ايماقتار • 09 ماۋسىم، 2021

سولتۇستىك قازاقستاندا 8 جاستاعى قىز جوعالىپ كەتتى

48 رەت كورسەتىلدى

سولتۇستىك قازاقستان وبلىسىنداعى ەسىل اۋدانىندا جوعالىپ كەتكەن 8 جاسار قىزدى پوليتسەيلەر مەن قۇتقارۋشىلار ىزدەپ جاتىر، دەپ حابارلايدى Egemen.kz.

9 ماۋسىم كۇنى ساعات 10:00-دە سقو تجد جەدەل-قۇتقارۋ جاساعىنىڭ سۇڭگۋىرلەرى، اۋداندىق ءبولىمنىڭ قۇتقارۋشىلارى جانە پوليتسەيلەر، جەرگىلىكتى اتقارۋشى ورگان وكىلدەرى جوعالعان قىزدى ىزدەۋدى باستادى. 8 جاسار قىز ۇيىنەن ساعات 20:00 شاماسىندا ەشكىمگە ايتپاي شىعىپ كەتكەن. ەسىل وزەنىنىڭ جاعاسىنان جەتكىنشەكتىڭ كيىمى تابىلدى.

«ەسىل وزەنىنىڭ ءتۇبى جانە وزەننىڭ بويى تەكسەرىلىپ جاتىر. جەكە قۇرامنان 19 ادام، 5 تەحنيكا جانە ەكى قايىق جۇمىلدىرىلدى.

ىزدەۋ جۇمىستارى جالعاسادى»، دەيدى سقو تجد ەسىل اۋداندىق توتەنشە جاعداي ءبولىمىنىڭ باس مامانى كەنجەبەك قوجاحمەتوۆ.

سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە، 8 جاسار قىز اۋىلعا جازعى دەمالىسقا قوناققا كەلگەن. كەشكە جاقىن ۇيىنە ورالماعان سوڭ اجەسى ۋچاسكەلىك پوليتسيا ينسپەكتورىنا ايتادى. ول ەرىكتىلەر مەن تج قىزمەتكەرلەرىن جۇمىلدىرىپ، بالانى ىزدەيدى.

وزەن جاعاسىندا، شامامەن اۋىل شەتىنەن 500 مەتردەي جەردە قىزدىڭ كيىمدەرى تابىلدى. كۇندىز ول وزىمەن تەتەلەس نەمەرە ىنىسىمەن ويناعان. بالا ۇيىنە ورالعان سوڭ، قىزبەن بىرگە سۋعا تۇسكەنىن جانە ونى اعىس الىپ كەتكەنىن ايتقان.

ء«وتىنىش كەشكى ساعات 23.00 شاماسىندا كەلىپ ءتۇستى. ءتۇنى بويى ىزدەستىرىلدى. قازىر جۇمىس جالعاسۋدا. سۇڭگۋىرلەر شاقىرىلدى»، دەيدى ەسىل اۋدانىنىڭ پب باستىعى ەرلىك ەسلامبەكوۆ.

سوڭعى جاڭالىقتار

ۇقساس جاڭالىقتار