بۇگىندە قارقىن العان قۇرىلىس جۇمىسىنا «جۇمىسپەن قامتۋدىڭ جول كارتاسى» شەڭبەرىندە بولىنگەن قارجى تارتىلىپ وتىر. ونىڭ كولەمى قوماقتى, 105 ملرد تەڭگە شاماسىندا. بۇل قارجىعا 1 051 جوبا جۇزەگە اسىپ, 20 مىڭ ادامعا ماۋسىمدىق جۇمىس ورنى اشىلعان. ال بىلتىر بۇل باعىتتا 60 مىڭ ادام ەڭبەكپەن قامتىلعان بولاتىن.
– الماتى وبلىسىندا قۇرىلىس سالاسىندا كارانتيندىك شەكتەۋلەرگە قاراماستان, جۇمىس قارقىنى باسەڭدەگەن جوق. سول سياقتى ءبىز شاعىن جانە ورتا بيزنەس نىساندارىنىڭ جابىلۋى سالدارىنان ورنىنان بوساپ قالعان كوپتەگەن ازاماتتى وسى قۇرىلىس سالاسىندا جۇمىسپەن قامتىدىق. وڭىردە «نۇرلى جەر» باعدارلاماسىن جۇزەگە اسىرۋ جالعاسۋدا, جىل سوڭىنا دەيىن 1 ملن شارشى مەتر تۇرعىن ءۇي پايدالانۋعا بەرۋ جوسپارلانعان. قازىر 2 603 پاتەرلىك 521 تۇرعىن ءۇي سالىنىپ جاتىر, سونىڭ ىشىندە 1 212 پاتەردى كوپبالالى انالارعا بەرەمىز, – دەيدى وبلىس اكىمى اماندىق باتالوۆ.
جالپى بيىل وبلىستا «7-20-25», «باقىتتى وتباسى» جانە «شاڭىراق 5-10-20» ارنايى باعدارلامالارى بويىنشا دا 1 986 وتباسى جەڭىلدىكپەن پاتەرلى بولادى دەگەن ءۇمىت بار. وسى تۇرعىن ۇيمەن قامتۋ جايى وبلىستىڭ 2021-2025 جىلدارعا ارنالعان دامۋ باعدارلاماسىنىڭ نەگىزگى ارقاۋى بولىپ وتىر. ال دامۋ باعدارلاماسىنا قىرۋار قاراجات جۇمسالماق. ياعني العا قويعان ماقساتتى جۇزەگە اسىرۋعا 3,5 ترلن تەڭگە قاراستىرىلسا, ونىڭ 2 ترلن 300 ملرد تەڭگەسى بيۋدجەتتەن, ال 1 ترلن 200 ملرد تەڭگە قارجى جەكە ينۆەستورلاردان قۇيىلماق. ارينە بۇل قاراجاتقا وڭىردەگى جول جوندەۋ, اۋىز سۋمەن قامتۋ, جىلۋمەن قامتۋ سياقتى نەگىزگى سالالارداعى ماسەلەلەردى شەشۋ دە قاراستىرىلعان. سونىڭ ىشىندە 2021-2025 جىلدارى وبلىستا شامامەن 5 ملن 400 مىڭ شارشى مەتر تۇرعىن ءۇي سالۋ جوسپارلانىپ وتىر. ونىڭ ىشىندە 1,1 ملن شارشى مەتر باسپانا قۇرىلىسى «نۇرلى جەر» باعدارلاماسى اياسىندا ىسكە اسپاق. بۇل باعدارلاما وبلىستاعى باسپاناعا مۇقتاج 3 مىڭنان استام الەۋمەتتىك جاعىنان از قامتىلعان جانە 5,5 مىڭ شاماسىنداعى كوپبالالى وتباسىن ۇيمەن قامتاماسىز ەتۋى ءتيىس.
بۇگىندە باسپانا قۇرىلىسى وبلىس ورتالىعىندا عانا ەمەس, اۋدانداردا دا ءجۇرىپ جاتىر. مىسالعا, سارقان اۋدانىندا 50 پاتەرلى كوپقاباتتى تۇرعىن ءۇي سالىنۋدا. قۇرىلىس «نۇرلى جەر» مەملەكەتتىك باعدارلاماسى اياسىندا باستالعان. ىرگەتاسى بىلتىر قالانعان تۇرعىن ءۇيدى سالۋعا 45 جۇمىسشى ماۋسىمدىق جۇمىسقا تارتىلىپ, ون شاقتى تەحنيكا جۇمىس ىستەۋدە. نىساننىڭ اياقتالۋ مەرزىمى جىل سوڭىنا جوسپارلانىپتى. بۇل جۇمىسقا 505,630 ملن تەڭگە قاراجات بولىنگەن. جاۋاپتى مەردىگەر Golden City DS سەرىكتەستىگى نىساندى تالاپقا ساي سالىپ, مەرزىمىندە اياقتايدى دەگەن ءۇمىت بار.
– جالپى, اۋداندا بۇعان دەيىن 55 تۇرعىن ءۇي سالىنىپ, باسپانا كەزەگىندە تۇرعان ازاماتتارعا بەرىلگەن ەدى. وسى ارقىلى تۇرعىن ءۇي كەزەگىندە تۇرعان ازاماتتاردىڭ ءارتۇرلى مەملەكەتتىك باعدارلامالارعا قاتىسىپ, جەڭىلدەتىلگەن نەسيە ارقىلى ءۇي-جايعا قول جەتكىزۋىنە جول اشىلادى. بيىل اۋدان ورتالىعىندا زاماناۋي ۇلگىدە سالىنىپ جاتقان 5 قاباتتى تۇرعىن ءۇي كەشەنىن قولدانىسقا بەرەمىز, – دەيدى سارقان اۋدانى اكىمىنىڭ ورىنباسارى جومارت مىڭباەۆ.
سونداي-اق بۇل اۋداندا تاعى دا ەكى قاباتتان تۇراتىن 20 پاتەرلى تۇرعىن ءۇي قۇرىلىسى باستالۋدا. اۋدان ورتالىعىنداعى قۇرىلىس جۇمىستارىن جۇرگىزۋ ءۇشىن مەملەكەتتىك ساتىپ الۋعا اشىق كونكۋرس جاريالانعان. جاڭا باسپانا سالۋعا جالپى قۇنى 296,53 ملن تەڭگە قارجى جۇمسالماق.
