نۇر-سۇلتان, پاۆلودار جانە تاراز قالالارىنداعى مەكتەپتەر مەن ليتسەيلەردىڭ 8 وقۋشىسى ءبىلىم بايگەسىندە ەلىمىزدىڭ نامىسىن قورعادى.
ءبىلىم جانە عىلىم ءمينيسترى اسحات ايماعامبەتوۆ ءوزىنىڭ Facebook پاراقشاسىندا وزات وقۋشىلاردى جەڭىسىمەن قۇتتىقتادى. مينيستر جۇلدەگەرلەرگە جاڭا بيىكتەردى باعىندىرۋ جولىندا ساتتىلىك تىلەدى.
– جاقىندا وقۋشىلار اراسىنداعى رەسپۋبليكالىق وليمپيادا ءوز مارەسىنە جەتتى. وعان ەلىمىزدىڭ 1 500-دەن اسا دارىندى وقۋشىسى قاتىستى. بۇل – مۇعالىمدەردىڭ, بالالار مەن اتا-انالاردىڭ وراسان زور ەڭبەگىنىڭ ناتيجەسى. ءبىز بالالارىمىزدىڭ جەڭىستەرى مەن جەتىستىكتەرگە جەتۋدەگى اتا-انالاردىڭ ءرولىن سيرەك اتاپ وتەمىز. الايدا ءىس جۇزىندە اتا-انا قولداۋىمەن وقۋشى ايتارلىقتاي جەتىستىكتەرگە جەتىپ جاتادى. سوندىقتان ءبىز رەسپۋبليكالىق وليمپياداعا قاتىسقان 1 500 وقۋشىنىڭ اتا-انالارىنا العىس حات جولدادىق. ايتپاقشى, وقۋشىلارىمىز حالىقارالىق دەڭگەيدەگى جەتىستىكتەرىمەن دە قۋانتىپ جاتىر. قازاقستاندىق وقۋشىلار ازيا وليمپياداسىندا ءبىر التىن جانە ءۇش قولا مەدال جەڭىپ الدى. قاتىسۋشىلاردى جەڭىستەرىمەن قۇتتىقتايمىن! جەتكىنشەكتەرىمىز بولاشاقتا بيىك بەلەستەردى باعىندىرادى دەگەن سەنىم بار. وسى رەتتە تالىمگەر ۇستازدارعا شاكىرتتەرىنىڭ كورسەتكەن جاقسى ناتيجەلەرى مەن قوسقان ۇلەستەرى ءۇشىن العىس ايتامىن, – دەدى ا.ايماعامبەتوۆ.
جارىسقا قاتىسقان وقۋشىلاردى تاجىريبەلى پەداگوگتەر دايىندادى. سولاردىڭ ءبىرى سۇلەيمەن دەميرەل ۋنيۆەرسيتەتىنىڭ PhD دوكتورى, پروفەسسور سامات ماقسۇت ۇلى بۇل وليمپيادانىڭ باسقا جارىستاردان ەرەكشە وتكەنىن جەتكىزدى.
– جالپى جارىس ونلاين فورماتتا ءوتتى. الدىڭعى جىلى تايۆاندا وفلاين فورماتتا ءوتۋى كەرەك ەدى. بىراق كارانتينگە بايلانىستى وزگەرتىلىپ, شەگەرىلدى. وقۋشىلاردى جەتىستىكتەرىنە قاراپ, بۇرىن جارىستارعا قاتىسىپ, جۇلدەلى ورىنداردى يەلەنگەن ۇزدىكتەرىن تاڭداپ الدىق. بۇل ازيالىق وليمپيادا بولعاندىقتان, كىل مىقتىلار قاتىسادى. قىتاي, سينگاپۋر, تايۆان مەملەكەتىنەن كوپتەگەن وقۋشى باق سىنادى. ءبىزدىڭ دە جارىسقا قاتىسقان بارلىق وقۋشىلارىمىز مىقتى بولدى. ولار كوماندا قۇرامىندا ەمەس, ارقايسىسى جەكە-جەكە ءوز ەسەپتەرىن شىعارىپ, قاتىستى. ناتيجەسىندە قاتىسۋشىلاردىڭ بىرەۋى التىن مەدالعا, ۇشەۋى قولا جۇلدەگە جانە ەكەۋى ماراپاتقا يە بولدى, – دەدى س.ماقسۇت ۇلى.
جاتتىقتىرۋشى-مۇعالىمنىڭ ايتۋىنشا, بۇل حالىقارالىق دەڭگەيدەگى دودا بولعاندىقتان اعىلشىن تىلىندە ءوتتى. بىراق تىلدەن قيىندىقتار بولماعان. سەبەبى تاپسىرمالاردىڭ ءبارى – ەسەپ. اراسىندا سويلەم ارقىلى بەرىلگەن شارتتى ەسەپتەر بولعاندا, وقۋشىلارعا مۇعالىمدەر كومەكتەسكەن.
– جىل سايىن وتەتىن فيزيكا-ماتەماتيكا وليمپيادالارى بار. ال سونىڭ ەڭ تارتىستىسى – ازيالىق وليمپيادا. ەندى ازيا ەلدەرى عانا ەمەس, وزگە دە قۇرلىقتاعى مىقتى مەملەكەتتەر قاتىساتىن جارىستى كۇتىپ, دايىندالىپ جاتىرمىز. وعان وسى وليمپياداعا قاتىسقان 8 بالانىڭ ىشىنەن 5 وقۋشىنى تاڭداپ الامىز, – دەدى پەداگوگ س.ماقسۇت ۇلى.
ءنۇربيبى قادىر,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
