ادەبيەت • 14 ماۋسىم، 2021

« ۇلى دالانىڭ كونە سارىندارى» انتولوگياسىنىڭ ءىى تومى جارىق كوردى

149 رەت كورسەتىلدى

م.و.اۋەزوۆ اتىنداعى ادەبيەت جانە ونەر ينستيتۋتىندا « ۇلى دالانىڭ كونە سارىندارى» انتولوگياسىنىڭ ەكىنشى تومىنىڭ تۇساۋى كەسىلدى. ايرىقشا تۋىندى ەلباسى ن.ءا.نازارباەۆتىڭ « ۇلى دالانىڭ جەتى قىرى» باعدارلاماسىنداعى نەگىزگى باعىتتاردىڭ ءبىرى – «دالا فولكلورى مەن مۋزىكاسىنىڭ مىڭ جىلى» جوباسى اياسىندا قانات قاعىپ وتىر، دەپ حابارلايدى Egemen.kz

« ۇلى دالانىڭ كونە سارىندارى» انتولوگياسىنىڭ ەكىنشى تومىنا ەنگەن قازاقتىڭ كونە اسپاپتارى – شاڭ قوبىز، ساز سىرناي، سىبىزعى، قوبىز، شەرتەر، ءۇش ىشەكتى دومبىرا سارىندارى جانە ايماقتىق كۇيشىلىك ونەرىندەگى دومبىراعا ارنالعان حالىق كۇيلەرى مەن كاسىبي كۇيشى-كومپوزيتورلاردىڭ تۋىندىلارى، كۇي شەبەرلەرىنىڭ ورىنداۋشىلىق نۇسقالارى وقىرمان ءۇشىن ۇلكەن ولجا بولعانىن ايتا كەتكەن ءجون. سۋىرىپ-سالمالىق ونەرگە نەگىزدەلگەن قازاقتىڭ كۇي مۇراسىنىڭ ىشىنەن اسپاپتىق مۋزىكانىڭ 335 تاڭدامالى ۇلگىسى ىرىكتەلىپ الىنعان.

كۇيلەردىڭ نوتاسى اۋديو ماتەريالدارمەن سالىستىرمالى تۇردە ناقتىلانىپ، سول كۇيدى ورىندايتىن كۇيشىنىڭ تارتۋىمەن سايكەستەندىرىلىپ حاتتالعان. كۇيشىلەر تۋرالى نەگىزگى ماعلۇماتتار مەن كۇيلەردىڭ اڭىز اڭگىمەلەردەن تۇراتىن عىلىمي-تانىمدىق تۇسىنىكتەمەلەرى دە ءبىرىنشى تومنىڭ جالعاسى ىسپەتتەس قازاق، ورىس، اعىلشىن تىلدەرىندە قوسا جاريالانىپتى.

سونداي-اق تۇڭعىش رەت قازاقتىڭ ءتول مۇراسى ۇسىنىلعان باسىلىم زاماناۋي فورماتتا ەلەكتروندى قۇرالدارعا كوشىرىپ الىپ پايدالانۋعا قولايلى بولاتىنداي ارنايى QR كودپەن، CD ديسكپەن بىرگە جارىققا شىعىپ وتىر.

تۋىندىنىڭ تۇساۋكەسەر راسىمىندە  كونە سارىنداردىڭ باستاۋ بۇلاعى،  جانرلىق ەرەكشەلىگى، تاريحي دامۋ ۇدەرىسى، ولاردىڭ ساقتالۋ مەن ناسيحاتتالۋ جولدارى، ۇلتتىق قۇندىلىقتاردىڭ كەلەشەك ۇرپاققا تاربيەلىك ءمانى جايىندا ورامدى ويلار ايتىلدى. ءمانى ەرەك ەڭبەكتىڭ جارىق كورۋىنە كاسىبي ماماندار، كۇي ونەرىن تاريحي-تەوريالىق تۇرعىدان زەرتتەگەن كۇيتانۋشى-عالىمدار، كونە اسپاپتاردىڭ ساقتالۋىنا ەرەكشە ۇلەس قوسىپ جۇرگەن بەلسەندىلەر جۇمىلدىرىلىپ، دومبىرا كۇيلەرىنىڭ ايماقتىق داستۇرلەرىن جالعاستىرعان كۇي شەبەرلەرىنىڭ تاجىريبەسى مەن ءبىلىمى ورتاعا سالىندى.

ولاردىڭ اراسىندا – قر ۇعا كورر.-مۇشەسى، فيلولوگيا عىلىمدارىنىڭ دوكتورى ك.ءى. ماتىجانوۆ، ونەرتانۋ دوكتورلارى گ.ن.وماروۆا، س.ى.وتەعاليەۆا، فيلولوگيا عىلىمدارىنىڭ دوكتورى ت.ا.قوڭىراتباي، جوبا جەتەكشىسى، ونەرتانۋ كانديداتى ا.ج.قازتۋعانوۆا، ونەر وردالارىنىڭ رەكتورلارى ارمان جۇدەباەۆ، اقان ءابدۋالى، داۋلەسكەر كۇيشىلەر ءشامىل ابىلتاەۆ، سەكەن تۇرىسبەكوۆ، ايگۇل ۇلكەنباەۆا، ابدۋلحاميت رايىمبەرگەنوۆ، نۇركەن ءاشىروۆ  قاتارلى ونەرسۇيەر ازاماتتار بار.

سوڭعى جاڭالىقتار

ەرتەڭ ۇكىمەت وتىرىسى وتەدى

ۇكىمەت • بۇگىن، 15:00

شاپپا شوت پەن «قۇيرىقتى» پىشاق

ايماقتار • بۇگىن، 08:32

جاڭاوزەندەگى جىلىجاي

ايماقتار • بۇگىن، 08:30

ۇقساس جاڭالىقتار