ەلىمىزدەگى بارلىق جاڭاشىلدىقتىڭ جۋان ورتاسىندا باس قالا تۇراتىندىعى داۋسىز. استانا قالاسىنداعى جاڭا لوكوموتيۆ زاۋىتى – رەسپۋبليكامىزدىڭ وسى تەحنيكا تۇرىنە سۇرانىسىن قاناعاتتاندىرۋدان تۋعان كەشەندى يندۋستريالىق باعدارلاما.
جاسىراتىنى جوق, ءبىزدىڭ ەلدەگى جۇك جانە جولاۋشى پويىزىن تارتاتىن لوكوموتيۆ اتاۋلىنىڭ 76 پايىزىنىڭ توزىعى جەتكەن. جالپى, قولدانىستاعى لوكوموتيۆتەردىڭ 63 پايىزى 30 جىلدان استام ۋاقىت بويى پايدالانىلىپ كەلەدى (تەپلوۆوزداردىڭ پايدالانۋ مەرزىمى – 25-30 جىل, كۇردەلى جوندەۋ ارقىلى تاعى بىرنەشە جىلعا ءومىرىن ۇزارتۋعا بولادى). ەگەر كوپ كەشىكتىرمەي لوكوموتيۆ پاركىن جاڭارتىپ, ولاردى جوندەۋ جۇيەسىن جەتىلدىرمەسەك, تەمىر جولداعى تاسىمالدى يگەرۋ مۇمكىن بولماي قالادى. مىنە, وسىنداي كەلەڭسىزدىكتىڭ الدىن الۋ ماقساتىندا ەلباسى نۇرسۇلتان نازارباەۆ 2006 جىلى امەريكا قۇراما شتاتتارىنا بارعان ساپارىندا سول ەلدەگى الەمگە ايگىلى “دجەنەرال ەلەكتريك” كومپانياسىمەن ء“Evolutىon” سەريالى تەپلوۆوزدار قۇراستىرۋ جونىندەگى تەحنولوگيالارىن قازاقستان رەسپۋبليكاسىنا بەرۋ تۋرالى كەلىسىمگە قول جەتكىزدى. ءسويتىپ 2007 جىلى 3 شىلدەدە مەملەكەت باسشىسىنىڭ تىكەلەي قاتىسۋىمەن استانا قالاسىنداعى ەەا اۋماعىندا تمد مەملەكەتتەرىندە تەڭدەسى جوق لوكوموتيۆ قۇراستىرۋ زاۋىتىنىڭ ىرگەتاسى قالاندى. بۇل زاۋىتتىڭ وندىرىستىك قۋاتى جىلىنا 100 ماگيسترالدىق تەپلوۆوز شىعارۋعا ارنالعان. وتكەن جىلى جاڭا زاۋىت كونۆەيەرىنەن العاشقى قازاقستاندىق تەپلوۆوز شىعارىلدى. جاقىن بولاشاقتا ەلىمىزدىڭ تەپلوۆوز شىعاراتىن زاۋىتى وسىنداي تەحنيكا تۇرىمەن تەك قازاقستاننىڭ عانا ەمەس, سونداي-اق بۇكىل تمد ەلدەرىنىڭ سۇرانىسىن قاناعاتتاندىراتىن بولادى. رەسپۋبليكامىزدىڭ بولات جولدارىنىڭ بويىندا ەرسىلى-قارسىلى جۇيتكىگەن لوكوموتيۆتەردىڭ سوڭعى كەزدەرى جاڭارا باستاعاندىعىن كوزى قاراقتى ادامدار اڭعارا باستاعان بولار. دەگەنمەن, جاڭا ۇلگىدەگى العاشقى تەپلوۆوزدار نەگىزىنەن مۇنايلى وڭىرلەرگە تارتىلعان. ونىڭ باستى سىرى دا قۋاتتى تەحنيكانىڭ ءوزىن-ءوزى اقتاۋ مەرزىمىنىڭ تەزىرەك ورىندالۋىنان تۋىنداعان باستاما. ارينە, بۇگىندە ەلىمىزدىڭ لوكوموتيۆ پاركىن جاڭارتۋ ءجۇرىپ جاتىر, امەريكالىق “دجەنەرال ەلەكتريك” كومپانياسىنىڭ تەحنولوگياسىمەن 202 ماگيسترالدى تەپلوۆوز جاڭارتىلىپ, ءتورت ەلەكتروۆوز وتاندىق مامانداردىڭ جوباسى بويىنشا مودەرنيزاتسيادان ءوتتى. جاڭا بۋىننىڭ لوكوموتيۆتەرى دە ساتىپ الىنۋدا. تاۋەلسىز ەلىمىزدىڭ تۇڭعىش تەپلوۆوزى تۇساۋىن كەستى. قىتايلىق ارىپتەستەرمەن ەلەكتروۆوز جاساۋ تۋرالى مامىلە جاسالدى. قازاقستان اۋماعىندا جۇك تاسىمالدايتىن ەلەكتروۆوز قۇراستىرۋدىڭ تۇجىرىمداماسى ناقتىلانۋدا. قىسقا قايىرعاندا, “لوكوموتيۆ” اق-تىڭ 2020 جىلعا دەيىنگى تەحنيكالىق دامۋ ستراتەگياسىنا سايكەس, لوكوموتيۆ پاركىن جاڭارتۋعا جۇمسالاتىن قارجى شامامەن 1 تريلليون تەڭگەگە جەتپەك. بۇل شارالاردان كەيىن جوندەۋ قىزمەتىنە دەگەن سۇرانىس ازايادى. بۇل جوندەۋ مەكەمەلەرىندەگى جۇمىسشىلاردىڭ قىسقارۋىنا اكەلۋى مۇمكىن. “لوكوموتيۆ” اق پرەزيدەنتى قادىل تالاسپەكوۆتىڭ ايتۋىنشا, ول ادامدار جۇمىسسىز قالمايدى. سەبەبى, 2020 جىلعا دەيىن 3000-نان استام ماشينيست پەن ماشينيست كومەكشىسى قاجەت بولادى. سوندا لوكوموتيۆ جۇرگىزۋشىلەر ارمياسى قىسقارعان كادرلاردى قايتا وقىتىپ دايىنداۋ ارقىلى تولىقتىرىلاتىن بولادى. بىراق وعان دەيىن 10 جىلداي ۋاقىت كەرەك. سوندىقتان “قولدانىستاعى ەسكى دە بولسا جارامدى لوكوموتيۆتەردى تەحنيكالىق جاعدايدا ۇستاپ تۇرۋ ءۇشىن جوندەۋ تەحنولوگياسىن جەتىلدىرگەن ءجون” دەيدى ماماندار. جوندەۋ كاسىپورىندارىنىڭ قوسالقى بولشەكتەرمەن, لوكوموتيۆ قوندىرعىلارىمەن ۋاقىتىلى قامتاماسىز ەتىلمەۋى, لوكوموتيۆتەردىڭ جوندەۋگە مەرزىمىندە اعىتىلماۋى, لوكوموتيۆتەردىڭ جوسپاردان تىس جوندەۋگە كىرۋى مەن جوندەۋ ورنىندا تۇرۋ ۋاقىتىنىڭ كوبەيىپ كەتۋى سياقتى سەبەپتەرگە بايلانىستى وتكەن جىلدىڭ جوندەۋ جوسپارى ورىندالماي قالدى. “لوكوموتيۆ” اق اتقارۋشى ديرەكتورى باقبەرگەن جاقسىلىقوۆ نەگىزىنەن مودەرنيزاتسيادان وتكەن لوكوموتيۆتەردىڭ ءجيى بۇزىلاتىنىن تىلگە تيەك ەتەدى. سوندىقتان وتكەن جىلى جوندەۋ قىزمەتىن ۇسىناتىن “قامقور” جوندەۋ كورپوراتسياسى, مودەرنيزاتسيالاۋدىڭ اۆتورى “دجەنەرال ەلەكتريك” جانە سەرۆيستىك قىزمەت كورسەتەتىن “لوكوموتيۆ” سەرۆيس ورتالىعى جەتەكشىلەرى وسى ماسەلەنىڭ ءمانىسىن ءبىلۋ ءۇشىن بىرنەشە رەت باس قوسىپتى. تەپلوۆوز بولشەكتەرىنىڭ ىستەن شىعۋ سەبەپتەرىن تالقىلاعان. بۇل ماسەلەدە “دجەنەرال ەلەكتريك” كومپانياسىنا سەنىم ارتىلدى. “دجەنەرال ەلەكتريك” كومپانياسى لوكوموتيۆتىڭ ەلەكتر قوزعالتقىشىنا تۇسەتىن سالماقتى ازايتۋ ءۇشىن كومپيۋتەرلىك باعدارلاماعا وزگەرىس ەنگىزدى. جالپى العاندا ەلىمىزدىڭ تالاي جىلداردان بەرى توزىعى جەتكەن لوكوموتيۆ پاركىن تولىق جاڭارتۋدا ەلورداداعى لوكوموتيۆ قۇراستىرۋ زاۋىتىنا جۇكتەلەر مىندەت اۋقىمدى. ەلىمىزدى ۇدەمەلى يندۋستريالىق-يننوۆاتسيالىق دامىتۋ باعدارلاماسى اياسىندا ومىرگە كەلگەن بۇل ءوندىرىس وشاعىنىڭ ەگەمەن ەلىمىزدە باسەكەگە قابىلەتتى ءونىم شىعارۋ ۇردىسىندە كوشباسشى بولاتىندىعى داۋسىز. حاليما بۇحارقىزى. استانا.
