ۇكىمەت • 11 ماۋسىم، 2021

اسقار مامين: 2030 جىلعا قاراي قازاقستاندا «جاسىل ەنەرگيا» ۇلەسى 15%-عا جەتەدى

52 رەت كورسەتىلدى

قر پرەمەر-ءمينيسترى اسقار مامين قازاقستاننىڭ ەۋروپالىق وداقپەن ينۆەستيتسيالىق ىنتىماقتاستىعى جونىندەگى ديالوگتىڭ 7-وتىرىسىن وتكىزدى، دەپ حابارلايدى Egemen.kz.

جاڭارتىلاتىن ەنەرگيا كوزدەرىن دامىتۋ، قر-نىڭ تومەن كومىرتەكتى ەكونوميكاعا كوشۋى، سونداي-اق دەكاربونيزاتسيا پروتسەسىندەگى ىنتىماقتاستىق الەۋەتى ماسەلەلەرى قارالدى.

جاڭارتىلاتىن ەنەرگەتيكانى دامىتۋ پەرسپەكتيۆالارى تۋرالى ەۋروپالىق وداقتىڭ ورتالىق ازيا بويىنشا ارنايى وكىلى پەتەر بۋريان، قازاقستاندا اككرەديتتەلگەن نيدەرلاند ەلشىسى اندرە كارستەنس، گەرمانيا ەلشىسى تيلو يوحاننەس كليننەر، ورتالىق ازياداعى گەرمانيا ەكونوميكاسى وكىلدىگىنىڭ باسشىسى حوۆسەپ ۆوسكانيان، ورتالىق ازيا ايماعىنداعى «Eni» كومپانياسىنىڭ باسشىسى لۋچانو ۆاسكەس، «Total Eren» باس ديرەكتورى تەرري پلەزانت بايانداما جاسادى.

قابىلدانىپ جاتقان شارالار تۋرالى ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ، ەنەرگەتيكا ءمينيسترى نۇرلان نوعاەۆ، قارجى ءمينيسترى ەرۇلان جاماۋباەۆ، سونداي-اق «سامۇرىق-قازىنا» اق باسقارما توراعاسى الماسادام ساتقاليەۆ باياندادى. قازاقستان ەكونوميكاسىن ترانسفورماتسيالاۋ جانە ەنەرگيا تيىمدىلىگىن ارتتىرۋ، قر-نىڭ 2050 جىلعا دەيىنگى تومەن كومىرتەكتى دامۋ تۇجىرىمداماسىن ازىرلەۋ جانە ت. ب. ماسەلەلەر تالقىلاندى.

«2020 جىلعى جەلتوقساندا بۇۇ اياسىندا ۇيىمداستىرىلعان كليماتتىق امبيتسيالار جونىندەگى سامميتتە قر پرەزيدەنتى قاسىم-جومارت توقاەۆ قازاقستاننىڭ 2060 جىلعا قاراي كومىرتەكتى بەيتاراپتىققا قول جەتكىزۋ ماقساتى تۋرالى جاريالادى. ءبىز ەنەرگيا ءوندىرىسىنىڭ جالپى كولەمىندە جاڭارتىلاتىن ەنەرگيا كوزدەرىنىڭ ۇلەسىن ارتتىرۋ بويىنشا بارىنشا كۇش-جىگەر جۇمسايمىز. ماسەلەن، 2020 جىلعى جاعداي بويىنشا بۇل كورسەتكىش 3%-دى قۇرادى، 2022 جىلى ونى 6%-عا دەيىن ەكى ەسەگە ارتتىرۋ جوسپارلانۋدا. 2030 جىلعا قاراي قازاقستاننىڭ ەنەرگەتيكاسىنداعى جاسىل ەنەرگيانىڭ ۇلەسى 15%-عا دەيىن جەتكىزىلەدى»، دەدى ا. مامين.

ۇكىمەت باسشىسى ازىرلەنىپ جاتقان «جاسىل قازاقستان» ۇلتتىق جوباسى اياسىندا قولجەتىمدى جانە تازا ەنەرگيانى، تۇراقتى قالالار مەن قوعامداستىقتاردى، جاۋاپتى تۇتىنۋ مەن ءوندىرىستى قوسا العاندا، بۇۇ-نىڭ تۇراقتى دامۋ ماقساتتارىنا قول جەتكىزۋ جونىندەگى شارالاردى ىسكە اسىرۋ جوسپارلانىپ وتىرعانىن جەتكىزدى.

قازاقستاندا تۇراقتى دامۋ مىندەتتەرىن ىسكە اسىرۋ ماقساتىندا جاڭا ەكولوگيالىق كودەكس قابىلداندى، ول ەىدۇ ەلدەرىنىڭ قاعيداتتارى مەن ستاندارتتارىنا سايكەس كەلەدى جانە بيىلعى 1 شىلدەدە كۇشىنە ەنەدى. ەلىمىزدە «جاسىل ەكونوميكانى»، ونىڭ ىشىندە جاڭارتىلاتىن ەنەرگەتيكانى دامىتۋعا، سۋدى ءتيىمدى پايدالانۋعا جانە باسقا دا تابيعي رەسۋرستاردى ۇتىمدى پايدالانۋعا سالىناتىن مەملەكەتتىك جانە جەكە ينۆەستيتسيالار ارتتىرىلۋدا.

پرەمەر-مينيستر ەۋروپالىق وداق ەلشىلەرىن قازاقستاننىڭ ەو-مەن ساۋدا-ەكونوميكالىق جانە ينۆەستيتسيالىق ىنتىماقتاستىعىن دامىتۋعا جاردەمدەسۋ بويىنشا ودان ءارى اشىق جانە بەلسەندى ديالوگقا شاقىردى.


 

سوڭعى جاڭالىقتار

اقتوبەدە قوقىس پوليگونى ورتەندى

ايماقتار • بۇگىن، 19:58

تۋريستكە دە ءتارتىپ بار

ايماقتار • بۇگىن، 18:06

دوللار قايتا قىمباتتاي باستادى

ەكونوميكا • بۇگىن، 11:47

ۇقساس جاڭالىقتار