ناتيجەسىندە 45 مىڭ جۇمىس ورنى جاڭادان اشىلۋى ءتيىس. سونىڭ ىشىندە 66 جوبا بيىل تولىق اياقتالىپ, ەڭبەك نارىعىنا 3500 ادامعا سۇرانىس ارتپاق. بۇعان 112,8 ملرد تەڭگە جۇمسالۋدا. ەندى وبلىستىڭ ينۆەستيتسيالىق قورجىنىنا دۇنيەجۇزىلىك بانكتىڭ قارجىسى قۇيىلاتىن كۇن جاقىن. بۇل جايىندا الپاۋىت قارجى ۇيىمىنىڭ قازاقستانداعى تۇراقتى وكىلى جان-فرانسۋا مارتوننىڭ جەتىسۋعا جاساعان رەسمي ساپارى بارىسىندا ايتىلدى.
– بۇگىندە ەل كولەمىندە ترانسۇلتتىق كومپانيالاردىڭ قاتىسۋىمەن 16 جوبا ىسكە اسىپ جاتىر. ال ونىڭ ىشىندەگى 9 جوبا ءبىزدىڭ الماتى وبلىسىندا. ءوڭىر اگروونەركاسىپتىك سالادا, قانت قىزىلشاسى, سويا, جۇگەرى وسىرۋدە كوشباسشى ورىندا تۇر. اۋىل شارۋاشىلىعى ونىمدەرىن وڭدەۋدە ىرگەلى جوبالار بار. بالامالى ەنەرگەتيكادا دا جەمىستى جۇمىستار جاسالىپ جاتىر. ءبىز سىزدەرمەن وسى سالالاردا, سول سياقتى تۋريزم, تۇرعىن ءۇي-كوممۋنالدىق شارۋاشىلىق, سونىڭ ىشىندە گازداندىرۋ, كوشەنى جارىقتاندىرۋ, كارىز جۇيەلەرىن جاڭعىرتۋ, سونىمەن بىرگە يرريگاتسيالىق جۇيەلەردى قالپىنا كەلتىرۋ باعىتتارىندا ىنتىماقتاستىق ورناتۋعا بەيىلدىمىز. جاقىن ارالىقتا تالدىقورعاندا جەو سالۋ جوسپاردا بار. بۇل دا – ماڭىزدى ءارى قاجەتتى جوبا. الدا دۇنيەجۇزىلىك بانك ماماندارىمەن ناقتى باعىتىمىزدى بىرلەسىپ انىقتاپ, جەمىستى ەڭبەك ەتۋگە تاجىريبەمىز جەتەدى دەپ ويلايمىن, – دەيدى وبلىس اكىمى اماندىق باتالوۆ.
جالپى, دۇنيەجۇزىلىك بانكتىڭ قولداۋىمەن وبلىستا بۇعان دەيىن دە بىرقاتار جوبا جۇزەگە اسقان ەكەن. ونىڭ ىشىندە «الماتى-قورعاس» جولىنىڭ ينفراقۇرىلىمدىق جوباسى, 2 مەكتەپ پەن بالاباقشانى قامتيتىن ەنەرگيا تيىمدىلىگىن ارتتىرۋ جوباسى, سول سياقتى جاستاردى قوعامدىق ومىرگە تارتۋعا, ولاردىڭ ومىرلىك ماشىقتارىن دامىتۋعا باعىتتالعان جاستار كورپۋسىنىڭ جوباسى بار. ال بانك وكىلدەرى ەندى ىنتىماقتاستىقتى ودان ءارى دامىتۋ ماقساتىندا ءبىلىم بەرۋ, تسيفرلاندىرۋ, جول ينفراقۇرىلىمى, يرريگاتسيا, الەۋمەتتىك سالالاردا, اسىرەسە, مەملەكەتتىك-جەكەمەنشىك ارىپتەستىك اياسىنداعى جوبالاردى قارجىلاندىرۋعا دايىن كورىنەدى.
– ءبىز الماتى وبلىسىنىڭ اۋماعىندا بىرلەسە جۇمىس ىستەۋگە قىزىعۋشىلىق ءبىلدىرىپ وتىرمىز. بۇعان دەيىن ءبىز ەل ۇكىمەتى ارقىلى عانا ىسكەرلىك بايلانىس ورناتتىق. ەندى وبلىس باسشىلىقتارىمەن تىكەلەي جۇمىس ىستەۋ ءۇشىن بىرقاتار قۇجاتتارعا وزگەرىستەر ەنگىزىپ جاتىرمىز, – دەيدى ءوز كەزەگىندە قارجى ۇيىمىنىڭ قازاقستانداعى تۇراقتى وكىلى جان-فرانسۋا مارتون جان-فرانسۋا مارتون.
سونداي-اق الەمگە ايگىلى قارجى ۇيىمى وكىلدەرىنىڭ كەزدەسۋىنە قاتىسقان حالىقارالىق قارجى كورپوراتسياسىنىڭ قازاقستانداعى كەڭسەسىنىڭ باسشىسى ەكاتەرينا بەندجامين دە الماتى وبلىسىمەن اراداعى ارىپتەستىك بايلانىستارىن جانداندىرۋعا ىقىلاستى ەكەنىن ايتتى.
– ءبىز وبلىستىڭ الەۋمەتتىك-ەكونوميكالىق دامۋىنا وڭ ىقپال ەتەتىن ۇزاق مەرزىمدىك جوبالاردى, سونىڭ ىشىندە قالدىقتاردى جويۋ جانە يرريگاتسيا باعىتتارىنداعى جوبالاردى بىرگە اتقارۋعا دايىنبىز, – دەپ اتاپ ءوتتى حالىقارالىق قارجى كورپوراتسياسىنىڭ قازاقستانداعى كەڭسەسىنىڭ باسشىسى ەكاتەرينا بەندجامين.
ايتپاقشى, بيىل مەملەكەت باسشىسى قاسىم-جومارت توقاەۆ «قازاقستان رەسپۋبليكاسى مەن حالىقارالىق قارجى كورپوراتسياسى اراسىنداعى قازاقستان رەسپۋبليكاسىندا وفيستەر قۇرۋ جانە ولاردىڭ قىزمەتى تۋرالى كەلىسىمدى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويعان بولاتىن. ەكىجاقتى ىسكەرلىك بايلانىستىڭ جەمىسى ەندى جەتىسۋ جەرىندە ناتيجە بەرمەك.
