك, اتالعان قۇرامانىڭ ەرەكشەلىگى – ەۋرو-2020 چەمپيوناتىندا قاتارىنا ەڭ جاس ويىنشىلار جيناعان جالعىز كوماندا ەكەن. دەسەك تە بۇل قۇرامادا بولاشاعىنان ءۇمىت كۇتتىرەر اياقدوپشىلار كوپ. سونىڭ ءبىرى ءبىز اتاپ وتكەن قاقپاشى چاكىر. بۇل جىگىت چەمپيوناتقا ىرىكتەۋ كەزىندە ايرىقشا كوزگە ءتۇسىپتى. قانشاما ويىندا قاقپاسىنا ءۇش-اق گول وتكىزگەن. سونىڭ ارقاسىندا تۇركيالىقتار ەۋروپا تورىندە ونەر كورسەتىپ ءجۇر. ۋگاردجانعا قازىردىڭ وزىندە اعىلشىن پرەمەر-ليگاسىنىڭ ۇزدىكتەرى «ليۆەرپۋل», «توتتەنحەم, «لەستەر سيتي» قاتارلى كلۋبتار كوز تىگىپ وتىرعان كورىنەدى.
