تالقىلاۋ جاستار ورتاسىنداعى جاعدايدى جان-جاقتى تالداۋدى, سونىڭ ىشىندە اشىق قوعامدىق پىكىرتالاستار وتكىزۋدى قامتاماسىز ەتۋ ماقساتىندا ۇيىمداستىرىلدى.
تالقىلاۋعا قر پارلامەنتى ءماجىلىسىنىڭ دەپۋتاتتارى, ورتالىق جانە جەرگىلىكتى اتقارۋشى ورگانداردىڭ وكىلدەرى, جاستار ۇيىمدارى مەن رەسۋرستىق ورتالىقتاردىڭ باسشىلارى قاتىستى. قر پرەزيدەنتى جانىنداعى قازاقستاندىق ستراتەگيالىق زەرتتەۋلەر ينستيتۋتىنىڭ, قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ, «Nur Otan» قوعامدىق ساياسات ينستيتۋتىنىڭ, قولدانبالى ەتنوساياسي زەرتتەۋلەر ينستيتۋتى مەن «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ جانە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جەتەكشى ساراپشىلارى دا ءوز پىكىرلەرىن ءبىلدىردى.
«بۇگىن ءبىز مەملەكەتتىك دامۋدىڭ ماڭىزدى اسپەكتىلەرىنىڭ ءبىرى – جاستار ساياساتى سالاسىن تالقىلاۋدامىز. بيىلعى ۇلتتىق بايانداما قازاقستان رەسپۋبليكاسى تاۋەلسىزدىگىنىڭ 30 جىلدىعى ەسكەرىلە وتىرىپ دايىندالاتىن بولادى. وسى ورايدا جىل سوڭىنا دەيىن جاستاردىڭ ءبىرىنشى كەزەكتەگى قاجەتتىلىكتەرىن, مۇددەلەرى مەن سۇرانىستارىن انىقتاۋعا مۇمكىندىك بەرەتىن تىڭعىلىقتى عىلىمي جۇمىس كۇتىپ تۇر», دەدى ءوز سوزىندە «رۋحاني جاڭعىرۋ» ققدي باسقارما توراعاسى اسىلبەك ەسەنباەۆ.
اعىمداعى جىلى ۇلتتىق بايانداما ەل تاۋەلسىزدىگىنىڭ 30 جىلدىعىن ەسكەرە وتىرىپ دايىندالادى, وندا قازىرگى جاستاردىڭ تاۋەلسىزدىك قۇندىلىقتارى تۋرالى كوزقاراستارى كورىنىس تاباتىن بولادى. قازاقستاندىق جاستاردىڭ الەۋمەتتىك جاعدايى تۋرالى ساپالى دەرەكتەردى انىقتاۋ ماقساتىندا الەۋمەتتانۋلىق زەرتتەۋلەر مەن ساراپشىلىق جانە عىلىمي قوعامداستىقپەن اشىق تالقىلاۋلار وتكىزىلەدى دەپ جوسپارلانۋدا. ۇلتتىق باياندامانى قالىپتاستىرۋ بارىسىندا ازىرلەنگەن ۇسىنىمدار مەملەكەتتىك جاستار ساياساتىن ىسكە اسىرۋدىڭ ماڭىزدى پراكتيكالىق قۇرالىنا اينالادى.
«قازاقستان جاستارى – 2021» ۇلتتىق بايانداماسىندا تاۋەلسىزدىك ۇرپاعىنىڭ پورترەتى جاسالماق. ءبىز قازىرگى قازاقستاندىق جاستاردىڭ بولاشاعى, ولاردىڭ بۇگىنگى مۇددەلەرى مەن نەگىزگى قاجەتتىلىكتەرى تۋرالى كوزقاراستاردى زەرتتەيمىز», دەپ اتاپ ءوتتى «جاستار» عزو ديرەكتورى ايان ساكوشەۆ.
كەزدەسۋ قورىتىندىسى بويىنشا ساراپشىلار الداعى ۋاقىتتا جۇرگىزىلەتىن عىلىمي جۇمىس جاس ۇرپاقتىڭ ءبىرىنشى كەزەكتەگى قاجەتتىلىكتەرىن, سونداي-اق جاستار ساياساتىن تالقىلاۋ كەزىندە ەسكەرىلۋى ءتيىس نەگىزگى ترەندتەردى, قىزىعۋشىلىقتار مەن سۇرانىستاردى انىقتاۋعا مۇمكىندىك بەرەدى دەگەن ورتاق پىكىرگە كەلدى.
ەسكە سالا كەتسەك, 2013 جىلدان باستاپ «جاستار» عزو جىل سايىن «قازاقستان جاستارى» ۇلتتىق بايانداماسىن ازىرلەپ كەلەدى. بايانداما قازاقستاندىق جاستاردىڭ تىنىس-تىرشىلىگىنىڭ نەگىزگى سالالارىنداعى جاعدايىنا جان-جاقتى تالداۋ جاسالىنادى. بۇل عىلىمي جۇمىستىڭ باستى ماقساتى مەملەكەتتىك جاستار ساياساتى جۇيەسىن جاستاردىڭ وزەكتى سۇرانىستارى مەن مۇددەسىنە ادىستەمەلىك قولداۋ جانە بەيىمدەۋ بولىپ تابىلادى.
