اۋىل شارۋاشىلىعى ءمينيسترى ساپارحان وماروۆ, ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, سولتۇستىك قازاقستان وبلىسىنىڭ اكىمى قۇمار اقساقالوۆ, قوستاناي وبلىسىنىڭ اكىمى ارحيمەد مۇحامبەتوۆ, اقمولا وبلىسىنىڭ اكىمى ەرمەك مارجىقپاەۆ بايانداما جاسادى.
بيىل قازاقستاندا كوكتەمگى دالا جۇمىستارى وڭتايلى مەرزىمدە اياقتالدى, ونىڭ قورىتىندىسى بويىنشا ەگىس القابى 78,2 مىڭ گا-عا 22,7 ملن گا القاپقا دەيىن ارتتى. ءداندى جانە ءداندى-بۇرشاقتى داقىلدار 15,7 ملن گا القاپقا ەگىلگەن.
الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن باقىلاۋ, رەنتابەلدىلىگى جوعارى داقىلداردىڭ ونىمدىلىگىن ارتتىرۋ, يمپورت الماستىرۋ بويىنشا جۇمىستار شەڭبەرىندە مايلى داقىلدار القابى 2,9 ملن گا دەيىن (+11,9 مىڭ گا), جەم-ءشوپ داقىلدارى القابى 3,4 ملن گا دەيىن (+104,2 مىڭ گا), كوكونىس-باقشا داقىلدارى القابى 275,2 مىڭ گا (+10,6 مىڭ گا), كارتوپ القابى 198 مىڭ گا دەيىن (+5,8 مىڭ گا) ۇلعايتىلدى.
«كوكتەمگى ەگىس جۇمىستارىن ساپالى ءارى ۋاقىتىندا جۇرگىزۋ ءۇشىن قارجىلاي جانە ماتەريالدىق-تەحنيكالىق قامتاماسىز ەتۋ بويىنشا بارلىق قاجەتتى شەشىمدەر قابىلداندى», دەدى ا. مامين.
اگروونەركاسىپتىك كەشەن سۋبەكتىلەرىن قولداۋ ءۇشىن «اگرارلىق نەسيە كورپوراتسياسى» اق رەسپۋبليكالىق بيۋدجەتتەن 70 ملرد تەڭگە كولەمىندە بيۋدجەتتىك نەسيە ءبولدى. سوڭعى قارىز الۋشىلار ءۇشىن سىياقى مولشەرلەمەسى جىلدىق 5%-دان اسپايدى. بولىنگەن قاراجات 3,3 ملن گا ەگىس القابىن قامتي وتىرىپ, 2600 اوك سۋبەكتىسىن قارجىلاندىرۋعا مۇمكىندىك بەرەدى. بيۋدجەتتىك كرەديتپەن قاتار بيىل اۋىل شارۋاشىلىعى ءونىمىن فورۆاردتىق ساتىپ الۋ ۇشىن بولىنەتىن قاراجات كولەمى 24,5 ملرد تەڭگەدەن 47 ملرد تەڭگەگە دەيىن ۇلعايدى.
اگروونەركاسىپتىك كەشەن سۋبەكتىلەرىنە نارىقتىق باعادان 14%-عا تومەن باعامەن 380 مىڭ توننا ديزەل وتىنى ءبولىندى, 405,3 مىڭ توننا تىڭايتقىش تيەلدى. بۇل رەتتە مەملەكەت اۋىل شارۋاشىلىعى وندىرۋشىلەرىنىڭ تىڭايتقىشتار مەن پەستيتسيدتەردى ساتىپ الۋعا جۇمساعان شىعىندارىنىڭ 50%-ىنا دەيىن سۋبسيديالايدى. ەگىس ناۋقانىنىڭ قورىتىندىسى بويىنشا اۋىل شارۋاشىلىعى داقىلدارىنىڭ بارلىعى 2,5 ملن توننا كونديتسيالىق تۇقىمى سەبىلدى.
ۇكىمەت باسشىسى اۋىل شارۋاشىلىعى, ەنەرگەتيكا, يندۋستريا جانە ينفراقۇرىلىمدىق دامۋ مينيسترلىكتەرىنە وبلىستاردىڭ اكىمدىكتەرىمەن بىرلەسىپ, اگروحيميكاتتار مەن مينەرالدى تىڭايتقىشتاردىڭ جانە ارزانداتىلعان ديزەل وتىنىنىڭ قاجەتتى كولەمىن ۋاقىتىندا بەرۋدى قامتاماسىز ەتۋدى تاپسىردى.
ەكولوگيا مينيسترلىگىنە وبلىس اكىمدىكتەرىمەن بىرلەسىپ, قىسقا مەرزىمدە ەلىمىزدىڭ وڭتۇستىگىندە فەرمەرلەردى سۋارمالى سۋمەن قامتاماسىز ەتۋ ماسەلەسىن شەشۋ بويىنشا جوسپارلانعان ءىس-شارالاردى وتكىزۋ تاپسىرىلدى.
