قوعام • 11 ماۋسىم، 2021

جەلىدەگى جوقتاۋ

1165 رەت كورسەتىلدى

نەسىن ايتايىق، وسى كۇنى ينتەرنەتتىڭ بەتى «يماندى بولسىن» دەگەن سوزگە ءيىن تىرەسىپ تۇر. بەتىن ءارى قىلسىن، بۇگىنگى مىناۋ داۋاسىز دەرت، اتى جامان اجال تالاي جاقسىمىز بەن جاقىنىمىزدى جالماپ كەتىپ جاتقان الاساپىران ۋاقىتتا سول ءسوزدى ەستىگىمىز، كورگىمىز كەلمەي-اق تۇرادى. بىراق سۋىق ءسوز سۋماڭ ەتىپ جىلدام تاراي جونەلەدى ەمەس پە؟ جانىڭدى ىزعار قارىپ وتكەندەي، ارقاڭدى قايعىنىڭ قارا قامشىسى وسىپ تۇسىرگەندەي جايسىز حاباردى وقىپ ەسەڭگىرەپ قالاسىڭ...

ارينە، تاس تۇسكەن جەرىنە اۋىر، تۋىسىن جوعالتىپ، قايعىدان قان جۇتىپ وتىرعان جۇرتقا قازا سالماعىنىڭ قانشالىقتى اۋىر ەكەنىن سوزبەن ايتىپ جەتكىزۋ قيىن. ءتۇرلى جاعدايعا بايلانىستى بىرتۋعانىنىڭ جانازاسىنا بارا الماعان باۋىرلارىمىز دا بار. ايتقان جەردە بالە جوق، اجال الىس-جاقىنعا قاراسا، قانە؟

بىراق ايتپاعىمىز بۇل ەمەس. بۇگىندە الەۋمەتتىك جەلىنىڭ الاۋلايىمەن توپىراقتى ولىمگە توپ الدىندا ونلاين «وڭاي» كوڭىل ايتۋ بەلەڭ الىپ بارا جاتقانداي. قازنەتتەگى قازەكەمنىڭ قازانى ازا تۇتۋى كەيىنگى كەزدە ءتىپتى تىتىركەندىرىپ بارادى.

اكەسىنىڭ توپىراعى كەپپەك تۇگىلى، ءتانى سۋىماي جاتىپ جەلىدە جىلاپ وتىرعان ۇل-قىزدى كورگەندە كوڭىلىڭدى كوك مۇز قاريدى. «جاقىنىمنان جاڭا عانا ايرىلىپ قالدىم» دەپ اقى يەسى اقپارات تاراتىپ، جەلىدە جاسىل بەلگىسى جارقىراپ ونلاين وتىرعاندا ءوزىڭ ءبىرتۇرلى بولىپ قالاسىڭ. ءبىز دە الگى جەردە جايسىز حاباردى ەستىگەن بويدا قوس قولىمىزدى جايىپ، قۇدايدان مارقۇمعا دۇعا وقۋدىڭ ورنىنا سمارتفونىمىزدىڭ بەتىن «يماندى بولسىن» دەگەن سوزبەن سيپاي سالاتىن بولدىق.

بۇگىندە الەۋمەتتىك جەلىدە بەس تيىن دەگەن ۇعىم بار. اتالعان ماسەلەگە قاتىسى بولسىن، بولماسىن، حاقى بار ما، جوق پا، وعان قارايتىن حالىق كورىنبەيدى. جىلت ەتكەن جەرگە ءوزىنىڭ بەس تيىنىن قوسا كەتۋدى جالاقىسىز جۇمىس دەپ ەسەپتەيتىندەر كوپ-اق. «يماندى بولسىن» دەگەن جانى جوق جالاڭ ءسوز دە سول بەس تيىننىڭ ار جاق، بەر جاعىنا اينالىپ بولدى.

قاراپ وتىرساق، باياعىنىڭ قارا جامىلىپ، قىرىق كۇن ازا تۇتاتىن ءداستۇرى قۇردىمعا ءسىڭىپ قۇرىعالى قاشان! كۇلەمىز-اۋ، وتكەندە كىشكەنتايى دۇنيەگە كەلىپ، ءدۇيىم جۇرتتان ءسۇيىنشى سۇراپ جاتقان باۋىرىمىزدىڭ الگى جازباسىنا الەۋمەتتىك جەلىدەگى ءبىر اعاسى بايقاماي «يماندى بولسىن» دەپ «قۇتتىقتاۋ» جولداپتى. اعاسى دا ادەيى ىستەيىن دەمەگەن شىعار، الەۋمەتتىك جەلىدە ەكىن­شى بىرەۋگە كوڭىل ايتىپ، بەس تيىنىن قوسام دەپ وتىرىپ شاتاسقان بولۋى مۇمكىن. جالپى، مۇنداي شاتاسۋدى كەشىرەتىن بار، كەشىرمەيتىن بار.

ىڭعايسىز شارۋاعا ەرىكسىز كۇلدىك تە، قويدىق.

جالپى، گادجەتىمىزدەگى «ت9» تاپسىرماسى كوپ جازعان ءسوزدى جادىنا جاتتاپ الاتىنى بەلگىلى. وسى كۇنى «ي» دەگەن باتىرمانى باسساڭىز بولدى «يماندى بولسىن» دەگەن ءسوز اتىپ شىعادى. ونىسى «مۇمكىن ءسىز وسى ءسوزدى جازعىڭىز كەلىپ تۇرعان شىعار» دەگەن مەزىرەتى. بايقاعانىمىز، مۇنداي يبالى، مۇنداي يماندى ينتەرنەت ءيسى مۇسىلمانعا، ونىڭ ىشىندە عالامتوردىڭ الدىندا كۇنى-ءتۇنى وتىرعان قازەكەمە جاقسى-اق بولىپ تۇرعان سياقتى. بۇرىندا قازانى ەستىرتۋدىڭ ءوزى ەستى سالت ەدى-اۋ. بۇرىندا كوڭىل ايتۋدىڭ ءوزى كوپ-كورىم ونەر ەدى-اۋ. بۇرىندا ازا تۇتۋدىڭ ءوزى ايرىقشا ءداستۇر ەدى-اۋ. سونىڭ ءبارىن ارزان جەلىنىڭ بۇگىن بار، ەرتەڭ جوق ەرمەگىنە ايىرباستاي سالۋ قانشالىقتى دۇرىس؟ بىلگەنگە، بۇل عالامتور جاقىنىڭدى الىستاتىپ، الىسىڭدى جاقىنداتۋى وڭاي وتە كۇردەلى ورمەك ەكەنىن اڭعارۋ اسا قيىن ەمەس. ايتا بەرسەك بۇل ماسەلەنىڭ تامىرى ءتىپتى تەرەڭگە كەتەدى.

بۇگىندە سونداي-اق قابىر باسىنان قالتا تەلەفونى ارقىلى رەپورتاج جاساۋ دا ادەپ­سىزدەۋ ادەتكە اينالدى. جاس قابىردى جار­قى­راتىپ جالپاق جۇرتقا جاريالاپ، سول قا­زاعا قاتتى قايعىرعانسيمىز. ءتىپتى ورەسكەل سۇمدىق. جويداسىز جايىلعاندىق. وسى كۇنى بۇل الەۋمەتتىك جەلىدە ەڭكەيگەن قاريادان ەڭبەكتەگەن بالاعا دەيىن وتىرعانىن ءبىز تازا ۇمىتىپ كەتتىك. سول ءسىز جاريالاپ وتىرعان جاس قابىردى كورگەن كىشكەنتاي بالانىڭ، نە جاس كەلىننىڭ، نە قىز بالانىڭ پسيحولوگياسى بۇزىلاتىنىن نەگە ەسكەرمەيمىز؟ ونى ويلاپ جاتقان ويلىمىز از، ۇڭىرەيگەن بوس كوردى، توپىراعى كەپپەگەن جاس قابىردى جاريالاعان ۇستىنە جاريالاي تۇسۋدەمىز...

ۇشكىلسىز كويلەك كيىپ ءۇش جەردەن بۋىلىپ جاتقان ءمايىتتى سۋرەتكە ءتۇسىرىپ جەلىگە جاريا­­لاۋدان اسقان تاربيەسىزدىك جوق-اۋ!..

وسى جونسىزدىكتى جۇگەندەيتىن ۋاقىت باياعىدا بولدى. بالكىم، يمامداردىڭ تاراپىنان اتالعان ماسەلەگە قاتىستى ءپاتۋا شىعارۋ كەرەك شىعار؟ ايتپەسە، ءاي دەگەنگە قوياتىن الەۋمەتتىك جەلى، ونى قولدانىپ وتىرعان قوجايىندار كورىنبەيدى. «اشىنعاننان شىعادى اششى داۋسىم» دەگەندەي، كەشەگى ماعجان اقىننىڭ «مەنى دە ءولىم الديلە» دەگەنىن بۇگىنگى ۇرپاق تىكەلەي ءتۇسىنىپ، قازانى الەۋمەتتىك جەلىدە قاتىرىپ «الديلەپ» جاتقانداي.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار