ء«بىز جۇيەلى تۇردە جۇمىس ىستەيتىن ماسەلەلەردىڭ ءبىرى – الەۋمەتتىك تۇرعىن ۇيلەر قۇرىلىسى. بۇگىن ەسىل اۋدانىنىڭ جاعالاۋ شاعىن اۋدانىندا ورنالاسقان بىرقاتار قولجەتىمدى تۇرعىن ءۇيدىڭ قۇرىلىسى قالاي جۇرگىزىلىپ جاتقانىمەن تانىستىم.
قۇرىلىس قارقىنىن ۇدەتۋدى, ۇيلەردىڭ ساپاسىنا جانە اينالاسىنىڭ اباتتاندىرىلۋىنا ءمان بەرۋدى تاپسىردىم. بۇدان بۇرىن ۇيلەردىڭ ءبىرىنشى قاباتتارىن بيزنەسكە بەرمەي, تۇرعىندارعا قاجەتتى الەۋمەتتىك نىساندار: وڭالتۋ ورتالىقتارىن, مەديتسينالىق ورتالىقتار, بالالاردىڭ بوس ۋاقىتىن وتكىزەتىن ورتالىقتار, پوليتسيا توراپتارىن اشۋ تۋرالى شەشىم قابىلداعانبىز», دەپ جازدى التاي كولگىنوۆ.
ەلوردا اكىمىنىڭ ايتۋىنشا, مەملەكەت باسشىسىنىڭ تاپسىرماسى بويىنشا قولجەتىمدى تۇرعىن ءۇيدى كوبىرەك سالىنۋدا. مىسالى, كەزەكتە تۇرعاندار ءۇشىن 2018 جىلى 1800 الەۋمەتتىك پاتەر سالىنسا, 2019 جىلى – 2900, 2020 جىلى 7 مىڭنان استام الەۋمەتتىك پاتەر سالىنعان. بيىل ەرەكشە سۇرانىستارى بار بالالاردى ءوسىرىپ وتىرعان انالارعا, مۇگەدەكتەرگە, باسقا دا مۇقتاج جاندارعا ارناپ 10 مىڭنان استام پاتەر سالىنادى. بۇل تىزىمگە «وتباسى بانكىنىڭ» («تۇرعىن ءۇي قۇرىلىس جيناق بانكى») كەزەكتە تۇرعان سالىمشىلارى دا كىرەدى. مۇقتاج جاندارعا جەڭىلدىكتى پاتەرلەر كىلتى جىل بويى تاپسىرىلادى.
«الەۋمەتتىك تۇرعىن ۇيلەر قالانىڭ بارلىق اۋدانىندا, ايتالىق, وتاۋ, جاعالاۋ شاعىن اۋداندارىندا, ش.قۇدايبەردى ۇلى, ر.قوشقارباەۆ كوشەلەرىندە, پريگورودنىي تۇرعىن ءۇي الابىندا, جاڭا ۆوكزال توڭىرەگىندە بوي كوتەرەدى», دەدى قالا اكىمى.
بۇدان باسقا, بيىل ەلباسى باستاماشىلىق جاساعان «جۇمىس ىستەيتىن جاستارعا ارنالعان جالعا بەرىلەتىن تۇرعىن ءۇي» باعدارلاماسى جالعاسادى. ونىڭ اياسىندا جىل سوڭىنا دەيىن 1 مىڭنان استام جاس باسپانالى بولادى. بۇعان قوسا, جاستارعا ارنالعان ارنايى تۇرعىن ءۇي باعدارلاماسى (الەۋمەتتىك نەسيەلەۋ) باستالادى.
«قالا تۇرعىندارىنىڭ تۇرعىن ءۇي جاعدايلارىن جاقسارتۋ ءۇشىن قازاقستان يپوتەكالىق كومپانياسى (كيك) جەلىسى بويىنشا قاتىساتىندار ساناتى كەڭەيتىلدى. ەندى وعان مەديتسينا قىزمەتكەرلەرى, پەداگوگتار, الەۋمەتتىك قىزمەتكەرلەر, ءورت سوندىرۋشىلەر, ءتارتىپ ساقشىلارى, مادەنيەت جانە سپورت قايراتكەرلەرى قاتىسا الادى. سونىمەن بىرگە تۇرعىن ءۇي سەرتيفيكاتتارىنىڭ سوماسى 1 ميلليوننان 1,5 ملن تەڭگەگە دەيىن ۇلعايتىلدى», دەپ جازدى ەلوردا اكىمى.
