ەڭ الدىمەن مەملەكەتتىك مەكەمەلەر قوعامدىق ۇيىمدارمەن تىعىز بايلانىستا بولۋى كەرەك, ەكەۋىنىڭ ءتيىمدى جۇمىسىن ارتتىرۋ – مىندەت. بۇل رەتتە ۇكىمەت ارنايى جوسپار دايىندايدى دەپ ويلايمىن. ازاماتتىق قوعامنىڭ وكىلى رەتىندە سەرىكتەستىككە دايىنمىن.
مەنىڭ قولداۋىمنىڭ سەبەبى – ءوزىم باسقارىپ وتىرعان ۇيىم تۇرمىستىق زورلىق-زومبىلىققا قاتىستى جوبانى قولعا الىپ وتىر. ەلىمىزدە بۇل وزەكتى ماسەلە ەكەنى, ءتۇيىنى تابىلماي تۇرعانى انىق. بۇل – ەلىمىز ءۇشىن ۇلكەن سىن. تۇلعاعا قول تيگىزبەۋ بويىنشا زاڭناما ءجيى بۇزىلىپ وتىر. وعان قوسا بالالارعا ارنالعان ينتەرناتتار مەن قارتتار ۇيىندەگى, تۇرمەلەردەگى زورلىق-زومبىلىق تۋرالى اشىق ايتىلمايدى. ماسەلەن, بىلتىر اياگوزدەگى بولعان وقيعا وسىعان دالەل. 4 كىشكەنتاي بالا باسىنان جاراقات الىپ, قايتىس بولدى. ولاردى ۇرعانى انىق قوي. مۇنداي قورقىنىشتى جاعداي تۋرالى اشىق ايتۋ كەرەك.
«امان-ساۋلىق» قوعامدىق قورى زورلىققا قارسى ۇيىمدار كواليتسياسىنا كىرەدى. ۇيىم جۇرگىزەن تالداۋ ناتيجەسىندە ءزابىر كورگەندەر قۇقىق قورعاۋ ورگاندارىنا ەمەس, ەڭ الدىمەن مەديتسينالىق ورتالىقتارعا بارادى. جابىرلەۋشىلەر دە قىسىم كورسەتەدى, جاعدايدى ايتپاۋى ءۇشىن قورقىتىپ, قوقان-لوقى جاسايدى. سوندىقتان جابىرلەنۋشىلەردىڭ كوبى «قۇلادىم, ابايسىزدا بولدى» دەگەن سىلتاۋ ايتىپ, جالتارادى. ودان كەيىن ءجابىر كورگەنىن دالەلدەۋ قيىن. ويتكەنى دارىگەر ناۋقاستىڭ ايتۋى بويىنشا جازادى. ال وندا زورلىق-زومبىلىق فاكتىسى تۋرالى جازبا بولمايدى.
بۇل ماسەلە بويىنشا 2019 جىلدان باستاپ جۇمىس جۇرگىزىلىپ كەلەدى. ماسەلەنى شەشۋ ءۇشىن تەك مەملەكەتتىڭ نەمەسە ۇكىمەتتىك ەمەس ۇيىمداردىڭ جۇمىس ىستەگەنى جەتكىلىكسىز. بىرلەسىپ ارەكەت ەتۋ كەرەك. وسى ورايدا ءبىز قىرعىز رەسپۋبليكاسىنا ىسساپارمەن بارىپ, ولاردىڭ تاجىريبەسىمەن تانىستىق.
ءبىز ەندى نۇر-سۇلتان, الماتى, قاراعاندى قالالارىندا قاناتقاقتى جوبانى ىسكە قوسامىز. كەيىن ءىس جۇزىندە جاعدايدىڭ رەتىن كورىپ, بالكىم, وزگەرىس ەنگىزۋىمىز دە مۇمكىن. جىلدىڭ اياعىنا دەيىن جوبانى رەسپۋبليكا بويىنشا ەنگىزۋدى ماقسات ەتەمىز. بۇل جابىرلەنۋشىلەردىڭ قۇقىعىن قورعاپ, قىسىم كورسەتۋشىنىڭ زاڭ الدىندا جاۋاپ بەرۋىنە ىقپالىن تيگىزەدى.
باقىت تۇمەنوۆا,
«امان-ساۋلىق» قوعامدىق قورىنىڭ جەتەكشىسى
